‘ದಿ ವಿಲನ್’ ಜ್ವರ

7

‘ದಿ ವಿಲನ್’ ಜ್ವರ

Published:
Updated:

*‘ದಿ ವಿಲನ್’ ಕುರಿತು ಎರಡೇ ಸಾಲಿನಲ್ಲಿ ಹೇಳಿ?
ಹ್ಹಹ್ಹಹ್ಹಾ... ಒಂದೇ ಲೈನಲ್ಲಿ ಹೇಳ್ತೀನಿ ಕೇಳಿ. ಕಮರ್ಷಿಯಲ್, ಎಮೋಶನ್ಸ್‌, ಎಂಜಾಯಬಲ್ ಸಿನಿಮಾ! ಇಬ್ಬರು ಹೀರೊಗಳನ್ನು ಇಟ್ಟುಕೊಂಡು ಸಾಮಾಜಿಕವಾಗಿ ಏನೋ ದೊಡ್ಡ ಸಂದೇಶ ಕೊಡ್ತೀನಿ ಎನ್ನುವುದೆಲ್ಲ ಸುಳ್ಳು. ಇದು ಪಕ್ಕಾ ಕಮರ್ಷಿಯಲ್ ಸಿನಿಮಾ. ಅದರ ನಡುವೆಯೂ ಒಂದು ಸಣ್ಣ ಸಾಮಾಜಿಕ ಕಳಕಳಿಯಂತೂ ಇದ್ದೇ ಇರುತ್ತದೆ. 

*ಚಂದನವನದ ಎರಡು ದೊಡ್ಡ ಸ್ಟಾರ್‌ಗಳನ್ನು ಸೇರಿಸಿದ್ದೀರಿ. ಈ ಸಾಹಸದಲ್ಲಿ ನಿಮಗೆ ಎದುರಾದ ಸವಾಲುಗಳೇನು?
ಓಪನ್ನಾಗಿ ಹೇಳ್ಬೇಕು ಅಂದ್ರೆ, ಇಬ್ರು ಹೀರೊಗಳನ್ನು ಮನಸಲ್ಲಿ ಇಟ್ಟುಕೊಂಡು ಮಾಡಿದ ಸಿನಿಮಾನೇ ಅಲ್ಲ ಇದು. ಯಾವ ಸ್ಟಾರ್‌ಗಿರಿಯನ್ನೂ ತಲೆ ಮೇಲೆ ಹೊತ್ಕೊಂಡು ಸಿನಿಮಾ ಡೈರೆಕ್ಟ್‌ ಮಾಡಲ್ಲ ನಾನು. ಛಾನ್ಸೇ ಇಲ್ಲ, ನೆವರ್!  ಶಿವರಾಜ್‌ಕುಮಾರ್‌ ಅವರಂಥ ಒಬ್ಬ ಮಹಾನ್‌ ನಟ. ಜೋಗಿ ಸಿನಿಮಾ ಚಿತ್ರೀಕರಣ ಸಂದರ್ಭ. ಅದ್ಯಾವ್ದೋ ಕೊಚ್ಚೆ ನೀರಲ್ಲಿ ಶಾಟ್ ಇಟ್ಟು ‘ಅಣ್ಣಾ, ಇಲ್ಲಿ ಬಿದ್ದು ಎದ್ದು ಹೋಗ್ತೀರಾ’ ಎಂದು ಹೇಳಿದ್ರೆ ‘ಓಕೆ ಪ್ರೇಮ್, ನಾನ್ ರೆಡಿ’ ಅಂತ ಬಂದುಬಿಡ್ತಿದ್ರು. 

