ಸಿನಿಮಾ ವಿಚಾರಕ್ಕೆ ಬಂದರೆ, ಚಂದನವನದಲ್ಲಿ ನಾನಿನ್ನೂ ಹೊಸಮುಖ. ನನ್ನನ್ನು ನಾನು ಪ್ರಯೋಗಕ್ಕೆ ಒಡ್ಡಿಕೊಳ್ಳಲು ಅವಕಾಶವಿರುವ ಅವಧಿ ಇದು. ಹೀಗಾಗಿ ಇನ್ನೊಂದೆರಡು ವರ್ಷ ನಾನು ಪ್ರಯೋಗಾತ್ಮಕ ಚಿತ್ರಗಳಲ್ಲಿ ಕಾಣಿಸಿಕೊಳ್ಳಲು ಇಚ್ಛಿಸುತ್ತೇನೆ. ‘ಸುಮ್ಮನೆ ಸಿನಿಮಾಗಳನ್ನು ಮಾಡುತ್ತಿದ್ದೀಯ, ಮಾರ್ಕೆಟ್‌ ನೋಡುವುದಿಲ್ಲ’ ಎಂದು ಹಲವರು ಭಯ ಹುಟ್ಟಿಸುತ್ತಾರೆ. ಆದರೆ ನಾನು ಸೋಲು, ಗೆಲುವುಗಳ ಲೆಕ್ಕಾಚಾರವಿಡದೆ, ಬಾಕ್ಸ್‌ ಆಫೀಸ್‌ ದೂಳಿನಿಂದ ದೂರವಿದ್ದು ನಟನಾಗಿ ಈ ಕ್ಷೇತ್ರವನ್ನು ಅನುಭವಿಸುವ ಆಸೆ ಹೊತ್ತಿದ್ದೇನೆ. ಭಾಷೆಯ ಗಡಿ ಹಾಕಿಕೊಂಡಿಲ್ಲ, ಮರಾಠಿ, ತಮಿಳು ಚಿತ್ರಗಳಲ್ಲೂ ನಟಿಸಿದ್ದೇನೆ. ಆದರೆ ಕನ್ನಡಕ್ಕೆ ಆದ್ಯತೆ.
