ಬುಧವಾರ, ಆಗಸ್ಟ್ 21, 2019
22 °C

‘ಮಹಾನಟಿ’ ಕೀರ್ತಿ ಸುರೇಶ್‌ಗೆ ಅತ್ಯುತ್ತಮ ನಟಿ ಗೌರವ

Published:
Updated:

2018ನೇ ಸಾಲಿನ 66ನೇ ರಾಷ್ಟ್ರೀಯ ಚಲನಚಿತ್ರ ಪ್ರಶಸ್ತಿ ಪ್ರಕಟವಾಗಿದ್ದು, ‘ಮಹಾನಟಿ’ ಚಿತ್ರದ ಅಭಿನಯಕ್ಕಾಗಿ ನಟಿ ಕೀರ್ತಿ ಸುರೇಶ್‌ ಅವರಿಗೆ ಅತ್ಯುತ್ತಮ ನಟಿ ಪ್ರಶಸ್ತಿ ಘೋಷಣೆಯಾಗಿದೆ. ‘ಪ್ರಜಾವಾಣಿ’ಯಲ್ಲಿ ಮೇ 28, 2018ರಂದು ಪ್ರಕಟವಾಗಿದ್ದ ಈ ಬರಹವು ಕೀರ್ತಿ ಸುರೇಶ್ ನಟಿಯಾಗಿ ಪಕ್ವವಾದ ಬಗೆಯನ್ನು ಕಟ್ಟಿಕೊಡುತ್ತದೆ.

–––

ನಿರ್ದೇಶಕ ಪ್ರಿಯದರ್ಶನ್ ಫೋನ್ ಮಾಡಿದರು. ಫ್ಯಾಷನ್ ಡಿಸೈನಿಂಗ್ ಪದವಿ ಓದುತ್ತಿದ್ದ ಕೀರ್ತಿ ಸುರೇಶ್ ಚಕಿತಗೊಳ್ಳಲಿಲ್ಲ. ಅಪ್ಪ ಸುರೇಶ್ ಮಲಯಾಳಂ ಸಿನಿಮಾ ನಿರ್ಮಾಪಕ. ಮೇಲಾಗಿ ಪ್ರಿಯದರ್ಶನ್ ವಾರಗೆಯವರು. ಹೀಗಾಗಿ ಮೊದಲಿನಿಂದಲೂ ಪರಿಚಯವಿತ್ತು. ಲಂಡನ್‌ನಲ್ಲಿ ಕಲಿಕೆಯ ಕೊಡು–ಕೊಳುವಿಕೆಯ ಕಾರ್ಯಕ್ರಮಕ್ಕೆಂದು ಹೋಗಿದ್ದ ಕೀರ್ತಿ ಅಲ್ಲಿಂದ ಮರಳಿದವರೇ ಚರ್ಚೆಗೆ ಕುಳಿತರು. ಮೋಹನ್‌ಲಾಲ್, ಪ್ರಿಯದರ್ಶನ್, ಸುರೇಶ್ ಒಟ್ಟಿಗೆ ಕಲಿತಿದ್ದವರು.

ಇದನ್ನೂ ಓದಿ: ‘ನಾತಿಚರಾಮಿ’ಗೆ ರಾಷ್ಟ್ರೀಯ ಪ್ರಶಸ್ತಿ: ‘ಮೂಕಜ್ಜಿ’ಗೆ ಆರ್ಕೈವ್ ಗೌರವ

ಮೂವರೂ ಸಿನಿಮಾ ಕ್ಷೇತ್ರವನ್ನೇ ಆರಿಸಿಕೊಂಡದ್ದು ಕಾಕತಾಳೀಯ. ಪ್ರಿಯದರ್ಶನ್ ನಿರ್ದೇಶನದ ಮೊದಲ ಸಿನಿಮಾ ನಿರ್ಮಿಸಿದ್ದು ಸುರೇಶ್. ಅದರ ನಾಯಕ ಮೋಹನ್‌ಲಾಲ್. ‘ನಿಮ್ಮಪ್ಪ ನನಗೆ ಮೊದಲ ಸಿನಿಮಾ ಕೊಟ್ಟಿದ್ದ. ನಿನಗೆ ನಾನು ಮೊದಲ ಸಿನಿಮಾ ಕೊಡುವೆ’ ಎಂದು ಪ್ರಿಯದರ್ಶನ್ ಹೇಳಿದಾಕ್ಷಣ ಕೀರ್ತಿ ಹೆಚ್ಚೇನೂ ಪುಳಕಿತರಾಗಲಿಲ್ಲ. 