ನಾನು ಸಿನಿಮಾ ಮಾಡುವುದು ಕಥೆಗಾಗಿ. ಇಲ್ಲಿಯೂ ಕಥೆಯನ್ನೇ ಸಿದ್ಧಮಾಡಿಕೊಂಡಿದ್ದು. ನಂತರ ನಟರನ್ನು ಭೇಟಿ ಆಗಲು ಹೋದೆ. ಸುದೀಪ್ ನನ್ನ ಕುಟುಂಬದ ಸ್ನೇಹಿತ. ಶಿವಣ್ಣ ನನ್ನ ಬಿಗ್‌ ಬ್ರದರ್. ಇವರಿಬ್ಬರನ್ನೂ ಹೋಗಿ ‘ನೀವಿಬ್ಬರೂ ಒಟ್ಟಿಗೆ ಸೇರಿ ಸಿನಿಮಾ ಮಾಡ್ತೀರಾ?’ ಎಂದು ಕೇಳಿದಾಗ ಇಬ್ಬರೂ ಹೇಳಿದ್ದು ಒಂದೇ ಮಾತು; ‘ನೀನು ನಿರ್ದೇಶನ ಮಾಡು, ಮಾಡ್ತೀನಿ’ ಎಂದು. ಆ ಮಟ್ಟಕ್ಕೆ ಇಬ್ಬರಿಗೂ ನನ್ನ ಮೇಲೆ ಪ್ರೀತಿ ಇದೆ. 

ಒಂದು ಸಿನಿಮಾ ಜನರಿಗೆ ಮುಟ್ಟಬೇಕು ಎಂಬ ಉದ್ದೇಶದಿಂದ ಮಾಡುತ್ತೇನೆ. ಸ್ಟಾರ್‌ಗಳಿಗೆ ಅಂತಲೇ ಸಿನಿಮಾ ಮಾಡುವುದಿಲ್ಲ. ನಾನು ಅಂತ ಬಂದರೆ ಸ್ಟಾರ್‌ಗಿರಿ ಬರುತ್ತದೆ. ಆದರೆ, ‘ದಿ ವಿಲನ್’ ಸಿನಿಮಾವನ್ನು ‘ನಾವು’ ಎಂದುಕೊಂಡು ಮಾಡಿದ್ದೇವೆ. ನಮ್ಮನ್ನು ಪ್ರೀತಿಸುವವರಿಗೆ ಮಾತ್ರವಲ್ಲ; ಇಡೀ ಕನ್ನಡದ ಜನತೆಯೆಲ್ಲ ಬಂದು ನೋಡಲಿ ಎಂದು ಸಿನಿಮಾ ಮಾಡಿದ್ದೇನೆ. 

* ಇದಕ್ಕೂ ಮುನ್ನ ‘ಕಲಿ’ ಎನ್ನುವ ಒಂದು ಸಿನಿಮಾ ಮಾಡಲು ಪ್ರಯತ್ನ ಮಾಡಿದ್ದೀರಲ್ಲ?
ಎಲ್ಲರಿಗೂ ಗೊತ್ತಿರುವ ಹಾಗೆಯೇ ನಾನು ಮೊದಲು ಕಥೆ ಮಾಡಿಕೊಂಡಿದ್ದು ‘ಕಲಿ’ ಸಿನಿಮಾಗೆ. ಅದೊಂದು ಐತಿಹಾಸಿಕ ಸಿನಿಮಾ. ಅದು ನೂರು ಕೋಟಿ ಬಜೆಟ್ ಸಿನಿಮಾ. ಒಂದೇ ಭಾಷೆಗೆ ಮಾಡಿದರೆ ಅಷ್ಟು ಹಣ ವಾಪಸ್ ಬರುವುದು ಸಾಧ್ಯವಿಲ್ಲ. ಹಾಗಾಗಿ, ಮೂರು ಭಾಷೆಗಳಲ್ಲಿ ಮಾಡೋಣ ಎಂದು ಕನ್ನಡ, ತಮಿಳು, ತೆಲುಗು ಮೂರು ಭಾಷೆಯ ಸೂಪರ್‌ಸ್ಟಾರ್‌ಗಳನ್ನು ಕೇಳಿದೆ. ಆದರೆ, ಆಗ ಡೇಟ್‌ ಹೊಂದಿಕೆ ಆಗಲಿಲ್ಲ. ಕಮಲ್‌ಹಾಸನ್‌ ಅವರನ್ನೂ ಸಂಪರ್ಕಿಸಿದ್ದೆ. ಅವರು ಕಥೆ ಕೇಳಿ ಖುಷಿಪಟ್ಟಿದ್ದರು. ‘ನನಗೆ ಒಂದಿಷ್ಟು ಸಮಯ ಕೊಡು. ನನ್ನೆರಡು ಸಿನಿಮಾ ಮುಗಿಸಿ ನಿನ್ನ ಸಿನಿಮಾದಲ್ಲಿ ಮಾಡ್ತೀನಿ’ ಅಂದರು. ಆದರೆ, ಅಷ್ಟು ಕಾಲ ಮಿಕ್ಕ ಎರಡು ಭಾಷೆಯ ನಾಯಕರನ್ನು ಸುಮ್ಮನೇ ಕೂರಿಸಲು ನಾನು ಸಿದ್ಧನಿರಲಿಲ್ಲ. ಹಾಗಾಗಿ ‘ದಿ ವಿಲನ್’ ಕಥೆಯನ್ನು ಸಿದ್ಧಮಾಡಿದೆ.  

*‘ದಿ ವಿಲನ್’ ಚಿತ್ರದ ಒಂದು ಪತ್ರಿಕಾಗೋಷ್ಠಿಯಲ್ಲಿಯೂ ಸುದೀಪ್ ಇರಲಿಲ್ಲವಲ್ಲ..?
ಖಂಡಿತ ಹಾಗೇನೂ ಇಲ್ಲ. ಅವರು ವಿದೇಶದಲ್ಲಿ ಚಿತ್ರೀಕರಣದಲ್ಲಿದ್ದಾರೆ. ಈಗಷ್ಟೇ ದೂರವಾಣಿ ಕರೆ ಮಾಡಿ ‘ನಾನು ಏನು ಮಾಡಬೇಕು ಚಿನ್ನಾ?’ ಎಂದು ಕೇಳ್ತಿದ್ರು. ಶೂಟಿಂಗ್ ಕಮಿಟ್‌ಮೆಂಟು, ಅವ್ರಾದ್ರೂ ಏನು ಮಾಡ್ತಾರೆ? ಅವರು ನಮ್ ಡಾರ್ಲಿಂಗ್. ಅವರ ಕುರಿತು ಯಾವ ಆಕ್ಷೇಪವೂ ಇಲ್ಲ.  ಈ ಸಿನಿಮಾ ಮಾಡಬೇಕು ಎಂದು ನಾನು ನಟಿಸುತ್ತಿರುವ ‘ಗಾಂಧಿಗಿರಿ’ ಸಿನಿಮಾವನ್ನೂ ನಿಲ್ಲಿಸಿದ್ದೀನಿ. ಹಾಗೆಯೇ ನಾನು ಮತ್ತು ದರ್ಶನ್ ಒಂದು ಸಿನಿಮಾ ಮಾಡಬೇಕಿತ್ತು. ಅದನ್ನೂ ಮುಂದಕ್ಕೆ ಹಾಕಿ ಬೇರೆಯವರಿಗೆ ಕೊಟ್ಟುಬಿಟ್ಟೆ. ನನ್ನ ಹಾಗೆಯೇ ಸುದೀಪ್, ಶಿವಣ್ಣ ಅವರಿಗೂ ಬೇರೆ ಕಮಿಟ್‌ಮೆಂಟ್‌ಗಳಿರುತ್ತವಲ್ಲ, ಅದನ್ನು ಬಿಟ್ಟರೆ ಇನ್ನೇನೂ ಇಲ್ಲ. ‘ಪ್ರೇಮ್‌ ಇರಬೇಕಾದರೆ ನಾವೆಲ್ಲ ಯಾಕೆ ಬೇಕು ಬಿಡ್ರೀ’ ಅಂತಾರೆ ಅವರು.

