ಕೊಳೆಗೇರಿ ಸೃಷ್ಟಿಸುವ ಕಾರಿಡಾರ್ ಯೋಜನೆಗಳು!

7
ಅಧ್ಯಯನ ಶಿಬಿರದಲ್ಲಿ ಸ್ಲಂ ಜನಾಂದೋಲನ ರಾಜ್ಯ ಸಂಚಾಲಕ ಎ.ನರಸಿಂಹಮೂರ್ತಿ ಅಭಿಮತ

ಕೊಳೆಗೇರಿ ಸೃಷ್ಟಿಸುವ ಕಾರಿಡಾರ್ ಯೋಜನೆಗಳು!

Published:
Updated:
Deccan Herald

ಯಾದಗಿರಿ: ‘ಸರ್ಕಾರಗಳು ಕೈಗೊಳ್ಳುತ್ತಿರುವ ಕಾರಿಡಾರ್‌ನಂತಹ ಬೃಹತ್‌ ಯೋಜನೆಗಳಿಂದ ನಗರ ಪ್ರದೇಶಗಳಲ್ಲಿ ಕೊಳೆಗೇರಿಗಳು ಉದ್ಭವಿಸಲು ಕಾರಣವಾಗಿದೆ’ ಎಂದು ಸ್ಲಂ ಜನಾಂದೋಲನ ರಾಜ್ಯ ಸಂಚಾಲಕ ಎ.ನರಸಿಂಹಮೂರ್ತಿ ಹೇಳಿದರು.

ನಗರದಲ್ಲಿ ಭಾನುವಾರ ಸ್ಲಂ ಜನಾಂದೋಲನ, ಸಾವಿತ್ರಿ ಬಾಫುಲೆ ಮಹಿಳಾ ಸಂಘಟನೆಗಳು ನಗರಾಭಿವೃದ್ಧಿ ಯೋಜನೆಗಳು ಮತ್ತು ವಿವಿಧ ಸರ್ಕಾರದ ವಸತಿ ಯೋಜನೆಗಳು ಹಾಗೂ ಸಂಘಟನೆಗಳ ಬಲಿಷ್ಠತೆಗಾಗಿ ಕಾರ್ಯಕರ್ತರಿಗೆ ಹಮ್ಮಿಕೊಂಡಿದ್ದ ವಿಭಾಗಮಟ್ಟದ ಅಧ್ಯಯನ ಶಿಬಿರದಲ್ಲಿ ‘ನಗರಾಭಿವೃದ್ಧಿ ಯೋಜನೆಗಳು’ ವಿಷಯ ಕುರಿತು ಅವರು ಮಾತನಾಡಿದರು.

‘ಬೃಹತ್‌ ನಗರಗಳಿಗೆ ಸಂಪರ್ಕ ಕಲ್ಪಿಸುವ ಕಾರಿಡಾರ್‌ ಯೋಜನೆಗಳಿಗಾಗಿಯೇ ಸರ್ಕಾರಗಳು ದೇಶದಲ್ಲಿ ಒಟ್ಟು 1.50 ಲಕ್ಷ ಹೆಕ್ಟೇರ್‌ ವ್ಯವಸಾಯ ಯೋಗ್ಯ ಭೂಮಿಯನ್ನು ಅಭಿವೃದ್ಧಿ ಹೆಸರಲ್ಲಿ ವಶಪಡಿಸಿಕೊಂಡಿವೆ. ಇಷ್ಟು ಪ್ರಮಾಣದ ಭೂಮಿಯಲ್ಲಿ ವ್ಯವಸಾಯ ಮಾಡುತ್ತಾ ಬದುಕಿದ್ದ ರೈತ ಕುಟುಂಬಗಳು ಪುಡಿಗಾಸು ಪರಿಹಾರ ಪಡೆದು ನಗರಗಳತ್ತ ವಲಸೆ ಹೋಗಿವೆ. ಹಾಗಾಗಿ, ಕೊಳೆಗೇರಿಗಳು ಸೃಷ್ಟಿಯಾಗುತ್ತಿವೆ’ ಎಂದರು.