ಬಾಲನಟಿಯಾಗಿಯೂ ಕೀರ್ತಿ ತೆರೆ ಮೇಲೆ ಕಾಣಿಸಿಕೊಂಡಿದ್ದಿದೆ. ಕುಟುಂಬ ಚೆನ್ನೈನಲ್ಲಿ ವಾಸವಿತ್ತು. ರಜೆ ಬಂದರೆ ಅಪ್ಪನ ಜೊತೆ ಚಿತ್ರೀಕರಣ ನಡೆಯುವ ಸ್ಥಳಕ್ಕೆ ಸಹಜವಾಗಿಯೇ ಹೋಗುತ್ತಿದ್ದ ಕೀರ್ತಿಗೆ ಸಣ್ಣ ಪುಟ್ಟ ಪಾತ್ರಗಳ ಅವಕಾಶ ಒದಗಿಬಂದವಷ್ಟೆ. ಅದರಲ್ಲಿ ತನ್ನ ಹೆಚ್ಚುಗಾರಿಕೆ ಏನೂ ಇಲ್ಲ ಎನ್ನುವುದು ಅವರ ನಮ್ರ ನುಡಿ. 

ಇದನ್ನೂ ಓದಿ:  ಕೀರ್ತಿ ಸುರೇಶ್ ಸಂದರ್ಶನ | ಕನ್ನಡ ಜನರ ಅಭಿಮಾನಕ್ಕೆ ಚಿರಋಣಿ

ಒಂಬತ್ತನೇ ತರಗತಿ ಓದುವಾಗಲೇ ಕೀರ್ತಿ ಸ್ಫುರದ್ರೂಪ ಕಂಡು ಸಿನಿಮಾ ಅವಕಾಶಗಳು ಹರಿದಬರಲಾರಂಭಿಸಿದವು. ಆದರೆ, ಅಪ್ಪ ಸುರೇಶ್ ಹಾಗೂ ಖುದ್ದು ನಟಿಯೂ ಆದ ಅಮ್ಮ ಮೇನಕಾ ಸಾವಧಾನದಿಂದ ಇರುವಂತೆ ಸೂಚಿಸಿದರು. ಎಲ್ಲ ಅಪ್ಪ–ಅಮ್ಮಂದಿರಂತೆ ಅವರಿಗೂ ಮಗಳು ಎಂಜಿನಿಯರ್ ಆಗಲಿ ಎಂಬ ಆಸೆ ಇತ್ತು. ಆದರೆ, ಸಿನಿಮಾ ಪ್ರೀತಿ ರಕ್ತದಲ್ಲೇ ಇದ್ದಿದ್ದರಿಂದ ಫ್ಯಾಷನ್ ಡಿಸೈನಿಂಗ್ ಆಯ್ಕೆ ಮಾಡಿಕೊಂಡರು. 

ನಟಿಯಾಗುವ ಅದರಲ್ಲೂ ನಾಯಕಿಯಾಗುವ ಅವಕಾಶ ಒದಗಿಬಂದರೆ ಓದಿಗೆ ತಿಲಾಂಜಲಿ ಇಡುವವರೇ ಹೆಚ್ಚು. ಕೀರ್ತಿ ಹಾಗೆ ಮಾಡಲಿಲ್ಲ.

ಚೆನ್ನೈನ ಪರ್ಲ್ ಅಕಾಡೆಮಿಯ ಗಂಭೀರ ವಿದ್ಯಾರ್ಥಿನಿಯಾದರು. ಹಾಗೆ ಕಲಿಯುವಾಗಲೇ ಪ್ರಿಯದರ್ಶನ್ ಅವಕಾಶವನ್ನು ತಟ್ಟೆಯಲ್ಲಿಟ್ಟು ಕೊಟ್ಟಿದ್ದು. ತನ್ನ ಮೇಲೆ ದಿಗ್ಗಜ ನಿರ್ದೇಶಕನಿಗೆ ಇದ್ದ ವಿಶ್ವಾಸ ಕಂಡು ಕೀರ್ತಿ ಕರಗಿದರು. ಓದಿನ ನಡುವೆ ಇದ್ದ ಬಿಡುವಿನ ದಿನಗಳಲ್ಲೇ ಚಿತ್ರೀಕರಣ ಮುಗಿಸಬೇಕು ಎಂದು ಷರತ್ತು ಹಾಕಿದರು. ‘ಗೀತಾಂಜಲಿ’ ಮಲಯಾಳಂ ಸಿನಿಮಾದಲ್ಲಿ ನಟಿಯಾದದ್ದು ಹಾಗೆ.

ಇದನ್ನೂ ಓದಿ: ಬಾಲಿವುಡ್ ಚಿತ್ರಕ್ಕಾಗಿ ಸಣ್ಣಗಾದ ನಟಿ ಕೀರ್ತಿ ಸುರೇಶ್

ಆ ಸಿನಿಮಾದಲ್ಲಿ ಮೋಹನ್‌ಲಾಲ್ ಕೂಡ ಇದ್ದರು. ಅವರೊಟ್ಟಿಗೆ ಕ್ಯಾಮೆರಾ ಎದುರಿಸುವಾಗ ಕೀರ್ತಿಗೆ ತುಸುವೂ ಭಯ ಇರಲಿಲ್ಲ. ಬೇರೆ ನಟ–ನಟಿಯರು ಬಂದರೆ ಮಾತ್ರ ಕಂಪಿಸುತ್ತಿದ್ದರು. ವರ್ಷಗಳ ಕಾಲ ಅವರ ಜೊತೆಗೆ ಇದ್ದ ಸಲುಗೆ ಅಂಥದೊಂದು ವಿಶ್ವಾಸ ತುಂಬಿತ್ತು. ಒಂಬತ್ತನೇ ತರಗತಿಯಿಂದ ಈ ಹುಡುಗಿಯ ಮೇಲೆ ಕಣ್ಣಿಟ್ಟಿದ್ದ ನಿರ್ಮಾಪಕರೆಲ್ಲ ಮತ್ತೆ ಮನೆಯ ಬೆಲ್ ಒತ್ತಲಾರಂಭಿಸಿದರು. ಅದರ ಫಲವೇ ‘ರಿಂಗ್ ಮಾಸ್ಟರ್’ ಎಂಬ ಇನ್ನೊಂದು ಸಿನಿಮಾದಲ್ಲಿ ಅಭಿನಯಿಸುವ ಅನಿವಾರ್ಯ ಎದುರಾದದ್ದು.

ಎರಡೂ ಸಿನಿಮಾಗಳನ್ನು ಓದಿಗೆ ತೊಂದರೆ ಇಲ್ಲದಂತೆ ಪೂರೈಸಿದ ಕೀರ್ತಿ, ಪದವೀಧರೆಯೂ ಆದರು. ತಮ್ಮ ಪಾತ್ರಕ್ಕೆ ತಕ್ಕ ವಸ್ತ್ರಗಳನ್ನು ಆಯ್ಕೆ ಮಾಡಿಕೊಳ್ಳಲು ಅದು ಅರ್ಹತೆಯನ್ನು ದಕ್ಕಿಸಿಕೊಟ್ಟಿತು. ಕೀರ್ತಿಗೆ ಬಟ್ಟೆ ಮೆಚ್ಚಿಸುವುದು ವಿನ್ಯಾಸಕರಿಗೆ ಕಷ್ಟವಾಗತೊಡಗಿತು. ಅದಕ್ಕೆ ಪರಿಹಾರವನ್ನು ಈ ನಟಿಯೇ ಸೂಚಿಸಿದ ಮೇಲಷ್ಟೇ ಅವರೆಲ್ಲ ನಿರಾಳವಾದದ್ದು.

ಇದನ್ನೂ ಓದಿ: ಕೀರ್ತಿ ವರ್ಕೌಟ್ ಚಿತ್ರ ವೈರಲ್

ಮಲಯಾಳಂ ನಟ ದಿಲೀಪ್‌ಗೆ ಮಗಳಾಗಿ ಅಭಿನಯಿಸಿದ್ದ ಈ ಹುಡುಗಿ ಅವರಿಗೇ ನಾಯಕಿ ಆದಾಗ ಪ್ರೇಕ್ಷಕ ಪ್ರಭು ಚಕಿತಗೊಂಡಿದ್ದಿದೆ. ಈಗ ಸಾಕಷ್ಟು ಜನಮನ್ನಣೆ ಗಳಿಸಿರುವ ತೆಲುಗಿನ ‘ಮಹಾನಟಿ’ಯ (ನಟಿ ಸಾವಿತ್ರಿ ಬದುಕಿನ ಕಥೆ ಆಧರಿಸಿದ ಸಿನಿಮಾ) ನಾಯಕಿ ಇದೇ ಕೀರ್ತಿ. ನಿರ್ಮಾಪಕನ ಮಗಳು ಹೀಗೂ ಬೆಳೆಯಬಹುದು ಎನ್ನುವುದಕ್ಕೆ ಅವರ ಬದುಕಿನ ಕಥಾನಕವೇ ಸ್ಫೂರ್ತಿ.

 

ಕೀರ್ತಿ ಸುರೇಶ್‌ ಬಗ್ಗೆ ಇನ್ನಷ್ಟು...

‘ಸಖಿ’ಯಾಗಿ ಕೀರ್ತಿ

ಮಾನವ ಕಳ್ಳಸಾಗಾಣಿಕೆಯ ಕಥಾ ಹಂದರ ಹೊಂದಿರುವ ‘ಸಖಿ’ಯಲ್ಲಿ ಕೀರ್ತಿಯದ್ದು ಪ್ರಧಾನ ಪಾತ್ರ. ನರೇಂದ್ರನಾಥ್ ನಿರ್ದೇಶಿಸಲಿರುವ ಈ ಸಿನಿಮಾದಲ್ಲಿ ಕೀರ್ತಿ ಧೈರ್ಯವಂತ ಹೆಣ್ಣುಮಗಳ ಪಾತ್ರ ಮಾಡುತ್ತಿರುವುದು ವಿಶೇಷ. 

‘ಮಹಾನಟಿ’ಗೆ ಶಾಂಘೈ ಸಿನಿಮೋತ್ಸವ ಗೌರವ

ತಮಿಳು ಮತ್ತು ತೆಲುಗು ಭಾಷೆಗಳಲ್ಲಿ ಏಕಕಾಲಕ್ಕೆ ತೆರೆಕಂಡಿದ್ದ ‘ಮಹಾನಟಿ’ಯಲ್ಲಿ ದುಲ್ಕರ್ ಜೆಮಿನಿ ಗಣೇಶನ್ ಪಾತ್ರದಲ್ಲಿ ನಟಿಸಿದ್ದರು.  ಸಾವಿತ್ರಿ ಪಾತ್ರಕ್ಕಾಗಿ ಸಾಕಷ್ಟು ಹೋಮ್‌ವರ್ಕ್ ಮಾಡಿಕೊಂಡು ನಟಿಸಿದ್ದ ಕೀರ್ತಿ ಸುರೇಶ್ ಸಿನಿಮಾದ ಯಶಸ್ಸಿನ ನಂತರ ಥ್ರಿಲ್ ಅನುಭವಿಸಿದ್ದರು. 

ಕೀರ್ತಿಗೆ ಈ ವರ್ಷವೂ ಅದೃಷ್ಟದಾಯಕ

ಕೀರ್ತಿ ಸುರೇಶ್‌, ಸತತ ನಾಲ್ಕು ಉತ್ತಮ ತಮಿಳು ಚಿತ್ರಗಳಲ್ಲಿ ನಟಿಸಿ ವರ್ಷದ ಬ್ಯುಸಿ ನಟಿ ಎಂದು ಸಾಬೀತು ಮಾಡಿದ್ದಾರೆ. ಮುರುಗದಾಸ್‌ ಅವರದೇ ‘ಸರ್ಕಾರ್‌’ನಲ್ಲಿ ಕೀರ್ತಿ ತಮ್ಮ ಪ್ರತಿಭೆಯ ಮೂಲಕ ನಿರ್ದೇಶಕರ ಮನಗೆದ್ದಿದ್ದ ಕೀರ್ತಿ ಮತ್ತೊಂದು ಚಿತ್ರದಲ್ಲಿಯೂ ತಮ್ಮ ಸ್ಥಾನ ಗಿಟ್ಟಿಸಿಕೊಳ್ಳುವಲ್ಲಿ ಯಶಸ್ವಿಯಾಗಿದ್ದಾರೆ.

 

 

 

 

 

Post Comments (+)