ಆಲಮಟ್ಟಿ ವೃತ್ತಕ್ಕೆ ಕಲೆಯ ಮೆರುಗು

ಆ ಎಂಟು ಅಮೂರ್ತ ರೂಪದ ಕಲಾಕೃತಿಗಳು ಬದುಕಿನ ಎಂಟು ಘಟ್ಟಗಳನ್ನು ಸಾರುತ್ತವೆ. ಈ ಥೀಮ್‌ನ ಹೆಸರು ಜೀವನ ಚಕ್ರ. ಇಲ್ಲಿ ಸಾದರಹಳ್ಳಿ ಗ್ರಾನೈಟ್‌ ಕಲ್ಲುಗಳಲ್ಲಿ ಅಮೂರ್ತ ರೂಪದಲ್ಲಿ ಮಾನವ ಜೀವನದ ಪ್ರಮುಖ ಮಜಲುಗಳನ್ನು ಎಂಟು ಶಿಲಾ ಶಿಲ್ಪ ರೂಪದಲ್ಲಿ ವೃತ್ತವನ್ನು ಅಲಂಕರಿಸಲಾಗಿದೆ ಹಾಗೂ ಅವುಗಳಿಗೆ ಹೊಂದುವಂತಹ ಪ್ರಸಿದ್ಧ ಹೇಳಿಕೆಗಳನ್ನು ಬರೆಯಿಸಲಾಗುತ್ತಿದೆ.

ಪುರುಷ (ಪ್ರಜ್ಞೆ), ಸ್ತ್ರೀ (ಪ್ರಕೃತಿ), ಜೊತೆ ಜೊತೆಯಲ್ಲಿ, ಮಿಲನ, ಜೀವಾಂಕುರ, ತಾಯ್ತನ, ಪಿತೃತ್ವ, ಕೊನೆಯದಾಗಿ ಇಡೀ ಕುಟುಂಬ ಹೀಗೆ ಎಂಟು ಆಕೃತಿಗಳ ಅಮೂರ್ತ ರೂಪವನ್ನು ಇಲ್ಲಿ ಕಲಾಕೃತಿಗಳಲ್ಲಿ ಚಿತ್ರಿಸಲಾಗಿದೆ.

ಸುಮಾರು ನಾಲ್ಕು ಅಡಿ ಎತ್ತರ ಇರುವ ಈ ಕಲಾಕೃತಿಗಳನ್ನು ಮೈಸೂರಿನ ಇಲವಾಲದ ಡಾ. ಎ. ದೇವರಾಜು ಅವರು ರಚಿಸಿದ್ದಾರೆ. ಒಂದೊಂದು ಕಲಾಕೃತಿಗೆ 20 ರಿಂದ 25 ದಿನಗಳಲ್ಲಿ ರೂಪಿಸಿದ್ದು ವಿಶೇಷ.

ಚಿಕ್ಕಬಳ್ಳಾಪುರದ ಸದರಹಳ್ಳಿ ಗ್ರಾನೈಟ್‌ನಲ್ಲಿ ಈ ಕಲಾಕೃತಿಗಳನ್ನು ರಚಿಸಲಾಗಿದೆ. ಒಂದೊಂದು ಕಲಾಕೃತಿಗಳು ₹2.2 ಲಕ್ಷ  ವೆಚ್ಚದಲ್ಲಿ ನಿರ್ಮಿಸಲಾಗಿದೆ ಎನ್ನುತ್ತಾರೆ ಆರ್. ಎಫ್ .ಓ ಮಹೇಶ ಪಾಟೀಲ.

ರಾಕ್ ಉದ್ಯಾನಗಳಿಂದ ಪ್ರಸಿದ್ಧವಾಗಿದ್ದ ಆಲಮಟ್ಟಿಗೆ ಹೊಸ ಕಲಾಕೃತಿಗಳ ಬರ ಇತ್ತು. ಈಗ ಜಲಾಶಯದ ವೃತ್ತದಲ್ಲಿಯೇ ಈ ಕಲಾಕೃತಿಗಳು ರಚನೆಯಾಗಿದ್ದು, ಪ್ರವಾಸಿಗರನ್ನು ಆಕರ್ಷಿಸುತ್ತವೆ ಜತೆಗೆ ಬದುಕಿನ ಪಾಠವನ್ನು ಅರಿಯಬಹುದು.