‘ಪ್ರಧಾನಮಂತ್ರಿ ನರೇಂದ್ರ ಮೋದಿ ಅವರು ನಗರಾಭಿವೃದ್ಧಿ ಒಂದು ಅವಕಾಶ ಎಂಬುದಾಗಿ ಘೋಷಿಸುತ್ತಿದ್ದಾರೆ. ಆದರೆ, ಈ ಅವಕಾಶ ಯಾರಿಗೆ ಸಿಗುತ್ತಿದೆ? ಎಂಬುದನ್ನು ಅವರು ವಿವೇಚಿಸಿಲ್ಲ. ನಗರಗಳಲ್ಲಿ ಶೇ 33ರಷ್ಟು ಬಡವರು ಇದ್ದಾರೆ ಎಂಬುದಾಗಿ ಜಿಲ್ಲಾ ಮಾನವ ಅಭಿವೃದ್ಧಿ ಸೂಚ್ಯಂಕ ತಿಳಿಸುತ್ತದೆ. ಅಂತಹ ಬಡವರಿಗೆ ನಗರಾಭಿವೃದ್ಧಿ ಅವಕಾಶಗಳು ಸಿಗುತ್ತಿವೆಯೇ? ಅವುಗಳೇನಿದ್ದರೂ ಶ್ರೀಮಂತರಿಗೆ, ಬಂಡವಾಳ ಶಾಹಿಗಳಿಗೆ ಮಾತ್ರ ಸಿಗುತ್ತಿವೆ ಎಂಬ ಕಠೋರ ಸತ್ಯ ನರೇಂದ್ರ ಮೋದಿಯವರಿಗೆ ತಿಳಿಯುತ್ತಿಲ್ಲ ಎಂಬುದೇ ದುರಂತ’ ಎಂದು ವಿಷಾದಿಸಿದರು.

‘ನಗರಾಭಿವೃದ್ಧಿಯ ಭಾಗವಾಗಿ ಈಗ ‘ಸ್ಮಾರ್ಟ್‌ ಸಿಟಿ’ ಯೋಜನೆ ಜಾರಿಯಾಗಿದೆ. ‘ಸ್ಲಂ ಫ್ರೀ ಸಿಟಿ’ ಆಗಬೇಕು ಎಂಬುದಾಗಿ ನಾಯಕರು ವೇದಿಕೆಗಳಲ್ಲಿ ಬೊಬ್ಬೆ ಹೊಡೆಯುತ್ತಿದ್ದಾರೆ. ಆದರೆ, ಯಾರೊಬ್ಬರೂ ಬಡತನ ಫ್ರೀ ಸಿಟಿ ಆಗಬೇಕು ಎಂದು ಎಲ್ಲೂ ಚಕಾರ ಎತ್ತುತ್ತಿಲ್ಲ. ‘ಸ್ಮಾರ್ಟ್ ಸಿಟಿ’ ಎಂಬುದು ಪ್ರತಿಯೊಬ್ಬ ನಾಗರಿಕರನ್ನು ತೆರಿಗೆ ಪಾವತಿ ವ್ಯಾಪ್ತಿಗೆ ಒಳಪಡಿಸುವುದೇ ಈ ಯೋಜನೆಯ ಪ್ರಮುಖ ಉದ್ದೇಶವಾಗಿದೆ ಎಂಬುದು ಜನರಿಗೆ ತಿಳಿದಿಲ್ಲ’ ಎಂದು ಎಚ್ಚರಿಸಿದರು.

‘ಜನ ಕಲ್ಯಾಣಕ್ಕಾಗಿಯೇ ದೇಶದಲ್ಲಿ ಸ್ಥಳೀಯ ಸಂಸ್ಥೆಗಳನ್ನು ಅಸ್ತಿತ್ವಕ್ಕೆ ತರಲಾಗಿದೆ. ಕುಡಿಯುವ ನೀರು, ನೈರ್ಮಲ್ಯ, ಸೂರು ನೀಡಿ ಜನರ ಸೇವೆ ಒದಗಿಸುವುದನ್ನು ಅವು ಮರೆತಿವೆ. ಜನರ ಕಲ್ಯಾಣ ಮಾಡುವ ಬದಲು ಗುತ್ತಿಗೆದಾರರ, ರಾಜಕಾರಣಿಗಳ ಜೇಬು ತುಂಬಿಸುವ ಎಟಿಎಂಗಳಾಗಿ ಪರಿವರ್ತಿತಗೊಂಡಿವೆ’ ಎಂಬುದಾಗಿ ಗಂಭೀರ ಆರೋಪ ಮಾಡಿದರು.