*‘ದಿ ವಿಲನ್’ ಚಿತ್ರದಲ್ಲಿ ಕಥೆಯ ದೃಷ್ಟಿಯಿಂದ ಏನು ಹೊಸತಿದೆ?
‘ನಾವು ಏನೇ ಸಿನಿಮಾ ಮಾಡಿದ್ರೂ ರಾಮಾಯಣ– ಮಹಾಭಾರತ ಬಿಟ್ಟು ಮಾಡಕ್ಕಾಗುವುದೇ ಇಲ್ಲ’ ಅಂತ ಮಣಿರತ್ನಂ ಹೇಳ್ತಿದ್ರು. ಯಾಕೆಂದ್ರೆ ಯಾವುದೇ ಪಾತ್ರಗಳನ್ನು ತೆಗೆದುಕೊಂಡರೂ ಅದು ಆ ಮಹಾಕಾವ್ಯಗಳಲ್ಲಿ ಇದ್ದಿದ್ದೇ ಆಗಿರುತ್ತದೆ. ಅವುಗಳನ್ನೇ ಮತ್ತೆ ಹೇಳಬೇಕು, ಆದರೆ ಈಗಿನ ಪೀಳಿಗೆಗೆ ಹೊಂದಿಕೆಯಾಗುವ ಹಾಗೆ ಹೇಳಬೇಕು ಅಷ್ಟೆ. 

ಹೊಸದೇನೋ ನಾವೇ ಸೃಷ್ಟಿಸುತ್ತೇವೆ ಎನ್ನುವುದೆಲ್ಲ ಸುಳ್ಳು. ಒಳಿತು– ಕೆಡುಕು ಎನ್ನುವುದನ್ನು ನಮ್ಮ ರೀತಿಯಲ್ಲಿ ವಿಶ್ಲೇಷಿಸುತ್ತೇವೆ. ಅಮ್ಮ– ಮಗನ ಸೆಂಟಿಮೆಂಟ್ ಹೊಸತಾ? ಪ್ರೇಮಕಥೆ ಹೊಸತಾ? ಫೈಟ್ ಹೊಸತಾ? ಖಂಡಿತ ಅಲ್ಲ. ಅವುಗಳನ್ನೇ ಹೊಸ ರೀತಿಯಲ್ಲಿ ಹೇಳಬಹುದು. ನಾನೊಬ್ಬ ನಿರ್ದೇಶಕನಾಗಿ, ಪ್ರೇಕ್ಷಕ ಇಡೀ ಸಿನಿಮಾವನ್ನು ಕುತೂಹಲದಿಂದ ನೋಡುವ ಹಾಗೆ, ಅವನ ಬದುಕಿಗೆ ಹೊಂದಿಕೊಳ್ಳುವ ಹಾಗೆ, ಇದು ನನ್ನ ಬದುಕಿನಲ್ಲಿಯೂ ನಡೆದಿದೆಯಲ್ಲಾ ಎಂದು ಅನಿಸುವ ಹಾಗೆ ಕಥೆ ಹೇಳುವುದು ಮುಖ್ಯ. 

*ಸಿನಿಮಾ ನೋಡಲು ಬರುವವರಿಗೆ ಏನು ಹೇಳಲು ಇಷ್ಟಪಡ್ತೀರಾ?
 ‘ಜೋಗಿ’ ಅನ್ನುವ ಸಿನಿಮಾವನ್ನು ಮನಸಲ್ಲಿಟ್ಟುಕೊಂಡು ಈ ಸಿನಿಮಾಗೆ ಬರಬೇಡಿ. ಒಬ್ಬರು ಒಂದೇ ಸಲ ‘ಜೋಗಿ’ ಮಾಡಲು ಸಾಧ್ಯ. ಮತ್ತೆ ಮತ್ತೆ ಅದನ್ನೇ ಮಾಡುತ್ತಿರಲು ಸಾಧ್ಯವೇ ಇಲ್ಲ. ಹೋಲಿಕೆ ಮಾಡುವುದರಲ್ಲಿ ಅರ್ಥವಿಲ್ಲ. ‘ದಿ ವಿಲನ್’ ಸಿನಿಮಾವನ್ನು ನನ್ನ ಹಿಂದಿನ ಯಾವ ಸಿನಿಮಾಗೂ ಹೋಲಿಸಬೇಡಿ. ‘ಜೋಗಿ’ ಎನ್ನುವ ಹಣೆಪಟ್ಟಿಯನ್ನು ದಯವಿಟ್ಟು ನನ್ನಿಂದ ತೆಗೆಯಿರಿ ಎಂದು ಎಲ್ಲ ಅಭಿಮಾನಿಗಳಲ್ಲಿ ವಿನಂತಿಸಿಕೊಳ್ಳುತ್ತೇನೆ. 
 


