ಶಿರವಾಳ: ದೇವಾಲಯಗಳ ಅಭಿವೃದ್ಧಿಗೆ ₹75 ಕೋಟಿ

‘ಕಾನೂನು, ನ್ಯಾಯ, ಮಾನವ ಹಕ್ಕುಗಳು, ಸಂಸದೀಯ ವ್ಯವಹಾರಗಳ ಶಾಸನ ರಚನೆ ಮತ್ತು ಪ್ರವಾಸೋದ್ಯಮ ಸಚಿವ ಎಚ್.ಕೆ. ಪಾಟೀಲ ಮೊದಲ ಹಂತದಲ್ಲಿ ₹15 ಕೋಟಿಗೆ ಅನುಮೋದನೆ ನೀಡಿದ್ದಾರೆ’ ಎಂದು ಜಿಲ್ಲಾ ಉಸ್ತುವಾರಿ ಸಚಿವ ಶರಣಬಸಪ್ಪ ದರ್ಶನಾಪುರ ತಿಳಿಸಿದರು.

ದಕ್ಷಿಣದ ವಾರಣಾಸಿ ಎಂದು ಕರೆಯಲ್ಪಡುವ ಪವಿತ್ರ ಕ್ಷೇತ್ರ ಶಿರವಾಳವನ್ನು ಶಾಸನಗಳಲ್ಲಿ ‘ಸಿರಿಹೊಳಲು’ ಎಂದು ಕರೆಯಲಾಗಿದೆ. ಗ್ರಾಮದಲ್ಲಿ ಸುಮಾರು 50ಕ್ಕೂ ಹೆಚ್ಚು ಪ್ರಾಚೀನ ಸ್ಮಾರಕಗಳು ಇಂದಿಗೂ ಉಳಿದುಕೊಂಡಿವೆ. ಅವುಗಳಲ್ಲಿ 34 ದೇವಾಲಯಗಳು, ಐದಕ್ಕೂ ಹೆಚ್ಚು ಬಾವಿಗಳಿವೆ. ಒಳಭಾಗದಲ್ಲಿ ರಾಮಾಯಣ, ಮಹಾಭಾರತ, ಭಾಗವತ ಮತ್ತು ಪಂಚತಂತ್ರ ಕಥನ ಶಿಲ್ಪಗಳು ಒಳಗೊಂಡಿದೆ. ಅಲ್ಲದೆ ಶಿರವಾಳದ ಏಳು ದೇವಾಲಯಗಳು ರಾಷ್ಟ್ರಕೂಟರ ಕಾಲದಲ್ಲಿ ರಚನೆಯಾಗಿವೆ’ ಎಂದು ಶಿಲಾ ಶಾಸನಗಳ ತಜ್ಞ ಡಾ.ಮೋನಪ್ಪ ಶಿರವಾಳ ಹೇಳುತ್ತಾರೆ.

ರಾಜ್ಯದ ಕಲೆ, ಸಂಸ್ಕೃತಿ ಮತ್ತು ಪರಂಪರೆ ಬಿಂಬಿಸುವ ಅಲ್ಲದೆ ಮುಂದಿನ ಯುವ ಪೀಳಿಗೆಗೆ ಸಂರಕ್ಷಿಸಿದಂತೆ ಆಗುತ್ತದೆ. ಪ್ರವಾಸಿ ತಾಣವನ್ನಾಗಿ ಅಭಿವೃದ್ಧಿಪಡಿಸುವುದರಿಂದ ಅಧಿಕ ಸಂಖ್ಯೆಯ ಪ್ರವಾಸಿಗರು ಭೇಟಿ ನೀಡುವುದರಿಂದ ಸ್ಥಳೀಯರಿಗೆ ಉದ್ಯೋಗಾವಕಾಶ ದೊರಕಲಿವೆ. ನಿರುದ್ಯೋಗ ಸಮಸ್ಯೆ ಬಗೆಹರಿಸಿದಂತೆ ಆಗುತ್ತದೆ ಎಂದು ವರ್ಷದ ಹಿಂದೆ ಪ್ರವಾಸೋದ್ಯಮ ಸಚಿವ ಎಚ್.ಕೆ.ಪಾಟೀಲ ಶಿರವಾಳ ಗ್ರಾಮಕ್ಕೆ ಭೇಟಿ ನೀಡಿದಾಗ ಮಾಜಿ ಶಾಸಕ ಗುರು ಪಾಟೀಲ ನೇತೃತ್ವದಲ್ಲಿ ಹಾಗೂ ಗ್ರಾಮಸ್ಥರು ಕೂಡಿ ಮನವಿ ಸಲ್ಲಿಸಲಾಗಿತ್ತು ಎನ್ನುತ್ತಾರೆ ಗ್ರಾಮದ ಮುಖಂಡ ಮರೆಪ್ಪ ಪ್ಯಾಟಿ.

ಪ್ರವಾಸಿ ತಾಣ ಅನುದಾನದಲ್ಲಿ ತಾರತಮ್ಯ: ತಾಲ್ಲೂಕಿನಲ್ಲಿ ಹಲವಾರು ಇತಿಹಾಸ ವೈಭವ ಸಾರುವ ಪ್ರವಾಸಿತಾಣಗಳನ್ನು ಅಭಿವೃದ್ಧಿಪಡಿಸಲು ವಿಫಲ ಅವಕಾಶವಿದೆ. ಶಿರವಾಳ ಅಭಿವೃದ್ಧಿ ಪಡಿಸಿದಂತೆ ಉಳಿದ ಪ್ರವಾಸಿ ತಾಣಗಳಿಗೆ ಅನುದಾನ ಒದಗಿಸುವಲ್ಲಿ ಸಚಿವರು ತಾರತಮ್ಯ ನೀತಿ ಅನುಸರಿದ್ದಾರೆ ಇತಿಹಾಸ ತಜ್ಞ ಭಾಸ್ಕರರಾವ ಮುಡಬೂಳ ಬೇಸರ ವ್ಯಕ್ತಪಡಿಸಿದ್ದಾರೆ.

ಅದರಲ್ಲಿ ಮುಖ್ಯವಾಗಿ ಬುದ್ದ ಮಲಗಿದ ದೃಶ್ಯ(ಸ್ಲಿಪಿಂಗ್ ಬುದ್ದ), ದಿಗ್ಗಿ ಅಗಸಿ ಕೋಟೆ, ವಿಭೂತಿಹಳ್ಳಿಯ ಕಾಲ ನಿರ್ಣಯ ಕಲ್ಲುಗಳು, ವಜ್ರ ನಿಕ್ಷೇಪ ದೊರೆತ ಬಗ್ಗೆ ಕುರುಹು ಇರುವ ತಾಲ್ಲೂಕಿನ ಕೊಳ್ಳುರ ಗ್ರಾಮದ ಕೃಷ್ಣಾ ನದಿ ತಟದ ವೃಂದಾವನ ಗಡ್ಡೆ ಹೀಗೆ ಇನ್ನೂ ಹೆಚ್ಚಿನ ಇತಿಹಾಸ ಸಾರುವ ಸ್ಮಾರಕಗಳ ಅಭಿವೃದ್ಧಿಗೆ ಅನುದಾನ ಒದಗಿಸಬೇಕಾಗಿತ್ತು ಎಂದು ಅವರು ಸಲಹೆ ನೀಡಿದ್ದಾರೆ.