ವಿಜಯಪುರ | ಧಾರಾಕಾರ ಮಳೆ; ಹಿಂಗಾರು ಬಿತ್ತನೆಗೆ ಹದ

ಬರ, ಬಿಸಿಲಿನಿಂದ ತತ್ತರಿಸಿರುವ ಜಿಲ್ಲೆಯಲ್ಲಿ ಉತ್ತಮ ಮಳೆಯಾಗಿರುವುದು ಜನರಲ್ಲಿ ಖುಷಿ ಮೂಡಿಸಿದೆ. ವಿಜಯಪುರ ನಗರ ಹಾಗೂ ಬಸವನ ಬಾಗೇವಾಡಿ ಪಟ್ಟಣದಲ್ಲಿ ಮಧ್ಯಾಹ್ನ ಸುಮಾರು ಒಂದು ತಾಸು ಸುರಿದ ಧಾರಾಕಾರ ಮಳೆಗೆ ರಸ್ತೆಗಳು ಜಲಾವೃತವಾಗಿದ್ದವು.

ತಗ್ಗು ಪ್ರದೇಶದಲ್ಲಿ ಮೊಣಕಾಲುದ್ದ ನೀರು ನಿಂತಿತ್ತು. ಹೊಲ, ಹಳ್ಳಗಳಲ್ಲಿ ಮಳೆ ನೀರು ನಿಂತಿತ್ತು. ಕಳೆದ ಮೂರ್ನಾಲ್ಕು ದಿನಗಳಿಂದ ಆಗಸದಲ್ಲಿ ದಟ್ಟ ಮೋಡ ಕವಿದಿದ್ದು, ಮಳೆಗಾಲದ ವಾತಾವರಣ ಕಂಡುಬರುತ್ತಿದೆ. 

ವಿಜಯಪುರ ನಗರದ ಬಸವೇಶ್ವರ ವೃತ್ತದಿಂದ ಸ್ಟೇಷನ್‌ ರಸ್ತೆ ಬದಿಯಲ್ಲಿ ವ್ಯಾಪಾರಸ್ಥರು ದೀಪಾವಳಿ ಹಬ್ಬದ ಅಂಗವಾಗಿ ಮಾರಾಟಕ್ಕಾಗಿ ನೇತುಹಾಕಿದ್ದ ವಿವಿಧ ಬಗೆಯೆ ಹೂವಿನ ಹಾರಗಳು, ತೋರಣಗಳು, ಹಣತೆಗಳು ಮಳೆಯಲ್ಲಿ ತೋಯ್ದವು.

ದೀಪಾವಳಿ ಪೂಜೆಯ ಅಂಗವಾಗಿ ಅಂಗಡಿ, ಮಳಿಗೆಗಳ ಎದುರು ಹಾಕಲಾಗಿರುವ ಶಾಮೀಯಾನ, ಆಕಾಶಬುಟ್ಟಿ, ಬಣ್ಣ ಬಣ್ಣದ ವಿದ್ಯುತ್‌ ಬಲ್ಬ್‌ಗಳ ಸರ, ತೋರಣಗಳು ಮಳೆಯಲ್ಲಿ ತೊಯ್ದ ಪರಿಣಾಮ ವ್ಯಾಪಾರ, ವಹಿವಾಟಿಗೆ ಅಡಚಣೆಯಾಯಿತು.

ಮಳೆಯಿಂದ ಹಿಂಗಾರು ಬಿತ್ತನೆಗೆ ಅನುಕೂಲವಾಗಿದೆ. ಅಲ್ಲದೆ, ಬರದ ನಡುವೆಯೂ ಅಲ್ಪಸ್ವಲ್ಪ ಬೆಳೆದ ಮುಂಗಾರು ಬೆಳೆಗೂ ಅನುಕೂಲವಾಗಿದೆ. ಕೊಯ್ಲಿಗೆ ಬಂದಿರುವ ಕೆಲವು ಬೆಳೆಗೆ ಅನಾನುಕೂಲವಾಗಿದೆ.

ಹವಾಮಾನ ಇಲಾಖೆ ನೀಡಿರುವ ಮಾಹಿತಿ ಪ್ರಕಾರ ಬುಧವಾರ ಬೆಳಿಗ್ಗೆ 8ರಿಂದ ಗುರುವಾರ ಬೆಳಿಗ್ಗೆ 8 ಗಂಟೆ ವರೆಗಿನ ಅವಧಿಯಲ್ಲಿ ಇಂಡಿ 46.4 ಮಿ.ಮೀ. ಮಳೆಯಾಗಿದೆ. ಉಳಿದಂತೆ ತಿಕೋಟಾ 40.2, ಝಳಕಿ 32, ಚಡಚಣ 31, ಹೂವಿನ ಹಿಪ್ಪರಗಿ 22.6, ಹೋರ್ತಿ 23.8, ಆಲಮಟ್ಟಿ 20, ತಾಳಿಕೋಟಿ 18.4, ಅರೇಶಂಕರ 4, ಮಟ್ಟಿಹಾಳ 5, ನಾಗಠಾಣ 6.4, ಭೂತನಾಳ 11.6,  ಕುಮಟಗಿ 13.2, ಕನ್ನೂರ 9.4, ಬಬಲೇಶ್ವರ 4.6, ನಾದ ಬಿ ಕೆ 8.4, ಅಗರಖೇಡ 1,  ಹಲಸಂಗಿ 18,  ಮುದ್ದೆಬಿಹಾಳ 2.5, ನಾಲತವಾಡ 9.7, ಢವಳಗಿ 5, ಸಿಂದಗಿ 14, ಆಲಮೇಲ 3.7, ಸಾಸಾಬಾಳ 5.2, ರಾಮನಹಳ್ಳಿ 10.4, ಕಡ್ಲೆವಾಡ 11, ಬಸವನ ಬಾಗೇವಾಡಿ 2.1 ಮಿ.ಮೀ. ಮಳೆಯಾಗಿದೆ.

ಒಂದು ಗಂಟೆಗೂ ಹೆಚ್ಚು ಕಾಲ ಸುರಿದ ಮಳೆ ವ್ಯಾಪಾರಸ್ಥರ ಪರದಾಟ ಕೊಯ್ಲಿಗೆ ಬಂದಿರುವ ಬೆಳೆಗಳಿಗೆ ಅನಾನುಕೂಲ