ಹಗಲೂ ರಾತ್ರಿ ಆಲಿಯಾ ಭಟ್‌ ದುಡಿಮೆ

ಆಲಿಯಾ ಇದೀಗ ಅಭಿಶೇಕ್‌ ವರ್ಮನ್‌ ನಿರ್ದೇಶನದ ಕಳಂಕ್‌ ಚಿತ್ರದಲ್ಲಿಯೂ, ಅಯಾನ್‌ ಮುಖರ್ಜಿಯ ಬ್ರಹ್ಮಾಸ್ತ್ರ ಚಿತ್ರದಲ್ಲಿಯೂ ನಟಿಸುತ್ತಿದ್ದಾರೆ. ಎರಡೂ ಚಿತ್ರಗಳ ಚಿತ್ರೀಕರಣ ಮುಂಬೈನಲ್ಲಿ ನಡೆಯುತ್ತಿದೆ. ಕಳಂಕ್‌ಗಾಗಿ ಹಗಲಿನ ಸಮಯ ಮೀಸಲಾಗಿಟ್ಟರೆ, ರಾತ್ರಿ ಸಮಯದ ಚಿತ್ರೀಕರಣಕ್ಕಾಗಿ ಬ್ರಹ್ಮಾಸ್ತ್ರ ಚಿತ್ರೀಕರಣದ ತಂಡಕ್ಕೆ ಸಮಯ ನೀಡಿದ್ದಾರೆ. ಹೀಗಾಗಿ ಹಗಲೂ ರಾತ್ರಿಯೂ ದುಡಿಯುವ ಅನಿವಾರ್ಯ ಅವರಿಗೆ ಎದುರಾಗಿದೆ.

ಈ ನಡುವೆ ರಣಬೀರ್‌ ಜೊತೆಗೆ ಮುನಿಸಿದೆಯೇ? ಅವರಿಬ್ಬರ ಸಂಬಂಧದಲ್ಲಿಯೂ ಬಿರುಕು ಮೂಡುತ್ತಿದೆಯೇ? ಎಲ್ಲವೂ ಸರಿಯಿಲ್ಲ ಎಂಬಂಥ ಮಾತುಗಳು ಬಿ ಟೌನ್‌ನಲ್ಲಿ ಹಾರಾಡುತ್ತಿವೆ. ಕಣ್ತುಂಬಿಕೊಂಡು ಕುಳಿತಿರುವ ಆಲಿಯಾ ಪಕ್ಕ, ತನಗೇನೂ ಸಂಬಂಧವೇ ಇಲ್ಲವೆಂಬಂತೆ ಮೊಬೈಲ್‌ ಹಿಡಿದುಕೊಂಡಿರುವ ರಣಬೀರ್‌ ಚಿತ್ರ ವೈರಲ್‌ ಆಗಿದೆ. ಇವರ ಜಗಳಗಳಿಗೆ ಇಂಥವೇ ಒಂದಷ್ಟು ಫೋಟೊಗಳು ಸಾಕ್ಷಿಯಾದಂತೆ ಹರಿದಾಡುತ್ತಿವೆ. ಯಾವುದಕ್ಕೂ ಏನೂ ಪ್ರತಿಕ್ರಿಯಿಸದ ಆಲಿಯಾ, ಸದ್ಯ ಕೆಲಸದಲ್ಲಿ ಮಾತ್ರ ತಲ್ಲೀನರಾಗಿದ್ದಾರೆ.