‘ದಿ ವಿಲನ್’ ಚಿತ್ರದಲ್ಲಿ ಆ್ಯಮಿ ಜಾಕ್ಸನ್

* ಆ್ಯಮಿ ಜಾಕ್ಸನ್ ಕರೆದುಕೊಂಡು ಬಂದಿದ್ದೀರಿ. ಪರಭಾಷಾ ನಟಿಯರ ಮೇಲೆ ಯಾಕಷ್ಟು ವ್ಯಾಮೋಹ?
ಆ ರೀತಿ ಏನಿಲ್ಲ. ಈ ಚಿತ್ರದ ಪಾತ್ರಕ್ಕೆ ಆ್ಯಮಿ ಜಾಕ್ಸನ್ ಚೆನ್ನಾಗಿ ಹೊಂದುತ್ತಿದ್ದರು ಅಷ್ಟೆ. ನಾಯಕಿಯ ಆಯ್ಕೆ ಸಂದರ್ಭದಲ್ಲಿ ದಕ್ಷಿಣಭಾರತದ ಮೂವರು ನಟಿಯರನ್ನು ಕೇಳಿದ್ದೆ. ಅವರೆಲ್ಲ ಬ್ಯುಸಿ ಇದ್ದರು. ಆಗ ಆ ಪಾತ್ರಕ್ಕೆ ಯಾರು ಹೊಂದುತ್ತಾರೆ ಎಂದು ಯೋಚಿಸಿದಾಗ ಹೊಳೆದಿದ್ದು ಆ್ಯಮಿ ಜಾಕ್ಸನ್.  ನಮ್ಮ ನಾಯಕಿಯರು ಎಲ್ಲರೂ ಅದ್ಭುತವಾಗಿ ನಟಿಸುತ್ತಾರೆ. ಯಾರಿಗೂ ಕಡಿಮೆ ಇಲ್ಲ. ಆದರೆ ಅವರು ಕೆಲವರನ್ನು ಕೇಳಿದಾಗ ‘ಬ್ಯುಸಿ’ ಎಂತಾರೆ. ಆ ಮಾತನ್ನು ಕೇಳಲಿಕ್ಕೆ ನನಗೆ ಆಗುವುದಿಲ್ಲ. ನಾನೂ ಬ್ಯುಸಿ ಇರ್ತೀನಿ. ಸುದೀಪ್, ಶಿವಣ್ಣ ಎಲ್ಲರೂ ಬ್ಯುಸಿ ಇರ್ತಾರೆ. ಆದರೆ ಅವರೆಲ್ಲ ತುಂಬ ಪ್ರೀತಿಯಿಂದ ಬಂದು ನಟಿಸಿದರು. ಎಲ್ಲರೂ ಅವರವರ ಕೆಲಸದಲ್ಲಿ ಬ್ಯುಸಿ ಇರ್ತಾರೆ. ಹಾಗಂತ ಪ್ರೇಮ್‌ನ ಮಾತನಾಡಿಸುವುದಿಲ್ಲ ಎಂದರೆ ಹೇಗೆ? ಹಾಗಾದಾಗ ಬೇರೆ ಭಾಷೆಯ ನಟಿಯರನ್ನು ಕರೆತರುವುದು ಅನಿವಾರ್ಯವಾಗುತ್ತದೆ. 

* ಸ್ಟಾರ್‌ವಾರ್‌ ಕುರಿತು ನಿಮ್ಮ ಅನಿಸಿಕೆ ಏನು?

ಬೇರೆ ಯಾವ ಭಾಷೆಗಳಲ್ಲಿಯೂ ಹೀಗಾಗುವುದಿಲ್ಲ. ಇಲ್ಲಿಯೇ ಯಾಕೆ ಹೀಗಾಗುತ್ತದೆ? ಇದು ಸಿನಿಮಾ. ಸಿನಿಮಾವನ್ನು ಸಿನಿಮಾ ಥರ ನೋಡಿ. ವೈಯಕ್ತಿಕವಾಗಿ ನೋಡಬೇಡಿ. ಆಗ ಇಷ್ಟವಾಗುತ್ತದೆ. ಸಿನಿಮಾದಲ್ಲಿನ ಪಾತ್ರದಲ್ಲಿ ನಿಮ್ಮ ಅಣ್ಣನ, ತಮ್ಮನನ್ನು, ಬಂಧು ಬಳಗವನ್ನು ಕಂಡುಕೊಂಡು ನೋಡಿ. ಒಳ್ಳೆಯತನ ಕೆಟ್ಟತನ ಎಲ್ಲರಲ್ಲಿಯೂ ಇರುತ್ತದಲ್ಲವೇ? 

ನಮ್ಮ ಕನ್ನಡ ಚಿತ್ರರಂಗ ಬೆಳೆಯಲು ಇಂಥ ಸಿನಿಮಾಗಳು ಅಗತ್ಯ. ಸುಮ್ಮನೆ ಬೋರ್ಡ್‌ ಇಟ್ಟುಕೊಂಡು ಭಾಷಣ ಮಾಡುವುದರಿಂದ, ಟ್ವಿಟರ್, ಫೇಸ್‌ಬುಕ್‌ಗಳಲ್ಲಿ ‘ಕನ್ನಡ ಉಳಿಸಿ; ಕನ್ನಡ ಬೆಳೆಸಿ’ ಎಂದೆಲ್ಲ ಹೇಳುತ್ತಿರುತ್ತೇವೆ. ಹೀಗೆ ಕಿತ್ತಾಡ್ಕೊಂಡು ಇದ್ರೆ ಕನ್ನಡ ಎಲ್ಲಿ ಬೆಳೆಯುತ್ತದೆ? ಬೇರೆ ಭಾಷೆಯವರು ಆಡಿಕೊಳ್ಳಲ್ವಾ? ಗಲಾಟೆ ಮಾಡಿದ್ರೆ ಬೇರೆ ನಾಯಕರು ಮತ್ತೆ ಇಂಥ ಸಿನಿಮಾ ಮಾಡಲಿಕ್ಕೆ ಮುಂದೆ ಬರುತ್ತಾರೆಯೇ? ಕುಟುಂಬ ಪ್ರೇಕ್ಷಕರು ಚಿತ್ರಮಂದಿರಕ್ಕೆ ಬರುತ್ತಾರೆಯೇ? 

ನಮ್ಮ ಕರ್ನಾಟಕದಲ್ಲಿರುವಷ್ಟು ಪ್ರಬುದ್ಧ ಪ್ರೇಕ್ಷಕರು ಎಲ್ಲಿಯೂ ಇಲ್ಲ. ಆದ್ದರಿಂದ ನಮ್ಮ ಕಾಲನ್ನು ನಾವೇ ಎಳೆದುಕೊಳ್ಳುವುದು ಬೇಡ. ಹಾಗಾಗಿ ಸಿನಿಮಾವನ್ನು ಸಿನಿಮಾ ರೀತಿ ನೋಡಿ, ನಾವು ಬೇರೆ ಭಾಷೆಗಳಿಗಿಂತ ಯಾವ ರೀತಿಯಲ್ಲಿಯೂ ಕಡಿಮೆ ಇಲ್ಲ ಎಂದು ತೋರಿಸಿ ಎಂದು ಎಲ್ಲರಲ್ಲಿಯೂ ಬೇಡಿಕೊಳ್ಳುತ್ತೇನೆ.

