ಯಾದಗಿರಿ: ಭತ್ತ ಕಟಾವ್‌ ಯಂತ್ರಕ್ಕೆ ದುಬಾರಿ ಬಾಡಿಗೆ

ಮಳೆ ಕೊರತೆ ನಡುವೆಯೇ ಜೂನ್‌, ಜುಲೈ ತಿಂಗಳಲ್ಲಿ ಭೀಮಾ ನದಿ ತೀರದಲ್ಲಿ ಭತ್ತ ನಾಟಿ ಮಾಡಲಾಗಿತ್ತು. ಆನಂತರ ಸನ್ನತಿ, ಯಾದಗಿರಿ–ಗುರುಣಸಗಿ, ಗುಡೂರು–ಜೋಳದಡಗಿ ಬ್ರಿಜ್‌ ಕಂ ಬ್ಯಾರೇಜ್‌ ಮೂಲಕ ನೀರು ಹರಿಸಲಾಗಿತ್ತು.

ಈಗಾಗಲೇ ಯಾದಗಿರಿ ಸಮೀಪದ ಭೀಮಾನದಿ ತಟದ ಸುತ್ತಲಿನ ಜಮೀನುಗಳಲ್ಲಿ ಕಳೆದ ಒಂದು ವಾರದಿಂದ ಭತ್ತದ ಕಟಾವು ಕಾರ್ಯ ಭರದಿಂದ ಸಾಗಿದೆ. ಇನ್ನೂ ಕೆಲಕಡೆಗಳಲ್ಲಿ ಭತ್ತದ ಬೆಳೆಯ ತೆನೆ ಹಸಿ ಇರುವ ಕಾರಣಕ್ಕೆ ಒಂದು ವಾರ ನಂತರ ಆರಂಭಿಸಲಿದ್ದಾರೆ. ಮಂಗಳವಾರ ರಾತ್ರಿ ಸುರಿದ ಮಳೆಗೆ ಭತ್ತದ ಕಟಾವು ಸ್ಥಗಿತವಾಗಿದೆ. ಕಟಾವು ಯಂತ್ರಗಳು ನಿಂತಿವೆ.

ಯಂತ್ರದ ಬಾಡಿಗೆ ದುಬಾರಿ: ಮೊದಲೇ ಬರದಿಂದ ತತ್ತರಿಸಿದ ರೈತರಿಗೆ ಇದೀಗ ಯಂತ್ರಗಳ ಬಾಡಿಗೆ ದುಬಾರಿಯಾಗಿದೆ. ಭತ್ತದ ಕಟಾವುಗೆ ಪ್ರತಿ ಗಂಟೆಗೆ ₹ 2,500ರಿಂದ 3,000 ತನಕ ಏರಿಕೆಯಾಗಿದೆ. ಅದರಲ್ಲೂ ಪೈಪೋಟಿ ಯಾರು ಹೆಚ್ಚಿಗೆ ಹಣ ಕೊಡುತ್ತಾರೋ, ಅವರಿಗೆ ಆದ್ಯತೆ ನೀಡಲಾಗುತ್ತಿದೆ. ಉಪಾಹಾರ, ಊಟ, ಚಹಾ ಇತ್ಯಾದಿ ವ್ಯವಸ್ಥೆಗೊಳಿಸುವ ರೈತರಲ್ಲಿಗೆ, ಯಂತ್ರದ ಮಾಲೀಕರು ಹಾಗೂ ಮಧ್ಯವರ್ತಿಗಳು ಅಲ್ಲಿಗೆ ಯಂತ್ರಗಳನ್ನು ಕಳುಹಿಸುತ್ತಾರೆ.

ಈಗಾಗಲೇ ಕಟಾವು ಯಂತ್ರಗಳು ದೂರದ ಗಂಗಾವತಿ, ಸಿಂಧನೂರು, ದಾವಣಗೆರೆ, ಶಹಾಪುರ ಬಳಿಯ ಹುಲಕಲ್‌ನಿಂದ ಬಂದಿವೆ. ಈ ಭಾಗದಲ್ಲಿ ಭೀಮಾ ಹಾಗೂ ಕೃಷ್ಣಾ ನದಿ ಪಾತ್ರದ ಸುತ್ತಲಿನ ಸಾವಿರಾರು ಹೆಕ್ಟೇರ್ ಪ್ರದೇಶಗಳಲ್ಲಿ ಭತ್ತ ಬೆಳೆಯುವುರಿಂದ ಯಂತ್ರದ ಅವಶ್ಯಕತೆಯಿದೆ. ಕಳೆದ ಎರಡು ವರ್ಷಗಳ ಹಿಂದೆ ಗುರುಸಣಿಗಿ ಕ್ರಾಸ್ ಸಮೀಪದಲ್ಲಿ ಯಂತ್ರ ನಿಲ್ಲುಗಡೆಗೆ ಹಾಗೂ ದುರಸ್ತಿಗೆ ಬೃಹತ್ ಗ್ಯಾರೇಜ್ ನಿರ್ಮಾಣವಾಗಿದೆ.

ಕಟಾವಿಗೆ ಮಳೆರಾಯ ಅಡ್ಡಿ: ಭತ್ತದ ಕಟಾವುಗೆ ಮಳೆ ಅಡ್ಡಿಪಡಿಸಿದೆ. ಇನ್ನೂ ಆರಂಭಗೊಳ್ಳಲಿಕ್ಕೆ 3-4 ದಿನ ಆಗಬಹುದು ಎಂದು ಯಂತ್ರಗಳು ನಿಲ್ಲಿಸಲಾಗಿದೆ. ಸಾಲ ಶೂಲ ಮಾಡಿ ಎಕರೆಗೆ ₹30 ರಿಂದ ₹40 ಸಾವಿರ ಹಣ ಖರ್ಚು ಮಾಡಿ ಭತ್ತ ಬಿತ್ತನೆ ಮಾಡಲಾಗಿತ್ತು.