ಶಹಾಪುರ: ಹೆಚ್ಚುವರಿ ಮನೆ ನಿರ್ಮಾಣ ಯೋಜನೆ ಕಾರ್ಯಗತ

2021-22ರ ಸಾಲಿನಲ್ಲಿ ಅಂದಿನ ಶಾಸಕ ಶರಣಬಸಪ್ಪ ದರ್ಶನಾಪುರ ಅವರು (ಬಿಜೆಪಿ ಸರ್ಕಾರ ಆಡಳಿತದಲ್ಲಿ) ನಗರಸಭೆಗೆ ಹೆಚ್ಚುವರಿಯಾಗಿ 774 ಮನೆ ನಿರ್ಮಾಣಕ್ಕೆ ಮಂಜೂರಾತಿ ತಂದಿದ್ದರು. ಸ್ವಂತ ನಿವೇಶನ ಹೊಂದಿದ್ದ ಫಲಾನುಭವಿ ಮನೆ ನಿರ್ಮಿಸಿಕೊಳ್ಳಲು ಸಾಮಾನ್ಯ ವರ್ಗಕ್ಕೆ ಸೇರಿದ ವ್ಯಕ್ತಿ ₹2.70ಲಕ್ಷ ಹಾಗೂ ಪರಿಶಿಷ್ಟ ಸಮುದಾಯದವರಿಗೆ ₹3ಲಕ್ಷ ಅನುದಾನ. ಒಟ್ಟು ₹21.15ಕೋಟಿ ವೆಚ್ಚದ ವಸತಿ ಯೋಜನೆ ಇದಾಗಿದೆ.

ನಗರಸಭೆಯ ಆಯ್ಕೆ ಪಟ್ಟಿಯಂತೆ ಸಾಮಾನ್ಯ ವರ್ಗಕ್ಕೆ 587 ಹಾಗೂ ಪರಿಶಿಷ್ಟರಿಗೆ 161 ಹಂಚಿಕೆಯಾಗಿದ್ದವು. ಅದರಲ್ಲಿ ಪೌರಾಡಳಿತ ಕಚೇರಿಯಿಂದ ತಾಂತ್ರಿಕ ಕಾರಣದಿಂದ 26 ಫಲಾನುಭವಿಗಳಿಗೆ ಕಾರ್ಯಾದೇಶ (ವರ್ಕ್ ಅರ್ಡರ್) ಬಂದಿಲ್ಲ ಎನ್ನುತ್ತಾರೆ ನಗರಸಭೆಯ ಆಶ್ರಯ ಸಮಿತಿ ಅಧ್ಯಕ್ಷ ವಸಂತ ಸುರಪುರಕರ್.

ವಾಜಪೇಯಿ ವಸತಿ ಯೋಜನೆಯ ಅಡಿಯಲ್ಲಿ 587 ಫಲಾನುಭವಿಗಳ ಪೈಕಿ 367 ಫಲಾನುಭವಿಗಳು ಹಾಗೂ ಅಂಬೇಡ್ಕರ ವಸತಿ ಯೋಜನೆ ಅಡಿಯಲ್ಲಿ 161 ಫಲಾನುಭವಿಗಳ ಪೈಕಿ 141 ಫಲಾನುವಿಗಳು ವಿವಿಧ ಹಂತದಲ್ಲಿ ಮನೆ ನಿರ್ಮಾಣ ಕಟ್ಟಡ ಕಾರ್ಯ ನಡೆದಿದೆ. ಆಯ್ಕೆಯಾದ ಪಟ್ಟಿಯಂತೆ ಇನ್ನು ಯಾರು ಮನೆ ನಿರ್ಮಿಸಿಕೊಂಡಿಲ್ಲ ಅಂತಹ ಫಲಾನುಭವಿಗಳ ಖುದ್ದಾಗಿ ಭೇಟಿ ನೀಡಿ ಮನೆ ನಿರ್ಮಿಸಲು ಸೂಚಿಸಿದೆ. ಅಲ್ಲದೆ ಎರಡು ನೋಟಿಸ್‌ ಕೂಡಾ ಜಾರಿ ಮಾಡಲಾಗಿದೆ ಎನ್ನುತ್ತಾರೆ ಪೌರಾಯುಕ್ತ ರಮೇಶ ಬಡಿಗೇರ.

ಸುರಪುರ ನಗರಸಭೆ ಹಾಗೂ ಕಕ್ಕೇರಿ ಪುರಸಭೆಗೆ ಅಂದಿನ ಸಚಿವ ರಾಜೂಗೌಡ ಅವರು 1050 ಹೆಚ್ಚುವರಿ ಮನೆ ಮಂಜೂರಾತಿ ಮಾಡಿಸಿದ್ದರು. ಆದರೆ ಸಮರ್ಪಕವಾಗಿ ಯೋಜನೆ ಅನುಷ್ಠಾನಗೊಳಿಸದ ಕಾರಣ ಅನುದಾನ ಹಿಂಪಡೆದುಕೊಂಡರು. ಜಿಲ್ಲೆಯಲ್ಲಿಯೇ ನಮ್ಮ ನಗರಸಭೆಯು ವಸತಿ ಯೋಜನೆಯನ್ನು ಅನುಷ್ಠಾನಗೊಳಿಸಿದ ಹೆಮ್ಮೆ ನಮಗಿದೆ ಎನ್ನುತ್ತಾರೆ ನಗರಸಭೆ ಆಶ್ರಯ ಸಮಿತಿ ಅಧ್ಯಕ್ಷ ವಸಂತ ಸುರಪುರಕರ್.

ಅಲೆಮಾರಿ ಸಮುದಾಯದವರಿಗೆ ಹಕ್ಕುಪತ್ರ 

ನಗರಸಭೆಯ ವ್ಯಾಪ್ತಿಯ ಹಳಿಸಗರದ ಮಲ್ಲಯ್ಯ ಗುಡ್ಡದ ಸರ್ವೆ ನಂಬರ್‌ 120ರಲ್ಲಿ 2 ಎಕರೆ ಜಮೀನಿನಲ್ಲಿ ಅಲೆಮಾರಿ ಸಮುದಾಯದ 45 ಫಲಾನುವಿಗಳಿಗೆ ಈಗಾಗಲೇ ಜಿಲ್ಲಾ ಉಸ್ತುವಾರಿ ಸಚಿವ ಶರಣಬಸಪ್ಪ ದರ್ಶನಾಪುರ ಅವರು ಹಕ್ಕುಪತ್ರ ವಿತರಣೆ ಮಾಡಿದ್ದಾರೆ. ಇನ್ನೂ 20 ಫಲಾನುಭವಿಗಳಿಗೆ ಹಕ್ಕುಪತ್ರ ತ್ವರಿತವಾಗಿ ನೀಡಲಾಗುವುದು. ನಿವೇಶನ ಪ್ರದೇಶದಲ್ಲಿ ಅಗತ್ಯ ಮೂಲ ಸೌಲಭ್ಯ ಒದಗಿಸುವ ₹4.50ಕೋಟಿ ವೆಚ್ಚದ ಕಾಮಗಾರಿ ಭರದಿಂದ ಸಾಗಿದೆ ಎಂದು ನಗರ ಆಶ್ರಯ ಸಮಿತಿ ಅಧ್ಯಕ್ಷ ವಸಂತ ಸುರಪುರಕರ್ ತಿಳಿಸಿದ್ದಾರೆ