ಚಿರುಮನೆಯಲ್ಲಿ ಚಿಂಟು ನಗು
ಸ್ಯಾಂಡಲ್‌ವುಡ್‌ ತಾರೆಯರಾದ ದಿವಂಗತ ನಟ ಚಿರು ಮತ್ತು ಮೇಘನಾ ರಾಜ್ ಕುಟುಂಬದಲ್ಲಿ ಗುರುವಾರ ಸಂಭ್ರಮ ತುಂಬಿ ತುಳುಕುತ್ತಿತ್ತು. ಜೂನಿಯರ್ ಚಿರು ಆಗಮನವಾಗಿರುವುದರಿಂದ ಮನೆಮಂದಿಯ ಮೊಗದಲ್ಲಿ ಸಂತಸದ ನಗು ಆವರಿಸಿದೆ. ಚಿರು ಮತ್ತು ಮೇಘನಾರ ಪ್ರೀತಿಯ ಪ್ರತಿರೂಪ ಮಗುವನ್ನು ತೊಟ್ಟಿಲಿಗೆ ಹಾಕುವ ಶಾಸ್ತ್ರ ಕುಟುಂಬಸ್ಥರು ಮತ್ತು ಬಂಧುಬಳಗದ ಸಮ್ಮುಖದಲ್ಲಿ ನಡೆಯಿತು.
ಮಧ್ಯಾಹ್ನ 12 ಗಂಟೆಯ ಶುಭ ಗಳಿಗೆಯಲ್ಲಿ ನಿಗದಿಯಾಗಿದ್ದ ಈ ಶಾಸ್ತ್ರಕ್ಕೆ ಬೆಳಿಗ್ಗೆಯಿಂದಲೇ ಎಲ್ಲ ತಯಾರಿ ಭರ್ಜರಿಯಾಗಿ ನಡೆದಿದ್ದವು. ಚಿರು ವಾರಸ್ಥಾರ ಮನೆಗೆ ಬಂದ ನಂತರ ಶಾಸ್ತ್ರೋಕ್ತವಾಗಿ ಮಗುವನ್ನು ತೊಟ್ಟಿಲಿಗೆ ಹಾಕುವ ಶಾಸ್ತ್ರ ಮೇಘನಾ ರಾಜ್ ತವರಿನಲ್ಲಿ ನೆರವೇರಿಸಲಾಯಿತು. ಮೇಘನಾ ಹಾಗೂ ಚಿರು ಕುಟುಂಬದವರೆಲ್ಲರೂ ಸಡಗರದಿಂದ ಭಾಗಿಯಾಗಿದ್ದರು.
ತೊಟ್ಟಿಲು ಶಾಸ್ತ್ರಕ್ಕಾಗಿ ತಯಾರಿಸಿರುವ ಬಣ್ಣಬಣ್ಣದ ಕರಕುಶಲ ತೊಟ್ಟಿಲನ್ನು ಗದಗದ ಮಹಿಳಾ ಸಂಘವೊಂದು ಚಿರು ಮಗನಿಗಾಗಿ ಉಡುಗೊರೆ ನೀಡಿತು. ಗದಗದ ವನಿತಾ ಗುತ್ತಲ್ ಈ ತೊಟ್ಟಿಲು ಮಾಡಿಸಿದ್ದು, ಇದರ ಬೆಲೆ ಸುಮಾರು ₹ 1.10 ಲಕ್ಷ. ಸುಮಾರು 4-5 ತಿಂಗಳು ಸಮಯ ವಿನಿಯೋಗಿಸಿಮಾರುತಿ ಬಡಿಗೇರ್ ಎಂಬುವವರು ಈ ತೊಟ್ಟಿಲನ್ನು ತಯಾರಿಸಿದ್ದಾರೆ. ಚಲನಚಿತ್ರ ವಾಣಿಜ್ಯ ಮಂಡಳಿಯ ಉಪಾಧ್ಯಕ್ಷ ಉಮೇಶ್ ಬಣಕಾರ್ ಮೂಲಕ ಮಹಿಳಾ ಸಂಘದ ಸದಸ್ಯರು ಈ ತೊಟ್ಟಿಲನ್ನು ಮೇಘನಾ ರಾಜ್ ಅವರಿಗೆ ತಲುಪಿಸಿದರು. ಜತೆಗೆ ಉತ್ತರ ಕರ್ನಾಟಕ ಜನಪ್ರಿಯವಾದ ಹಲವು ಬಗೆಯ ತಿನಿಸುಗಳನ್ನು ಮೇಘನಾ ಅವರಿಗೆ ಈ ಸದಸ್ಯರು ಅಕ್ಕರೆಯಿಂದ ನೀಡಿದರು.
