ಸುರಪುರ; ಕಡಲೆಗಿಡ ವ್ಯಾಪಾರ ಜೋರು

8 ಗಂಟೆಯೊಳಗೆ ವ್ಯಾಪಾರ ಮುಗಿಯುತ್ತದೆ. ನಂತರ ಬೀದಿ ಬದಿ ವ್ಯಾಪಾರಿಗಳು ಕಡಲೆಗಿಡದ ವ್ಯಾಪಾರ ಸುರುವಿಟ್ಟುಕೊಳ್ಳುತ್ತಾರೆ. ಈ ದೃಶ್ಯ ನೋಡುವುದೇ ಚೆಂದ.

ದಿನಾಲು 4 ಟನ್ ಕಡಲೆಗಿಡ ಬಿಕರಿಯಾಗುತ್ತದೆ. ಬೀದಿ ಬದಿ ವ್ಯಾಪಾರಿಗಳಿಗೂ ಕಡಲೆಗಿಡ ಒಳ್ಳೆಯ ಆದಾಯ ಕೊಡುತ್ತಿದೆ. ಕಡಲೆಕಾಯಿ ತಿನ್ನುವವರ ಸಂಖ್ಯೆಯೂ ಈ ಭಾಗದಲ್ಲಿ ಅಧಿಕವಾಗಿದೆ. ದೀಪಾವಳಿ ಅಮಾವಾಸ್ಯೆಯ ನಂತರ 2 ರಿಂದ ಎರಡುವರೆ ತಿಂಗಳು ಇದರ ಸೀಸನ್. ಈ ಸಮಯದಲ್ಲಿ ಬೇರೆ ಹಣ್ಣುಗಳ ಆವಕ ಕಡಿಮೆ ಇರುವುದರಿಂದ ಬೀದಿ ಬದಿ ವ್ಯಾಪಾರಿಗಳು ಕಡಲೆಗಿಡ ಮಾರಾಟವನ್ನೆ ನೆಚ್ಚಿಕೊಂಡಿದ್ದಾರೆ.

ನಗರದ ಬೋವಿಗಲ್ಲಿ ಮತ್ತು ಡೊಣ್ಣಿಗೇರಿಯ ಹಲವು ಜನರು ಹಣ್ಣು ಮತ್ತು ಕಡಲೆಗಿಡ ಮಾರಾಟಕ್ಕೆ ಪ್ರಸಿದ್ಧರು. ತಾಲ್ಲೂಕಿನ ದೇವಪುರ, ನಗನೂರ ಮತ್ತು ಲಿಂಗಸುಗೂರಿನ ಕೆಲ ಗ್ರಾಮಗಳಲ್ಲಿ ಕಡಲೆ ಗಿಡ ಬೆಳೆಯಲಾಗುತ್ತಿದೆ.

ಸಗಟು ಮಾರಾಟಗಾರರು ಎಕರೆಗೆ ಇಂತಿಷ್ಟು ಎಂದು ಕಡಲೆಗಿಡ ಬೆಳೆದ ಜಮೀನನ್ನು ಗುತ್ತಿಗೆ ಮುಗಿಸುತ್ತಾರೆ. ದಿನಾಲೂ ಸಂಜೆ ಹೊಲಕ್ಕೆ ತೆರಳಿ ಕಡಲೆಗಿಡ ಹರಿದು ಟಾಟಾಎಸ್ ಗಾಡಿಯಲ್ಲಿ ತುಂಬಿಕೊಂಡು ನಗರಕ್ಕೆ ಬೆಳಗಿನ ಜಾವ ಬರುತ್ತಾರೆ. ದಿನಾಲೂ ಕನಿಷ್ಠ 2 ಗಾಡಿಗಳು (4 ಟನ್ ಕಡಲೆ ಗಿಡ) ಹರಿದುತರುತ್ತಾರೆ.

ಸಗಟು ವ್ಯಾಪಾರಿಗಳು 50 ರಿಂದ 60 ದೊಡ್ಡ ಗಂಟುಗಳನ್ನು ಮಾಡಿ ಒಂದು ಗಾಡಿಯಲ್ಲಿ ತುಂಬುತ್ತಾರೆ. ದಿನಾಲೂ 100 ರಿಂದ 120 ದೊಡ್ಡ ಗಂಟುಗಳು ಬರುತ್ತವೆ. ಬೀದಿ ಬದಿ ವ್ಯಾಪಾರಿಗಳು ದೊಡ್ಡ ಗಂಟಿಗೆ ಇಂತಿಷ್ಟು ಎಂದು ಮುಗಿಸಿ ಖರೀದಿಸುತ್ತಾರೆ. ಕೆಲವರು ಸ್ಥಳದಲ್ಲೇ ದುಡ್ಡು ಕೊಟ್ಟರೆ ಇನ್ನು ಕೆಲವರು ಸಂಜೆ ಹಣ ಪಾವತಿಸುವ ರೂಢಿ ಇದೆ.

ಸಗಟು ವ್ಯಾಪಾರಿಗಳು ಒಂದು ಎಕರೆಗೆ ಇಳುವರಿ ನೋಡಿ ₹20 ರಿಂದ 30 ಸಾವಿರದವರೆಗೆ ಗುತ್ತಿಗೆ ಪಡೆದುಕೊಳ್ಳುತ್ತಾರೆ. ಒಂದು ದೊಡ್ಡ ಗಂಟಿಗೆ ₹ 500 ರಿಂದ ₹600ರ ವರೆಗೆ ಮಾರಾಟ ಮಾಡುತ್ತಾರೆ.

ಬೀದಿ ಬದಿ ವ್ಯಾಪಾರಿಗಳು ದೊಡ್ಡ ಗಂಟಿನಲ್ಲಿ ಸಣ್ಣ ಸಣ್ಣ 100 ರಿಂದ 120 ಸೂಡು ಮಾಡುತ್ತಾರೆ. ಒಂದು ಸೂಡು ₹10 ರಿಂದ 20ರ ವರೆಗೆ ಬಿಕರಿಯಾಗುತ್ತದೆ. ಸಂಜೆವರೆಗೆ ₹ 600 ರಿಂದ 800ರ ವರೆಗೆ ಲಾಭ ಮಾಡಿಕೊಳ್ಳುತ್ತಾರೆ. ಸಗಟು ವ್ಯಾಪಾರಿಗಳಿಗೂ ಈ ವ್ಯಾಪಾರ ಸಾಕಷ್ಟು ಲಾಭ ತರುತ್ತಿದೆ.

ಕೆಲವರು ಒತ್ತುವ ಬಂಡಿಯಲ್ಲಿ ಮಾರಾಟ ಮಾಡಿದರೆ, ಇನ್ನೂ ಕೆಲವರು ಬೀದಿ ಬದಿ ಕುಳಿತು ಮಾರುತ್ತಾರೆ. ಹಲವರು ಮನೆ ಮನೆಗೆ ತೆರಳಿ ವ್ಯಾಪಾರ ಮಾಡಿದರೆ ಮತ್ತೆ ಕೆಲವರು ಬಸ್‍ನಲ್ಲಿ ಹತ್ತಿ ಇಲ್ಲವೇ ಕಿಟಕಿಯಲ್ಲಿ ಪ್ರಯಾಣಿಕರಿಗೆ ಮಾರುತ್ತಾರೆ.