ಮುಂಬೈ: ಲತಾ ಮಂಗೇಶ್ಕರ್‌ ಅವರ ದಕ್ಷಿಣ ಮುಂಬೈನಲ್ಲಿರುವ ನಿವಾಸದಿಂದ ಶಿವಾಜಿ ಪಾರ್ಕ್‌ವರೆಗೆ ಭಾನುವಾರ ನಡೆದ ಅಂತಿಮ ಯಾತ್ರೆಯ ಮೆರವಣಿಗೆಯಲ್ಲಿ ಪಾಲ್ಗೊಂಡಿದ್ದ ನೂರಾರು ಅಭಿಮಾನಿಗಳು, ‘ಲತಾ ದೀದಿ ಅಮರ್‌ ರಹೆ’ ಎಂಬ ಘೋಷಣೆ ಕೂಗುತ್ತಾ, ಹಾಡು ಹಾಡುತ್ತಾ ತಮ್ಮ ನೆಚ್ಚಿನ ಗಾಯಕಿಗೆ ಭಾವಪೂರ್ಣ ವಿದಾಯ ಕೋರಿದರು.
ಅದಕ್ಕೂ ಮುನ್ನ ಲತಾ ಅವರ ನಿವಾಸ ಪ್ರಭು ಕುಂಜ್‌ಗೆ ಯುವಕರು, ಹಿರಿಯರೆನ್ನದೆ ನೂರಾರು ಮಂದಿ ಭೇಟಿ ನೀಡಿ ಅಂತಿಮ ದರ್ಶನ ಪಡೆದರು.
ಲತಾ ಅವರ ನಿವಾಸದ ಬಳಿ ಜನರನ್ನು ನಿಯಂತ್ರಿಸುವ ಸಲುವಾಗಿ ಹೆಚ್ಚಿನ ಸಂಖ್ಯೆಯಲ್ಲಿ ಪೊಲೀಸರನ್ನು ನಿಯೋಜಿಸಲಾಗಿತ್ತು.
