ಅರ್ಜುನ್‌ ರೆಡ್ಡಿ ಸಿನಿಮಾದ ಮೂಲಕ ಯುವ ಮನಸ್ಸುಗಳಿಗೆ ಲಗ್ಗೆ ಇಟ್ಟ ಈ ನಟ ಅಂದಿನಿಂದ ಸ್ಟಾರ್‌ ನಿರ್ದೇಶಕರ ಬೇಡಿಕೆಯ ಪಟ್ಟಿಯಲ್ಲಿ ಹೆಸರು ಗಿಟ್ಟಿಸಿಕೊಂಡಿದ್ದಾರೆ. ಯುವ ಅಭಿಮಾನಿ ಬಳಗವನ್ನು ಹೊಂದಿರುವ ದೇವರಕೊಂಡಗಾಗಿ ಅನೇಕ ನಿರ್ದೇಶಕರು ಕತೆ ತಯಾರಿಸಿಟ್ಟುಕೊಂಡಿದ್ದಾರೆ. ವಿಜಯ್ ಸದ್ಯ ಡ್ಯಾಶಿಂಗ್‌ ನಿರ್ದೇಶಕ ಎಂದೇ ಕರೆಸಿಕೊಳ್ಳುವ ಪೂರಿ ಜಗನ್ನಾಥ್ ನಿರ್ದೇಶನದ ಸಿನಿಮಾದಲ್ಲಿ ನಟಿಸುತ್ತಿದ್ದಾರೆ. ಈ ಸಿನಿಮಾ ಮುಂದಿನ ವರ್ಷ ಬಿಡುಗಡೆಯಾಗಲಿದೆ.

ಹೀಗಿರುವ ನಿನ್ನೆ ಖ್ಯಾತ ನಿರ್ದೇಶಕ ಸುಕುಮಾರ್ ಜೊತೆ ಸಿನಿಮಾ ಮಾಡುವುದಾಗಿ ಘೋಷಿಸಿದ್ದಾರೆ ವಿಜಯ್‌. ಈ ಬಗ್ಗೆ ತಮ್ಮ ಟ್ವಿಟ್ಟರ್ ಖಾತೆಯಲ್ಲಿ ಬರೆದುಕೊಂಡಿದ್ದಾರೆ. ‘ಸುಕುಮಾರ್‌–ವಿಜಯ್‌ ದೇವರಕೊಂಡ. ನನ್ನೊಳಗಿನ ನಟ ತುಂಬಾನೇ ಉತ್ಸುಕನಾಗಿದ್ದಾನೆ. ನನ್ನೊಳಗಿನ ಅಭಿಮಾನಿಗಳು ಸಂಭ್ರಮಿಸುತ್ತಿದ್ದಾರೆ. ಇದು ಅತ್ಯಂತ ಮಹತ್ವದ ಸಿನಿಮಾವಾಗುತ್ತದೆ ಎಂಬುದಕ್ಕೆ ನಾವು ಭರವಸೆ ಕೊಡುತ್ತೇವೆ. ಸುಕ್ಕು ಸರ್ ಜೊತೆ ಸೆಟ್‌ಗೆ ತೆರಳಲು ಕಾತುರನಾಗಿದ್ದೇನೆ’ ಎಂದು ಬರೆದುಕೊಂಡಿದ್ದಾರೆ.

ಈ ಸಿನಿಮಾವನ್ನು ಫ್ಯಾಲಕನ್‌ ಕ್ರಿಯೇಷನ್‌ ಸಂಸ್ಥೆಯಡಿ ಕೇದಾರ್‌ ಸೆಲಗಮಂಸೆಟ್ಟಿ ನಿರ್ಮಾಣ ಮಾಡುತ್ತಿದ್ದಾರೆ. ಕೇದಾರ್ ನಿರ್ಮಾಣದ ಮೊದಲ ಸಿನಿಮಾ ಇದಾಗಿದೆ. ಸಿನಿಮಾವು 2022ರಲ್ಲಿ ತೆರೆ ಕಾಣಲಿದೆ. ಈ ಇಬ್ಬರು ಯಶಸ್ವಿ ನಾಯಕ ಹಾಗೂ ನಿರ್ದೇಶಕರ ಸಾರಥ್ಯದಲ್ಲಿ ಮೂಡಿ ಬರುತ್ತಿರುವ ಸಿನಿಮಾ ತೆರೆ ಮೇಲೆ ಅದ್ಭುತ ಸೃಷ್ಟಿಸುವುದರಲ್ಲಿ ಅನುಮಾನವಿಲ್ಲ. ಅಭಿಮಾನಿಗಳು ಸಿನಿಮಾದ ಕುರಿತು ಇನ್ನಷ್ಟು ಮಾಹಿತಿ ಪಡೆಯಲು ಕಾತರದಿಂದ ಕಾಯುತ್ತಿದ್ದಾರೆ.