ರಜನೀಕಾಂತ್‌ಗೆ ಬೇಡ ಎಂದಿದ್ದೆ: ನನಗೆ ಸ್ಟಾರ್‌ಗಿರಿಗಿಂತ ಕಥೆ ತುಂಬ ಮುಖ್ಯ. ಸ್ಟಾರ್‌ಗಿರಿಯೇ ಮುಖ್ಯ ಆಗಿದ್ದರೆ ನಾನು ರಜನೀಕಾಂತ್ ಅವರಿಗೇ ಸಿನಿಮಾ ಮಾಡ್ತಿದ್ದೆ. ‘ಜೋಗಿ’ ಸಿನಿಮಾದಲ್ಲಿ ನಟಿಸಲು ಅವರು ಒಪ್ಪಿಕೊಂಡಿದ್ದರು. ಆದರೆ ನಾನು ಒಂದು ತಿಂಗಳು ಕೂತು ಯೋಚಿಸಿದೆ. ಎಲ್ಲರೂ ಬೈದರು ನನಗೆ.

ಅಪ್ಪಾಜಿ (ರಾಜ್‌ಕುಮಾರ್) ನನ್ನ ಕರೆದು, ‘ನಿನ್ನ ಪ್ರತಿಭೆ ಇಡೀ ಭಾರತಕ್ಕೇ ಗೊತ್ತಾಗುತ್ತದೆ. ಹೋಗು, ರಜನೀಕಾಂತ್ ಹಾಕ್ಕೊಂಡು ಸಿನಿಮಾ ಮಾಡು’ ಅಂದ್ರು. ನಾನು ಒಂದು ತಿಂಗಳು ಯೋಚನೆ ಮಾಡಿ ನಂತರ ರಜನೀಕಾಂತ್ ಕಾಲಿಗೆ ನಮಸ್ಕರಿಸಿ ‘ಸರ್, ಈ ಸಿನಿಮಾ ಕಥೆ ನಿಮಗೆ ಹೊಂದಿಕೆಯಾಗುವುದಿಲ್ಲ. ದಯವಿಟ್ಟು ಬೇಡ’ ಎಂದು ಹೇಳಿದೆ. ಯಾಕೆಂದರೆ ಅವರ ಸ್ಟಾರ್‌ಗಿರಿಯನ್ನು ಸಂಭಾಳಿಸುವುದು ಜೋಗಿ ಕಥೆಗೆ ಕಷ್ಟ. 

*

ಇಲ್ಲಿ ಯಾರೂ ಸೂಪರ್‌ಸ್ಟಾರ್‌ಗಳಲ್ಲ. ರೈತ ದಿನ ಬೆಳಿಗ್ಗೆ ಎದ್ದು ಕೆಲಸ ಮಾಡುತ್ತಾನಲ್ಲಾ, ನಾವು ಮಾಡುವ ಕೆಲಸವೂ ಅಂಥದ್ದೇ. ನಾವು ಪ್ಯಾಂಟು, ಶರ್ಟು ಹಾಕ್ಕೊಂಡು ಕೆಲಸ ಮಾಡ್ತೀವಿ. ಅವನು ಚಡ್ಡಿ ಹಾಕ್ಕೊಂಡು ಮಾಡ್ತಾನೆ. ಅಷ್ಟೇ ವ್ಯತ್ಯಾಸ.

-ಪ್ರೇಮ್, ನಿರ್ದೇಶಕ

ಬರಹ ಇಷ್ಟವಾಯಿತೆ?

  • 2

    Happy
  • 0

    Amused
  • 1

    Sad
  • 0

    Frustrated
  • 1

    Angry

Comments:

0 comments

Write the first review for this !