ಚಂದ್ರಯಾನ-3 ತಂಡದಲ್ಲಿ ಗೊಳಸಂಗಿ ಗ್ರಾಮದ ಯುವಕ

ಗೊಳಸಂಗಿ ಗ್ರಾಮದ ಹಿರಿಯ ರಂಗ ಕಲಾವಿದ ಡೋಂಗ್ರಿಸಾಬ ಹಾಗೂ ಸರ್ಕಾರಿ ಕನ್ನಡ ಗಂಡು ಮಕ್ಕಳ ಮಾದರಿ ಪ್ರಾಥಮಿಕ ಶಾಲೆಯ ಅಡುಗೆ ಸಹಾಯಕಿ ಶಬಾನಾ ದಂಪತಿಯ ಪುತ್ರ ಸೈಫಲಿ ಬೀಳಗಿ (28) ಇಸ್ರೋ ಸಂಸ್ಥೆಯಲ್ಲಿ ಒಂದೂವರೆ ವರ್ಷದಿಂದ ಕಾರ್ಯ ನಿರ್ವಹಿಸುತ್ತಿದ್ದಾರೆ.

ತಾಂತ್ರಿಕೇತರ ಯೋಜನಾ ಸಹಾಯಕರಾಗಿರುವ ಇವರು ಬೆಂಗಳೂರಿನ ಮಾರತಹಳ್ಳಿ ಇಸ್ರೋ ಸಂಸ್ಥೆಯ ಯು.ಆರ್. ರಾವ್ ಬಾಹ್ಯಾಕಾಶ ಕೇಂದ್ರದಲ್ಲಿ ಕಾರ್ಯನಿರ್ವಹಿಸುತ್ತಿದ್ದಾರೆ.

‘ಚಂದ್ರಯಾನ-3ರ ಯೋಜನೆ ಸಿದ್ಧಪಡಿಸಲು ವಿಜ್ಞಾನಿಗಳಿಗೆ ಪೂರಕವಾಗಿ ಕಾರ್ಯನಿರ್ವಹಿಸಿದ್ದೇನೆ. ಅವರಿಗೆ ಅಗತ್ಯವಾಗಿರುವ ಯೋಜನೆಯನ್ನು ಸಿದ್ಧಪಡಿಸಲು ನೆರವಾಗಿದ್ದೇನೆ. ಸೂರ್ಯನಿಗೆ ಉಪಗ್ರಹ ಕಳಿಸುವ ಆದಿತ್ಯ-11 ರ ಯೋಜನಾ ಸಹಾಯಕನಾಗಿಯೂ ಕಾರ್ಯನಿರ್ವಹಿಸಿರುವೆ’ ಎಂದು ಸೈಫ್ ಅಲಿ ಬೆಂಗಳೂರಿನಿಂದ ದೂರವಾಣಿ ಕರೆಯಲ್ಲಿ ‘ಪ್ರಜಾವಾಣಿ’ಗೆ ಮಾಹಿತಿ ನೀಡಿದರು.

ಗೊಳಸಂಗಿಯಲ್ಲಿಯೇ ಶಿಕ್ಷಣ

ಪ್ರಾಥಮಿಕ, ಪ್ರೌಢಶಾಲೆ, ಪಿಯುಸಿ, ಬಿಎ ಪದವಿಯವರೆಗೆ ಗೊಳಸಂಗಿಯಲ್ಲಿಯೇ ಶಿಕ್ಷಣ ಪೂರೈಸಿದ ಸೈಫಲಿ ಮುಂದೆ ಬೆಳಗಾವಿಯ ರಾಣಿ ಚನ್ನಮ್ಮ ವಿಶ್ವವಿದ್ಯಾಲಯದಲ್ಲಿ ಎಂಎ ಪದವಿ ಮುಗಿಸಿ ಚಿನ್ನದ ಪದಕ ಪಡೆದಿದ್ದಾರೆ. ನಂತರ ಐಎಎಸ್, ಕೆಎಎಸ್ ಮಾಡುವ ಕನಸು ಹೊತ್ತಿದ್ದ ಸೈಫಲಿ ಅವರ ಕನಸಿಗೆ ಕೋವಿಡ್ ತಣ್ಣೀರೆರಚಿತು. ಬಡತನದ ಕಾರಣ ತಂದೆಯೊಡನೆ ಕೃಷಿ ಕಾಯಕದಲ್ಲಿ ತೊಡಗಿದ್ದ ಸೈಫಲಿ ಇದೇ ವೇಳೆ ಇಸ್ರೋ ಸಂಸ್ಥೆ ಕರೆದಿದ್ದ ತಾಂತ್ರಿಕೇತರ ಹುದ್ದೆಗೆ ಆಯ್ಕೆಯಾದರು. ಒಂದೂವರೆ ವರ್ಷದಿಂದ ಕಾರ್ಯ ನಿರ್ವಹಿಸುತ್ತಿದ್ದಾರೆ.