ಮಂಗಳವಾರ, ನವೆಂಬರ್ 24, 2020
26 °C

'ಜೀವನ ಪಾತ್ರ' ಮುಗಿಸಿದ ಬಂಗಾಳಿ ನಟ ಸೌಮಿತ್ರ ಚಟರ್ಜಿ

ಪಿಟಿಐ Updated:

ಅಕ್ಷರ ಗಾತ್ರ : | |

ಕೋಲ್ಕತ್ತ: ದೀರ್ಘಕಾಲ ಅನಾರೋಗ್ಯದಿಂದ ಬಳಲುತ್ತಿದ್ದ ಪ್ರಸಿದ್ಧ ಬಂಗಾಳಿ ನಟ ಸೌಮಿತ್ರ ಚಟರ್ಜಿ(85) ಅವರು ಭಾನುವಾರ ಆಸ್ಪತ್ರೆಯಲ್ಲಿ ನಿಧನರಾದರು.

ಚಟರ್ಜಿ ಅವರಲ್ಲಿ ಕೋವಿಡ್‌ ದೃಢಪಟ್ಟಿತ್ತು. ಈ ಬಳಿಕ ಅ.6 ರಂದು ಅವರನ್ನು ಆಸ್ಪತ್ರೆಗೆ ಸೇರಿಸಲಾಗಿತ್ತು. ಕೋವಿಡ್‌ ಸೋಂಕಿನಿಂದ  ಗುಣಮುಖರಾಗಿದ್ದರು. ಆದರೆ, ಹಲವು ಕಾಯಿಲೆಗಳಿದ್ದರಿಂದ ಬಳಲುತ್ತಿದ್ದರಿಂದ ಅವರ ಆರೋಗ್ಯದಲ್ಲಿ ಸುಧಾರಣೆ ಕಂಡುಬಂದಿರಲಿಲ್ಲ.

ಸೌಮಿತ್ರ ಚಟರ್ಜಿ ಅವರು ಭಾನುವಾರ ಮಧ್ಯಾಹ್ನ 12.15ಕ್ಕೆ ಬಿಲೆ ವ್ಯೂವ್‌ ಕ್ಲಿನಿಕ್‌ನಲ್ಲಿ ನಿಧನರಾದರು ಎಂದು ಆಸ್ಪತ್ರೆಯ ಪ್ರಕಟಣೆ ತಿಳಿಸಿದೆ.

ಸತ್ಯಜಿತ್‌ ರೇ ನಿರ್ದೇಶನದ ಅಪೂರ್‌ ಸಂಸಾರ್‌ನಲ್ಲಿ ವಯಸ್ಕ ಅಪುವಿನ ಪಾತ್ರ ನೋಡಿದವರಿಗೆ ಸೌಮಿತ್ರ ಚಟರ್ಜಿಯ ಪ್ರತಿಭೆ ಕಣ್ಣಮುಂದೆ ಬರುತ್ತದೆ. ಅಪುವಿನ ಕಥೆ ಮುಂದುವರಿದ ಮೂರನೇ ಭಾಗವಿದು. ರೇ ಅವರ 14 ಚಿತ್ರಗಳಲ್ಲಿ ಚಟರ್ಜಿ ಅವರು ನಟಿಸಿದ್ದಾರೆ.

‘ಅಭಿಜಾನ್‌’ (1962), ‘ಚಾರುಲತಾ’ (1964), ‘ಅರಣ್ಯೆರ್‌ ದಿನ್‌ ರಾತ್ರಿ’ (1964), ‘ಆಶಾನಿ ಸಂಕೇತ್’‌ (1972), ‘ಸೋನರ್‌ ಕೆಲ್ಲಾ’ (1974) ‘ಜೋಯ್‌ ಬಾಬಾ ಫೇಲುನಾಥ್‌’ (1978) ಸೇರಿದಂತೆ ಬಂಗಾಳಿ, ಹಿಂದಿಯ ಒಟ್ಟು 105 ಚಿತ್ರಗಳಲ್ಲಿ ಚಟರ್ಜಿ ನಟಿಸಿದ್ದಾರೆ. ‘ಸ್ತ್ರೀ ಕಾ ಪಾತ್ರ’ ಅವರು ನಿರ್ದೇಶಿಸಿದ ಚಿತ್ರ. ಹೀಗೆ ಸೌಮಿತ್ರ ಚಟರ್ಜಿ (ಸೌಮಿತ್ರ ಚಟ್ಟೋಪಾಧ್ಯಾಯ) ಭಾರತೀಯ ಚಿತ್ರರಂಗದಲ್ಲಿ ಸಾಧನೆ ಮತ್ತು ಕೀರ್ತಿಯ ಶಿಖರವೇರಿದ ನಟ.

ಸಾಧನೆಗೆ ತಕ್ಕಂತೆ ಪ್ರಶಸ್ತಿ, ಪುರಸ್ಕಾರಗಳೂ ಅವರನ್ನು ಹುಡುಕಿಕೊಂಡು ಬಂದಿವೆ. 1999ರಲ್ಲಿ ಫ್ರಾನ್ಸ್‌ ಸರ್ಕಾರದಿಂದ ಆರ್ಡ್ರೆ ಡೆಸ್‌ ಆರ್ಟ್ಸ್‌ ಅಟ್‌ ಡೆಸ್‌ ಲೆಟ್ರೆಸ್‌ (1999) (l' Ordre des Arts et des Lettres), ಪದ್ಮಭೂಷಣ (2004), ಸಂಗೀತ ನಾಟಕ ಅಕಾಡೆಮಿಯಿಂದ ಟಾಗೋರ್‌ ರತ್ನ (2012), ದಾದಾ ಸಾಹೇಬ್‌ ಫಾಲ್ಕೆ ಪ್ರಶಸ್ತಿ (2012), ಫ್ರಾನ್ಸ್‌ ಸರ್ಕಾರದಿಂದ ‘ಲೀಜನ್‌ ದ ಹಾನರ್’‌ (2018) ಪುರಸ್ಕಾರಗಳು ಸಂದಿವೆ. ಇವುಗಳಲ್ಲದೇ ಮೂರು ರಾಷ್ಟ್ರಪ್ರಶಸ್ತಿ, ಬಂಗಾಳಿ ಚಲನಚಿತ್ರ ಪತ್ರಕರ್ತರ ಸಂಘದಿಂದ 8 ಪ್ರಶಸ್ತಿಗಳು ಅವರಿಗೆ ಸಂದಿವೆ. ಅವರಿಗೆ ಪತ್ನಿ ದೀಪಾ ಚಟರ್ಜಿ, ಇಬ್ಬರು ಮಕ್ಕಳಿದ್ದಾರೆ. 

ಅವರು ಈ ವರ್ಷ ನಟಿಸಿದ ಕೊನೆಯ ಚಿತ್ರ ಸ್ರೋಬ್ನೇರ್‌ ಧಾರಾ. ಅದರಲ್ಲಿ ಅಮಿತವ ಸರ್ಕಾರ್‌ ಪಾತ್ರ ನಿರ್ವಹಿಸಿದ ಚಟರ್ಜಿ ಸಾಧನೆಯ ನೆನಪುಗಳನ್ನು ಬಿಟ್ಟು ಇಹಲೋಕ ತ್ಯಜಿಸಿದ್ದಾರೆ.

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು