ವಿಜಯಪುರ: ನಗರದ ಶಾಹಪೇಟೆಯಲ್ಲಿ ನೂತನವಾಗಿ ನಿರ್ಮಿಸಲಾಗಿರುವ ಆದಿಶಕ್ತಿ ದುರ್ಗಾ ಪರಮೇಶ್ವರಿ ಮೂರ್ತಿ ಪ್ರತಿಷ್ಠಾಪನೆ ಹಾಗೂ ಕಳಸಾರೋಹಣ ಸಮಾರಂಭ ಆಗಸ್ಟ್ 20ರಿಂದ 23ರ ವರೆಗೆ ನಡೆಯಲಿದೆ ಎಂದು ಶ್ರೀ ಬಸವೇಶ್ವರ ಆದಿಶಕ್ತಿ ತರುಣ ಮಂಡಳಿ ಸಂಚಾಲಕ ರಾಜೇಶ ದೇವಗಿರಿ ತಿಳಿಸಿದರು.
ನಗರದಲ್ಲಿ ಗುರುವಾರ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಅವರು, ಆಗಸ್ಟ್ 20ರಂದು ಬೆಳಿಗ್ಗೆ 7ಕ್ಕೆ ಕುಂಭಮೇಳ, ಬೆಳಿಗ್ಗೆ 9ಕ್ಕೆ ಸಿದ್ದೇಶ್ವರ ಗುಡಿಯಿಂದ ದೇವಸ್ಥಾನದ ವರಗೆ ಮೂರ್ತಿ ಮೆರವಣಿಗೆ ಆಗಸ್ಟ್ 22ರಂದು ಬೆಳಿಗ್ಗೆ ಲಂಬೋಧರ ಪೂಜೆ, ಅಗ್ನಿ ಜನನ ಪೂರ್ವಕ ಗಣಹೋಮ, ನವಗ್ರಹ ಶಾಂತಿ ಸೇರಿದಂತೆ ವಿವಿಧ ಧಾರ್ಮಿಕ ಪೂಜಾ ಕಾರ್ಯಕ್ರಮಗಳು ನಡೆಯಲಿವೆ ಎಂದರು.
ಆಗಸ್ಟ್ 23ರಂದು ಬೆಳಿಗ್ಗೆ 11ಕ್ಕೆ ಶ್ರೀದೇವಿಯ ಅಷ್ಟಬಂಧ ಸ್ಥಿರ ಪ್ರತಿಷ್ಠಾಪನಾ, ಕಲಾನ್ಯಾಶ ಪ್ರಾಣ ಪ್ರತಿಷ್ಠಾಪನಾ, ಶಿಖರ ಕಳಸ ಪ್ರತಿಷ್ಠಾಪನೆ ನಡೆಯಲಿದೆ ಎಂದು ತಿಳಿಸಿದರು.
ಜ್ಞಾನ ಯೋಗಾಶ್ರಮದ ಸಿದ್ದೇಶ್ವರ ಸ್ವಾಮೀಜಿ ಉದ್ಘಾಟಿಸಲಿದ್ದು, ಜಲ ಸಂಪನ್ಮೂಲ ಸಚಿವ ಗೋವಿಂದ ಕಾರಜೋಳ, ಶಾಸಕ ಬಸನಗೌಡ ಪಾಟೀಲ ಯತ್ನಾಳ, ಕೆಪಿಸಿಸಿ ಪ್ರಚಾರ ಸಮಿತಿ ಅಧ್ಯಕ್ಷ ಡಾ.ಎಂ.ಬಿ.ಪಾಟೀಲ ಮುಖ್ಯ ಅತಿಥಿಗಳಾಗಿ ಭಾಗವಹಿಸಲಿದ್ದಾರೆ ಎಂದರು.
