ಮಾ.5ರಂದು ಚಿತ್ರವು ಬಿಡುಗಡೆಯಾಗುತ್ತಿದ್ದು, ಇದೇ ಸಂದರ್ಭದಲ್ಲಿ ಈ ವಿಡಿಯೊ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ. ಈ ದೃಶ್ಯದ ತುಣುಕು ಚಿತ್ರದ ಟ್ರೇಲರ್‌ನಲ್ಲೂ ಇದೆ. ಘಟನೆ ಕುರಿತು ಮಾತನಾಡಿರುವ ರಿಷಬ್‌, ‘ಕಳೆದ ವರ್ಷ ಜುಲೈ ತಿಂಗಳ ಕೊನೆಯಲ್ಲಿ ಈ ಘಟನೆ ನಡೆದಿದೆ. ದೊಡ್ಡ ಅನಾಹುತ ಆಗಿಲ್ಲ. ಸ್ಫೋಟದಿಂದಾಗಿ ಬೆನ್ನಿಗೆ ಬೆಂಕಿ ಹತ್ತಿತ್ತು. ಕೂದಲೂ ಸುಟ್ಟು ಹೋಗಿತ್ತು. ಚಿತ್ರೀಕರಣದ ಸಂದರ್ಭದಲ್ಲಿ ಹೆಚ್ಚಿನ ಮುಂಜಾಗ್ರತಾ ಕ್ರಮ ಕೈಗೊಂಡಿದ್ದ ಕಾರಣ ಹೆಚ್ಚಿನ ಅನಾಹುತವೇನೂ ಆಗಿಲ್ಲ. ಬೆನ್ನ ಹಿಂದೆ ಸ್ಫೋಟವಾಗುವ ಕಾರಣ, ಅನಾಹುತವೇನಾದ್ರೂ ಆದರೆ ನಾಯಕಿ ಗಾನವಿಗೆ ತೊಂದರೆಯಾಗಬಾರದು ಎಂದು ಅವರನ್ನು ನನ್ನ ಮುಂದೆ ನಿಲ್ಲಿಸಿದ್ದೆ. ಜೊತೆಗೆ ಚಿತ್ರೀಕರಣದ ಜಾಗದಲ್ಲಿ ನೀರು ಕೆಸರು ಇದ್ದ ಕಾರಣ ಅದನ್ನು ಬೇಗ ನಂದಿಸಿಕೊಳ್ಳಲು ಸಾಧ್ಯವಾಯಿತು’ ಎಂದಿದ್ದಾರೆ.