ಜೂನಿಯರ್ ಚಿರು ಹೆಸರು ಸದ್ಯಕ್ಕೆ ಚಿಂಟು!
ದುಃಖ ಅದುಮಿಟ್ಟುಕೊಂಡೇ ನಗು ಮೊಗದಲ್ಲಿ ಮಾಧ್ಯಮಗಳ ಪ್ರತಿನಿಧಿಗಳನ್ನು ಎದುರುಗೊಂಡ ಮೇಘನಾ ರಾಜ್, ‘ಚಿರು ಕಳೆದುಕೊಂಡಿರುವ ನೋವನ್ನು ಮರೆಯೋದು ಅಸಾಧ್ಯ. ನನ್ನ ಮಗುವನ್ನು ನೋಡಿದಾಗ ಚಿರು ಕಾಣಿಸ್ತಾರೆ. ಮಗುವನ್ನು ನೋಡಿದವರೆಲ್ಲರೂ ಚಿರು ಜೆರಾಕ್ಸ್ ಕಾಪಿ ಎನ್ನುತ್ತಾರೆ. ನನಗೂ ಹಾಗೇ ಅನ್ನಿಸುತ್ತದೆ. ಮಗುವಿಗೆ ಇನ್ನೂ ಹೆಸರಿಟ್ಟಿಲ್ಲ. ಮನೆಯಲ್ಲಿ ಸದ್ಯಕ್ಕೆ ಎಲ್ಲರೂ ಚಿಂಟು ಎಂದು ಕರೆಯುತ್ತಿದ್ದೇವೆ. ಚಿಂಟು ಅಳುವುದು ಕಡಿಮೆ, ನಗೋದು ಜಾಸ್ತಿ, ಅವರಪ್ಪನ ಬುದ್ದಿಯೇ ಎನ್ನಿಸುತ್ತೆ. ನನ್ನ ಮಗುವೇ ನನ್ನ ಶಕ್ತಿ’ ಎಂದು ಮಾತಿಗಾರಂಭಿಸಿದರು.
‘ಕಷ್ಟದ ಸಮಯವನ್ನು ಎದುರಿಸುವುದನ್ನು ಚಿರುವಿನಿಂದ ಕಲಿತುಕೊಂಡಿದ್ದೇನೆ. ಚಿರು ಅಂದ್ರೆ ನನ್ನ ಸಂತಸ ಹಾಗೂ ಖುಷಿ. ಚಿರು ತಾನು ಬೂದಿ ಮುಚ್ಚಿದ ಕೆಂಡದಂತೆ, ಫೀನಿಕ್ಸ್ ಪಕ್ಷಿಯಂತೆ ಎಂದು ಯಾವಾಗಲೂ ಹೇಳುತ್ತಿದ್ದ. ನನ್ನ ಬದುಕಿನಲ್ಲಿ ಈಗ ಮಗ ಬಂದಿರುವುದು ನನಗೆ ದುಪ್ಪಟ್ಟು ಸಂಭ್ರಮ ತಂದಿದೆ’ ಎನ್ನುವ ಮಾತು ಸೇರಿಸಿದರು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.