ನೀಳಸುಂದರಿ ಸೋನು ಪಾಟೀಲ

7

ನೀಳಸುಂದರಿ ಸೋನು ಪಾಟೀಲ

Published:
Updated:
Deccan Herald

ಬಾಗಲಕೋಟೆ ಜಿಲ್ಲೆಯ ಜಮಖಂಡಿ ತಾಲ್ಲೂಕಿನ ಕಡಪಟ್ಟಿ ಗ್ರಾಮದವರಾದ ಸೋನು ಪಾಟೀಲ ವಿಜಯಪುರದ ಅಕ್ಕಮಹಾದೇವಿ ಮಹಿಳಾ ವಿಶ್ವವಿದ್ಯಾನಿಲಯದಲ್ಲಿ ಪತ್ರಿಕೋದ್ಯಮ ಮತ್ತು ಸಮೂಹ ಸಂವಹನ ಸ್ನಾತಕೋತ್ತರ ಪದವಿ ಪಡೆದವರು. ಪತ್ರಿಕೋದ್ಯಮ ಪದವಿ ಪೂರೈಸಿದ ನಂತರ ಸೋನು ಬೆಂಗಳೂರಿನತ್ತ ಮುಖ ಮಾಡಿದರು. ತಮ್ಮ ವೃತ್ತಿಜೀವನವನ್ನು ಪತ್ರಿಕೋದ್ಯಮದಲ್ಲಿ ಪ್ರಾರಂಭಿಸಿದಾಗ ಚಂದನವನ ಇವರನ್ನು ಆಕರ್ಷಿಸಿತು. ಅದರ ನಂತರದ ಕನ್ನಡ ಚಿತ್ರರಂಗದಲ್ಲಿನ ಇವರ ಪಯಣ, ಸಾಧನೆ ಮತ್ತು ಬೆಳವಣಿಗೆ ಎಲ್ಲರಿಗೂ ಪ್ರೇರಣೆ ನೀಡುವಂತದ್ದು.

ಯಾವುದೇ ಗಾಡ್‌ಫಾದರ್‌ಗಳಿಲ್ಲದೇ ನಟನಾ ತರಬೇತಿ ಪಡೆಯದೇ ಸೋನು ಪ್ರಾರಂಭದಲ್ಲಿ ಧಾರಾವಾಹಿಗಳಲ್ಲಿ ಅಭಿನಯಿಸಲು ಪ್ರಾರಂಭಿಸಿದರು. ಟಿ.ವಿ ವಾಹಿನಿಯಲ್ಲಿ ಕೆಲಸ ಮಾಡುತ್ತಿದ್ದ ಸೋನು ನಟನಾಸಕ್ತಿಯಿಂದ ಕಿರುತೆರೆಗೆ ಕಾಲಿಟ್ಟರು. ಮೊಗ್ಗಿನ ಮನಸು, ಗಾಂಧಾರಿ, ಅಮೃತವರ್ಷಿಣಿ, ಶ್ರೀಮಾನ್ ಶ್ರೀಮತಿ ಮತ್ತು ಪಂಚಕಜ್ಜಾಯ ಧಾರಾವಾಹಿಗಳಲ್ಲಿ ನಟಿಸಿದ ಅನುಭವ ಇವರದು.

ಧಾರಾವಾಹಿಗಳಲ್ಲಿ ನಟಿಸುತ್ತ ಪಕ್ಕಾ ಜವಾರಿ ಹುಡುಗಿಯೆಂದೇ ಪ್ರಸಿದ್ಧಿ ಪಡೆಯುತ್ತ ಸೋನು ಸಾಧು ಕೋಕಿಲಾ ಅವರ ಜೊತೆ ಧರ್ಮಸ್ಯ ಎನ್ನುವ ಸಿನಿಮಾದಲ್ಲಿ ಹಾಸ್ಯ ನಟಿಯಾಗಿ ಕಾಣಿಸಿಕೊಂಡವರು. ಅದಾದ ನಂತರ ನಟಿ ಶುಭಾ ಪೂಂಜಾ ಜೊತೆ, ಕೆಲವು ದಿನಗಳ ನಂತರ ಗೋಸಿ ಗ್ಯಾಂಗ್, ಸಂಚಾರಿ ವಿಜಯ ಅವರೊಟ್ಟಿಗೆ ಕೊಟ್ಟೂರೇಶ್ವರ ಮಹಾತ್ಮೆ, ಗರ ಚಿತ್ರದಲ್ಲಿ ತಬಲಾ ನಾಣಿ, ಮನದೀಪ್ ರಾಯ್, ಪ್ರಶಾಂತ್ ರೈ ಅವರ ಜೊತೆ ಕಾಣಿಸಿಕೊಂಡರು. ಹೀಗೆ ಸಾಲುಸಾಲಾಗಿ ಎಂಟು ಚಿತ್ರಗಳಲ್ಲಿ ಅಭಿನಯಿಸಿದ ಸೋನುಗೆ ಚಂದನವನದಲ್ಲಿ ಸಾಕಷ್ಟು ಜನಪ್ರಿಯತೆ ಮತ್ತು ಮನ್ನಣೆ ಇದೆ ಎನ್ನುವುದನ್ನು ಖಾತ್ರಿ ಮಾಡುತ್ತದೆ. ತಾವು ನಟಿಸಿರುವ ಚಿತ್ರಗಳು ಬಿಡುಗಡೆಯಾಗುವ ಮೊದಲೇ ಸೋನು ಮತ್ತೊಂದು ಸಿನಿಮಾದಲ್ಲಿ ಬ್ಯೂಸಿಯಾಗಿರುವುದು ಅವರ ವೃತ್ತಿಪರತೆಯನ್ನು ಎತ್ತಿ ತೋರುತ್ತದೆ.

