ಯಾದಗಿರಿ: ಏರಿಳಿತ ಕಂಡ ತರಕಾರಿ ದರ

ಟೊಮೆಟೊ, ದೊಣ್ಣೆಮೆಣಸಿನಕಾಯಿ, ಗೋಬಿ, ಸೌತೆಕಾಯಿ ದರ ಕಳೆದ ವಾರಕ್ಕಿಂತ ₹10ರಿಂದ ₹20 ಹೆಚ್ಚಳವಾಗಿದೆ. ಆದರೆ, ಒಂದೂವರೆ ತಿಂಗಳಿಂದ ಹಿರಿತನ ಮೆರೆದಿದ್ದ ಬದನೆಕಾಯಿ ದರ ₹20 ದರ ಇಳಿಕೆಯಾಗಿ ಕೆ.ಜಿಗೆ ₹80 ಮಾರಾಟವಾಗುತ್ತಿದೆ. ಕಳೆದ ವಾರದಿಂದಲೂ ಬೀನ್ಸ್‌ ಬೆಲೆ ₹120 ಇತ್ತು. ಈಗಲೂ ಅದೇ ದರ ಕಾಯ್ದುಕೊಂಡಿದೆ.

ಎರಡು ವಾರಗಳಿಂದ ಈರುಳ್ಳಿ ಬೆಲೆ ಏರಿಕೆ ಕಂಡು ಮತ್ತಷ್ಟು ಹೆಚ್ಚಳವಾಗುವ ಮುನ್ಸೂಚನೆ ನೀಡಿತ್ತು. ಆದರೆ, ಕಳೆದ ವಾರದಂತೆ ಈ ವಾರವೂ ₹40 ಕೆ.ಜಿಗೆ ಮಾರಾಟವಾಗುತ್ತಿದೆ. ಹಾಗಲಕಾಯಿ ಕಳೆದ ವಾರ ದರ ₹60 ಇತ್ತು. ಈವಾರ ₹20 ಹೆಚ್ಚಳವಾಗಿ ₹80ಕ್ಕೆ ಏರಿಕೆಯಾಗಿದೆ. ಚವಳೆಕಾಯಿ ಕಳೆದ ವಾರಕ್ಕಿಂತ ₹20 ದರ ಹೆಚ್ಚಳವಾಗಿದೆ. ಮೂಲಂಗಿ, ಮೆಣಸಿನಕಾಯಿ,ಸೋರೆಕಾಯಿ,ಬಿಟ್ ರೂಟ್,ಹೀರೆಕಾಯಿ, ಬೆಂಡೆಕಾಯಿ, ತೊಂಡೆಕಾಯಿ,ಕ್ಯಾಬೇಜ್ ಕಳೆದ ವಾರದಂತೆ ಯಥಾಸ್ಥಿತಿ ದರ ಮುಂದುವರೆದಿದೆ. ₹10ಗೆ ನಾಲ್ಕು ನಿಂಬೆ ಹಣ್ಣು ಮಾರಾಟವಾಗುತ್ತಿದೆ.ಕೆ.ಜಿ ಶುಂಠಿಗೆ ₹160 ದರವಿದೆ.

ಸೊಪ್ಪುಗಳ ದರ ಹೀಗಿದೆ:ಮಾರುಕಟ್ಟೆಗೆ ಸೊಪ್ಪುಗಳ ಆವಕವಿದ್ದರೂ ದರ ಮತ್ತು ಕಟ್ಟುಗಳಲ್ಲಿ ವ್ಯತ್ಯಾಸವಾಗಿದೆ.ಪಾಲಕ್ ಸೊಪ್ಪು ₹20ಕ್ಕೆ 3 ಕಟ್ಟು,ಸಬ್ಬಸಿಗೆ ₹10ಗೆ ಒಂದು ಕಟ್ಟು,ಮೆಂತೆ ಸೊಪ್ಪು ₹25ಗೆ ಒಂದು ಕಟ್ಟು,ರಾಜಗಿರಿ ಸೊಪ್ಪು₹20ಗೆ ಮೂರು ಕಟ್ಟು,ಪುಂಡಿಪಲ್ಯೆ ₹20ಗೆ ಮೂರು ಕಟ್ಟು ಮಾರಾಟವಾಗುತ್ತಿದೆ.ಮೆಂತೆ ಸೊಪ್ಪು ಕಳೆದ ವಾರ ₹30ಗೆ ಒಂದರಂತೆ ಮಾರಾಟವಾಗುತ್ತಿತ್ತು.

ಕೋತಂಬರಿ ಸೊಪ್ಪು ದರ ಹೆಚ್ಚಳ: ಕಳೆದ ತಿಂಗಳಿನಿಂದಲೂ ಕೋತಂಬರಿ ಸೊಪ್ಪು ದರ ಏರಿಕೆಯಾಗುತ್ತಲಿದೆ. ₹30ಗೆ ಒಂದು ಕಟ್ಟು ತಿಂಗಳ ಹಿಂದೆ ಮಾರಾಟವಾಗುತ್ತಿತ್ತು. ಆದರೆ, ಈ ವಾರ ₹60ಗೆ ಒಂದು ಮಾರಾಟವಾಗುತ್ತಿದ್ದು, ಬೇಡಿಕೆ ಜೊತೆಗೆ ದರವೂ ಹೆಚ್ಚಳವಾಗಿದೆ ಎನ್ನುತ್ತಾರೆ ತರಕಾರಿ ವ್ಯಾಪಾರಿ ಮಹಮದ್‌ ಗೌಸ್‌. ಪುದೀನಾ ಬೆಲೆಯೂ ಏರಿಕೆಯಾಗಿದ್ದು,₹40ಗೆ ಒಂದು ಕಟ್ಟು ಇದೆ.

₹200ಗೆ ನುಗ್ಗೆಕಾಯಿ ಬೆಲೆ ಹೆಚ್ಚಳ: ನುಗ್ಗೆಕಾಯಿ ಬೆಲೆ ಗಗನಕ್ಕೆ ಏರಿಕೆಯಾಗಿದೆ. ₹200 ಕೆ.ಜಿಗೆ ಮಾರಾಟವಾಗುತ್ತಿದೆ. ಮಾರುಕಟ್ಟೆಗೆ ಹೆಚ್ಚಿನ ಆವಕ ಬಾರದಿರುವುದು ಬೆಲೆ ಏರಿಕೆಗೆ ಕಾರಣವಾಗಿದೆ ಎನ್ನುತ್ತಾರೆ ತರಕಾರಿ ವ್ಯಾಪಾರಿಗಳು.