‘ಎಲ್ಲರನ್ನು ಒಳಗೊಂಡಂತೆ ಅಭಿವೃದ್ಧಿ ಎಂಬುದಾಗಿ ಪ್ರಧಾನ ಮಂತ್ರಿ ಹೇಳುತ್ತಾರೆ. ಆದರೆ, ಬಡಜನರನ್ನು ನಿಯಂತ್ರಿತ ವ್ಯವಸ್ಥೆಗೆ ಒಳಪಪಡಿಸುವಂತಹ ಯೋಜನೆಗಳನ್ನು ಜಾರಿಗೊಳಿಸುತ್ತಿದ್ದಾರೆ. ಆರ್ಥಿಕ– ಸಾಮಾಜಿಕ ಸ್ಥರಗಳಲ್ಲಿ ಅಂತರ ಹೆಚ್ಚುತ್ತಲೇ ಇದೆ. ಸ್ಮಾರ್ಟ್ ಸಿಟಿಯನ್ನು ಕೇವಲ ಮೇಲ್ವರ್ಗದ ಜನರು ಅನುಭವಿಸುತ್ತಾರೆ. ಅಂತಹ ವರ್ಗ ದೇಶದಲ್ಲಿ ಕೇವಲ ಒಂದು ಭಾಗ ಮಾತ್ರ ಇದೆ. ಈ ಒಂದುಭಾಗದ ಜನರ ಸುಖಕ್ಕಾಗಿ ಮುಕ್ಕಾಲು ಭಾಗ ಇರುವ ಬಡಜನರು ತೆರಿಗೆ ಪಾವತಿಸುಂತಹ ಅವೈಜ್ಞಾನಿಕ ಯೋಜನೆಗಳು ಜಾರಿಗೆ ತರಲಾಗಿದೆ. ಅಂತಹ ಯೋಜನೆಗಳ ಬಗ್ಗೆ ಸ್ಲಂ ಹೋರಾಟಗಾರರು ಅಧ್ಯಯನ ಮಾಡಬೇಕು. ಅವುಗಳಿಂದ ಬಡವರಿಗೆ ಎಷ್ಟು ಅನುಕೂಲ ಎಂಬ ಬಗ್ಗೆ ಜನರನ್ನು ಎಚ್ಚರಿಸಬೇಕು’ ಎಂದು ಹೇಳಿದರು.

ನಗರಸಭೆ ವ್ಯವಸ್ಥಾಪಕ ಎಚ್‌.ಮಲ್ಲಿಕಾರ್ಜುನ ಮಾತನಾಡಿ,‘ ನಗರಸಭೆ ಹಲವು ವಸತಿ ಯೋಜನೆಗಳಲ್ಲಿ ಅರ್ಹರಿಗೆ ಸೂರು ಕಲ್ಪಿಸುತ್ತಿದ್ದು, ಸೂರು ವಂಚಿತರು ನಗರಸಭೆಗಳಲ್ಲಿ ತಮ್ಮ ಹಕ್ಕು ಚಲಾಯಿಸಿ ಸೂರು ಪಡೆದುಕೊಳ್ಳಬೇಕು’ ಎಂದು ಹೇಳಿದರು.

ಕರ್ನಾಟಕ ಕೊಳೆಗೇರಿ ಮಂಡಳಿ ಎಂಜಿನಿಯರ್ ಎಂ.ಎ. ಖಯ್ಯುಮ್, ನಗರಸಭೆ ಸಮುದಾಯ ಸಂಘಟನೆ ಅಧಿಕಾರಿ ಬಸಪ್ಪ ಎನ್‌.ತಳವಾಡಿ, ರಾಯಚೂರು ಜಿಲ್ಲಾ ಬಿಎಸ್‌ಫ್ ಅಧ್ಯಕ್ಷ ಎಂ.ಆರ್.ಬೇರಿ, ಬಸವರಾಜ್ ರಾವೂರ, ಸ್ಲಂ ಜನಾಂದೋಲನ ವಿಭಾಗೀಯ ಸಂಚಾಲಕ ಜನಾರ್ದನ ಅಳ್ಳಿಬಿಂಚಿ, ಹಣಮಂತ ಶಹಾಪೂರಕರ್, ಜಿಲ್ಲಾ ಸಂಚಾಲಕಿ ರೇಣುಕಾ ಸರಡಗಿ, ಗಣೇಶ ಕಾಂಬಳೆ ಇದ್ದರು.

 

Tags: 

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !