‘ಸ್ಟ್ರೈಕರ್’ಗೆ ಪ್ರೇಕ್ಷಕರ ಮೆಚ್ಚುಗೆ

ಈ ಕುರಿತು ಮಾಹಿತಿ ಹಂಚಿಕೊಳ್ಳಲು ಚಿತ್ರತಂಡ ಸುದ್ದಿಗೋಷ್ಠಿ ಕರೆದಿತ್ತು. ನಿರ್ಮಾಪಕರಾದ ಜಿ. ಶಂಕರಪ್ಪ, ಸಿ. ರಮೇಶಬಾಬು ಮತ್ತು ಸುರೇಶ್‌ ಬಾಬು ಪ್ರೇಕ್ಷಕರ ಪ್ರತಿಕ್ರಿಯೆಗೆ ಧನ್ಯವಾದ ಅರ್ಪಿಸಿದರು. ಈ ವಾರದಿಂದ ದಾವಣಗೆರೆ ಮತ್ತು ಹುಬ್ಬಳ್ಳಿಗೆ ಪ್ರವಾಸಕೈಗೊಂಡು ಚಿತ್ರದ ಬಗ್ಗೆ ಮತ್ತಷ್ಟು ಪ್ರಚಾರ ನಡೆಸುವುದಾಗಿ ಹೇಳಿಕೊಂಡರು.

ನಿರ್ದೇಶನದ ಕನಸು ನನಸಾದ ಖುಷಿಯಲ್ಲಿದ್ದರು ನಿರ್ದೇಶಕ ಪವನ್ ತ್ರಿವಿಕ್ರಮ್‌. ‘ಚಿತ್ರ ಬಿಡುಗಡೆಗೂ ಮುನ್ನಾ ದಿನ ನನಗೆ ನಿದ್ರೆಯೇ ಬಂದಿರಲಿಲ್ಲ. ಬಿಡುಗಡೆಯಾದ ದಿನದಂದು ಮಧ್ಯಾಹ್ನದ ವೇಳೆ ಜನರ ಪ್ರತಿಕ್ರಿಯೆ ಕಂಡು ಖುಷಿಯಾಯಿತು’ ಎಂದರು.

ನಾಯಕ ನಟ ಪ್ರವೀಣ್‌ ತೇಜ್ ನಿರ್ದೇಶಕರಿಗೆ ಶೂಟಿಂಗ್‌ನಲ್ಲಿ ಸಾಕಷ್ಟು ಕಿರುಕುಳ ನೀಡಿದ್ದ ಬಗ್ಗೆ ಹೇಳಿಕೊಂಡರು. ‘ಬಹಳಷ್ಟು ಸಿನಿಮಾಗಳು ಶುರುವಾದಾಗ ಒಗ್ಗಟ್ಟು ಇರುತ್ತದೆ. ಚಿತ್ರ ತೆರೆಕಂಡಾಗ ಆ ಒಗ್ಗಟ್ಟು ಇರುವುದಿಲ್ಲ. ಮನಸ್ತಾಪ ಮನೆ ಮಾಡುತ್ತದೆ. ಸ್ಟ್ರೈಕರ್‌ ತಂಡದ ಎಲ್ಲರೂ ಒಟ್ಟಾಗಿರುವುದೇ ನನಗೆ ಖುಷಿ ತಂದಿದೆ’ ಎಂದರು.

ನಾಯಕಿ ಶಿಲ್ಪಾ ಮಂಜುನಾಥ್‌, ಸಂಗೀತ ಸಂಯೋಜಕ ಬಿ.ಜೆ. ಭರತ್‌, ಧರ್ಮಣ್ಣ ಅನುಭವ ಹಂಚಿಕೊಂಡರು.