ಯಾದಗಿರಿ: ಜಿಲ್ಲೆಯಾದ್ಯಂತ ಗುಡುಗು, ಮಿಂಚು ಸಹಿತ ಸೋಮವಾರ ಸಂಜೆ ಮಳೆಯಾಗಿದೆ. ನಗರದಲ್ಲಿ ಬೆಳಗ್ಗೆಯಿಂದ ಮೋಡ ಮುಸುಕಿದ ವಾತಾವರದಿಂದ ಬಿಸಿಲಿನ ಪ್ರಖರತೆ ಕಡಿಮೆ ಇತ್ತು. ನಗರದಲ್ಲಿ ರಾತ್ರಿ 7.30ರಿಂದ 8 ಗಂಟೆ ತನಕ ಮಳೆ ಸುರಿಯಿತು. ಇದರಿಂದ ತಂಪಾದ ವಾತಾವರಣ ಉಂಟಾಯಿತು.
ಜಿಲ್ಲೆಯ ಶಹಾಪುರ, ಸುರಪುರ, ಗುರುಮಠಕಲ್, ಕೆಂಭಾವಿ, ಹುಣಸಗಿ, ಯರಗೋಳ, ಅಲ್ಲಿಪುರ, ವೆಂಕಟೇಶ ನಗರ, ವಡ್ನಳ್ಳಿ, ಮುದ್ನಳ ಮುಂತಾದ ಕಡೆ ಜಿಟಿ ಜಿಟಿ ಮಳೆ ಸುರಿದಿದೆ.
ಗುಡುಗು, ಮಿಂಚು ಸಹಿತ ಮಳೆ ರೈತರ ಮುಖದಲ್ಲಿ ಮಂದಹಾಸ ಮೂಡಿಸಿದೆ. ಜಿಲ್ಲೆಯ ವಿವಿಧೆಡೆ ಈಗಾಗಲೇ ಬಿತ್ತನೆಗೆ ರೈತರು ಭೂಮಿಯನ್ನು ಹಸನು ಮಾಡಿಕೊಳ್ಳುತ್ತಿದ್ದಾರೆ. ಈ ಮಳೆಯಿಂದ ಹೆಸರು ಬಿತ್ತನೆ ಅನುಕೂಲವಾಗಿದೆ. ಈ ರೀತಿ ಇನ್ನೂ ಒಂದೆರಡು ಮಳೆ ಬಂದರೆ ಬಿತ್ತನೆ ಕಾರ್ಯ ಶುರುವಾಗುತ್ತದೆ ಎನ್ನುವುದು ರೈತರ ಅಭಿಪ್ರಾಯವಾಗಿದೆ.