ಸೋನು ನಾಯಕಿಯಾಗಿ ನಟಿಸಿದ ಮೊದಲ ಸಿನಿಮಾ ನಟ ಜಗ್ಗೇಶ್ ಅವರ ಮಹ ಯತೀರಾಜ್ ನಟನೆಯ ಗೋಸಿ ಗ್ಯಾಂಗ್. ಈಗ ಬೇತಾಳ ಎನ್ನುವ ಹಾರರ್ ಸಿನಿಮಾದಲ್ಲೂ ಮುಖ್ಯ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಪ್ರಸ್ತುತ ಯರ್ರಾಬಿರ್ರಿ ಸಿನಿಮಾ ಶೂಟಿಂಗ್‌ನಲ್ಲಿ ಬ್ಯೂಸಿಯಾಗಿರುವ ಸೋನು ಅವರ ಸಿನಿಮಾ ಜರ್ನಿ ಉತ್ತರ ಕರ್ನಾಟಕದ ಜನತೆಗೆ ಅಕ್ಷರಶಃ ಖುಷಿ ಕೊಡುವಂತದ್ದು.

ವಾಡಿಕೆಯಲ್ಲಿರುವಂತೆ ಚಂದನವನದಲ್ಲಿ ಉತ್ತರ ಕರ್ನಾಟಕದ ಕಲಾವಿದರಿಗೆ ಪ್ರಾಶಸ್ತ್ಯ ಕಡಿಮೆ ಎನ್ನುವುದಿದೆ. ಇದರ ಬಗ್ಗೆ ಸೋನು ಹೇಳುವುದಿಷ್ಟೇ. ‘ಹೌದು; ಇದು ನಿಜ. ನಮ್ಮ ಭಾಷೆ, ಉಡುಗೆ, ತೊಡುಗೆ ದಕ್ಷಿಣ ಕರ್ನಾಟಕದವರಿಗಿಂತ ತುಂಬಾ ಭಿನ್ನವಾಗಿದ್ದು, ವಿಶಿಷ್ಟವಾಗಿದೆ. ನಮ್ಮ ಭಾಗದವರು ಚಿಕ್ಕಂದಿನಿಂದ ಕಟಕ್ ರೊಟ್ಟಿ ತಿಂದು, ಗಲ್ಲಿಯಲ್ಲಿ ಚಿನ್ನಿ-ದಾಂಡು ಆಡ್ಕೊಂಡು, ಜನಪದ ಹಾಡು ಹೇಳ್ಕೊಂಡು ಜೀವನನಾ ಎಂಜಾಯ್ ಮಾಡೋರು. ಆದ್ರೆ ನಮ್ಮ ಹತ್ತಿರ ಟ್ಯಾಲೆಂಟ್ ಇಲ್ಲ ಅಂತ ಅಂದುಕೊಂಡಿರುವವರ ಮುಂದೆ ನಾವು ಚೆನ್ನಾಗಿ ಅಭಿನಯಿಸಿದ್ರೆ ಹುಡುಕ್ಕೊಂಡ್ ಬಂದು ನಮಗೆ ಚಾನ್ಸ್ ಕೊಡ್ತಾರೆ. ಹಾಗಾಗಿ ಇಲ್ಲಿ ಉತ್ತರ ಕರ್ನಾಟಕದವರಿಗೆ ಅವಕಾಶ, ಮನ್ನಣೆ ಇಲ್ಲ ಅಂತ ಹೇಳುವುದಕ್ಕಿಂತ ಅವರ ಪ್ರತಿಭೆ ಅನಾವರಣಕ್ಕೆ ಒಂದು ವೇದಿಕೆ ಚಂದನವನ ಅಂತ ಅಂದುಕೊಂಡರೆ ನಾವು ನಮ್ಮ ಜೀವನವನ್ನು ರೂಪಿಸಿಕೊಳ್ಳಬಹುದು’.

ಕನ್ನಡ ಚಿತ್ರರಂಗದ ಖ್ಯಾತನಾಮರಿಂದ ಹಿಡಿದು ಹೊಸ ಪ್ರತಿಭೆಗಳ ಜೊತೆ ನಟಿಸಲು ಸೋನು ಸದಾ ರೆಡಿ. ಪಾತ್ರ ಯಾವುದಾದರೇನು, ಪಾತ್ರಕ್ಕೆ ಜೀವ ತುಂಬಲು ನಾನು ಪ್ರಯತ್ನಿಸುತ್ತೇನೆ. ಎಲ್ಲರ ಜೊತೆ ನಟಿಸಲು ಆಸೆ. ಅದರಲ್ಲೂ ಕಾಮಿಡಿ ಪಾತ್ರಗಳೆಂದರೆ ತುಂಬಾ ಇಷ್ಟ ಎನ್ನುವ ಸೋನುಗೆ ಪಕ್ಕಾ ಕಮರ್ಷಿಯಲ್ ಸಿನಿಮಾಗಳಲ್ಲಿ ನಾಯಕಿಯಾಗಿ ಕಾಣಿಸಿಕೊಳ್ಳುವ ಬಯಕೆ.

ಸದ್ಯ ಸೋನುಗೆ ಕನ್ನಡದ ಜೊತೆ ತಮಿಳು ರಿಯಾಲಿಟಿ ಷೋ ಮತ್ತು ಸಿನಿಮಾಗಳಲ್ಲಿ ನಟಿಸುವ ಅವಕಾಶಗಳು ಬರುತ್ತಿವೆ. ಕನ್ನಡದ ಪ್ಯಾಟೆ ಹುಡ್ಗೀರ್ ಹಳ್ಳಿ ಲೈಫು ರಿಯಾಲಿಟಿ ಷೋನ ಹಾಗೆ ತಮಿಳಿನಲ್ಲಿ ಒರು ನಾಳ್ ಗ್ರಾಮತ್ತಿಲ್ ಎನ್ನುವ ರಿಯಾಲಿಟಿ ಷೋನಲ್ಲಿ ಸ್ಪರ್ಧಿಯಾಗಿ ಭಾಗಿಯಾಗುವ ಅವಕಾಶ ಒದಗಿ ಬಂದಿದೆ.

ಬಿಡುವಿನ ಸಮಯದಲ್ಲಿ ಜನಪದ ಹಾಡುಗಳನ್ನು ಹಾಡುವುದು, ಡಾನ್ಸ್ ಮಾಡುವುದು, ಡೈಲಾಗ್ ಬರಿಯೋದು, ಕವನಗಳನ್ನು ಬರಿ
ಯೋದು ಸೋನು ಅವರ ಹವ್ಯಾಸಗಳು. ಯಾವುದೇ ಉತ್ತರ ಕರ್ನಾಟಕ ಭಾಷೆಯ ಸಿನಿಮಾಗಳಿರಲಿ, ಸೋನು ಅವರು ಕೆಲವು ಪಾತ್ರಗಳಿಗೆ ತಮ್ಮ ಜವಾರಿ ಭಾಷೆಯ ಮೂಲಕ ಡಬ್ಬಿಂಗ್ ಕೂಡ ಮಾಡುತ್ತಾರೆ. ತಮ್ಮ ವೃತ್ತಿ ಜೀವನದಲ್ಲಿ ಮೂಟೆ ಮೂಟೆ ಕನಸುಗಳನ್ನು ಹೊತ್ತು ಸಾಗುತ್ತಿರುವ ಸೋನು, ಹೊಸದಾಗಿ ಚಿತ್ರರಂಗಕ್ಕೆ ಪ್ರವೇಶಿಸುವವರಿಗೆ ಹೇಳುವುದೇನೆಂದರೆ ನಿಮ್ಮ ಮೇಲೆ ನಿಮಗೆ ನಂಬಿಕೆಯಿರಲಿ. ಮಾಡುವ ಕೆಲಸವನ್ನು ಚಾಚು ತಪ್ಪದೇ ಮಾಡುವ ಮನಸ್ಸಿರಲಿ, ಆತ್ಮವಿಶ್ವಾಸದ ಜೊತೆಗೆ ಧೈರ್ಯವೊಂದಿದ್ದರೆ ನಿಮ್ಮನ್ನು ತಡೆಯಲು ಯಾರಿಂದಲೂ ಸಾಧ್ಯವಿಲ್ಲ ಎನ್ನುವುದು.

Tags: 

ಬರಹ ಇಷ್ಟವಾಯಿತೆ?

  • 4

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !