ಮಾನವತ್ವದ ‘ಮಿರಾಕಲ್ ಆನ್ ವೀಲ್ಸ್‌’

7

ಮಾನವತ್ವದ ‘ಮಿರಾಕಲ್ ಆನ್ ವೀಲ್ಸ್‌’

Published:
Updated:

‘ಸರ್ವೇ ಜನಾಃ ಸುಖಿನೋ ಭವಂತು’. ಈ ಮಾತಿಗೆ ಕಟ್ಟುಬಿದ್ದು ಅಂಗವಿಕಲರಿಗೆ ತಮ್ಮ ಜೀವನ ಮುಡುಪಾಗಿಟ್ಟವರು ಮಾಹಿರಾ ಜಾನ್ ಪಾಷಾ ಹಾಗೂ ಸೈಯದ್ ಸಲ್ಲಾವುದ್ದೀನ್ ದಂಪತಿ.  ತಮಿಳುನಾಡಿನ ಮಧುರೈನ ಮುಸ್ಲಿಂ ಕುಟುಂಬದಲ್ಲಿ ಜನಿಸಿದ ಮಾಹಿರಾ ಅವರಿಗೆ ಬಾಲ್ಯದಿಂದಲೂ, ಸಮಾಜದಲ್ಲಿ ಎಲ್ಲರಂತೆ ಕಾಣಿಸಿಕೊಳ್ಳದೆ, ಕಾಣಿಸಿ ಕೊಳ್ಳಲಾಗದೆ ಕೊರಗುತ್ತಿರುವ ಅಂಗವಿಕಲರ ಬಗ್ಗೆ ವಿಶೇಷ ಕಾಳಜಿ. ಆಗಿನಿಂದಲೂ ಸಣ್ಣಪುಟ್ಟ ಸಹಾಯ ಮಾಡಿಕೊಂಡು ಬಂದ ಅವರಿಗೆ ವಿವಾಹದ ನಂತರ ಬೆನ್ನೆಲುಬಾಗಿ ನಿಂತವರು ಸೈಯದ್.

ಹುಟ್ಟಿದ ಎಲ್ಲರಿಗೂ ಎಲ್ಲರಂತೆ ಬದುಕುವ ಆಸೆ, ಹಕ್ಕಿದೆ. ಅಂಗವೈಕಲ್ಯ ಎಂಬ ಅಳಿಸಲಾಗದ ಪಟ್ಟ ಕಟ್ಟಿಕೊಂಡು ಆಸೆಗಳನ್ನು ಈಡೇರಿಸಿಕೊಳ್ಳಲಾಗದೆ ನರಳುವುದು ನರಕಯಾತನೆ ಎನ್ನುವ ಈ ದಂಪತಿ, ಅವರಿಗೆ ನೆರವಾಗಲು ಸ್ಥಾಪಿಸಿದ ಸಂಸ್ಥೆ ‘ಮಿರಾಕಲ್ ಆನ್ ವೀಲ್ಸ್’. ಇದು ಅಂಗವಿಕಲರಿಂದ ಕೂಡಿದ ಅದ್ಭುತವಾದ ಮಾಯಾಲೋಕ.

ಮುಸ್ಲಿಂ ಕುಟುಂಬದಲ್ಲಿ ಹುಟ್ಟಿದರೂ ಭರತನಾಟ್ಯಕ್ಕೆ ಮನಸೋತು ಅದರಲ್ಲಿ ಪಾಂಡಿತ್ಯ ಸಾಧಿಸಿರುವ ಮಾಹಿರಾ ಅದ್ಭುತವಾದ ನೃತ್ಯ ಕಲಾವಿದೆ. ಕಾಲಿಲ್ಲದೆ ಗಾಲಿ ಕುರ್ಚಿಯ ಮೇಲೆಯೇ ನಡೆದಾಡುವವರ ನರ್ತಿಸುವ ಆಸೆಗೆ ಜೀವ ತುಂಬಿದ ದಂಪತಿ, ‘ಮಿರಾಕಲ್ ಆನ್ ವೀಲ್ಸ್‌’ ನೇತೃತ್ವದಲ್ಲಿ ಮಾನವತ್ವ ಸಾರುವ ಅನೇಕ ನೃತ್ಯ ರೂಪಕಗಳ ಪ್ರದರ್ಶಿಸಿ ಸೈ ಎನಿಸಿಕೊಂಡಿದ್ದಾರೆ.

ಅಂಗವೈಕಲ್ಯಕ್ಕೆ ನೆರವಾಗುವ ಉಪಕರಣಗಳನ್ನೇ ಅಂಗವಿಕಲರ ಶಕ್ತಿಯಾಗಿ ಪರಿವರ್ತಿಸಬೇಕೆಂಬ ಉದ್ದೇಶದಿಂದ ವೀಲ್‌ಚೇರ್ ಮೇಲೆ ಭರತನಾಟ್ಯ, ಕಥಕ್ಕಳಿ, ಸೂಫಿ ಸೇರಿದಂತೆ ಕ್ಲಿಷ್ಟಕರ ನೃತ್ಯ ಪ್ರಯೋಗ ಹಾಗೂ ಸಮರ ಕಲೆಗಳ ತರಬೇತಿಯನ್ನು ಅಂಗವಿಕಲರಿಗೆ ನೀಡಿದ್ದಾರೆ. ಈ ರೀತಿಯ ಪ್ರಯೋಗಗಳನ್ನು ಮಾಡಿದವರಲ್ಲಿ ಇವರೇ ಮೊದಲಿಗರು.

ನೃತ್ಯ ಕಲಾವಿದರೂ ನಾಚುವಂತೆ ವೇದಿಕೆ ಮೇಲೆ ನರ್ತಿಸುತ್ತಾರೆ ಮಾಹಿರಾ ಗರಡಿಯಲ್ಲಿ ಪಳಗಿದವರು. ದೇಶದಾದ್ಯಂತ ಸಾವಿರಾರು ಪ್ರದರ್ಶನ ನೀಡಿರುವ ‘ಮಿರಾಕಲ್ ಆನ್ ವೀಲ್ಸ್’ ತಂಡ ಮಲೇಷಿಯಾ, ರಷ್ಯಾ, ಇಂಗ್ಲೆಂಡ್‌ನಲ್ಲೂ ತಮ್ಮ ಪ್ರತಿಭೆಯ ಝಲಕ್ ಅನ್ನು ತೋರಿದ್ದಾರೆ. ಆ ಮೂಲಕ ಲಿಮ್ಕಾ, ಗಿನ್ನಿಸ್ ದಾಖಲೆ ನಿರ್ಮಿಸಿದ್ದಾರೆ.

ಕಿವಿ ಕೇಳದ ಹಾಗೂ ಮಾತು ಬಾರದವರಿಗೆಂದೇ ಸನ್ನೆ ಭಾಷೆಯ ಕೋರ್ಸ್ ಆರಂಭಿಸಿರುವ ಮಾಹಿರಾ, ಸಂವಹನ ನಡೆಸಲಾಗದ ಅದೆಷ್ಟೊ ಅಂಗವಿಕಲ ಕೊರತೆ ನೀಗಿಸಿದ್ದಾರೆ. ಬಡತನದ ಬೇಗೆಯಲ್ಲಿ ಬೆಂದ ಅಂಗವಿಕಲರನ್ನು ಗುರುತಿಸಿ ಅವರೊಡನೆ ಅವರನ್ನು ಸಮಾಜದ ಮುನ್ನಲೆಗೆ ತರುತ್ತಿದ್ದಾರೆ. ಅಂಗವಿಕಲರ ಆಸಕ್ತಿಗನುಗುಣವಾಗಿ ವೃತ್ತಿ ತರಬೇತಿಯನ್ನು ಸಂಸ್ಥೆ ವತಿಯಿಂದ ನೀಡಲಾಗುತ್ತಿದೆ. ಟೈಲರಿಂಗ್, ಲೈಟಿಂಗ್, ಫ್ಯಾಶನ್ ಡಿಸೈನಿಂಗ್, ಕಾಸ್ಟ್ಯೂಮ್ ತರಬೇತಿ, ಕಂಪ್ಯೂಟರ್, ಫಿಲ್ಮ್‌ಮೇಕಿಂಗ್, ನಟನೆ, ಪೋಟೊಗ್ರಫಿ, ಪಡೆದ ನೂರಾರು ಮಂದಿ ಸ್ವಾವಲಂಬನೆಯ ಬದುಕು ಕಟ್ಟಿಕೊಂಡಿದ್ದಾರೆ.

ಈ ಸಂಸ್ಥೆ ಸದ್ಯ ದೊಡ್ಡದೊಂದು ಯೋಜನೆ ರೂಪಿಸಿದ್ದು, ಸಾವಿರಾರು ಮಂದಿ ಅಂಗವಿಕಲರಿಗೆ ಆಶ್ರಯ ನೀಡುವ ಉದ್ದೇಶದೊಂದಿಗೆ ಆನೇಕಲ್ ಬಳಿ ಸಂಸ್ಥೆ ಕಟ್ಟಲು ಮುಂದಾಗಿದೆ. ಅಂಗವಿಕಲರ ತಂಡ ಕಟ್ಟಿಕೊಂಡು ಸಮಾಜದಲ್ಲಿ ಹೊಸ ಅಲೆ ಸೃಷ್ಟಿಗೆ ಮಾಹಿರಾ ಸಜ್ಜಾಗಿದ್ದಾರೆ. ಅದಕ್ಕೆ ಅವರು ಸಹಾಯದ ನೆರವನ್ನು ಆಪೇಕ್ಷಿಸುತ್ತಿದ್ದಾರೆ.

ಅಂಗವಿಕಲರೇ ಮಕ್ಕಳು


ಮಾಹಿರಾ

ಮುಸ್ಲಿಂ ಆಗಿದ್ದರೂ ಭಗವದ್ಗೀತೆ, ರಾಮಾಯಾಣ ಕುರಿತ ಕಾರ್ಯಾಗಾರಗಳನ್ನು ಮಾಹಿರಾ ನಡೆಸಿಕೊಟ್ಟಿದ್ದು, ಸರ್ವ ಧರ್ಮ ಸಮನ್ವಯ ಕಾಯ್ದುಕೊಂಡಿದ್ದಾರೆ. ಮಿರಾಕಲ್‌ ಸಂಸ್ಥೆಯಲ್ಲೂ ಎಲ್ಲ ಧರ್ಮದವರಿಗೆ ಆಶ್ರಯ ನೀಡಿದ್ದಾರೆ.

ಮಕ್ಕಳಿಲ್ಲದ ಕೊರಗನ್ನು ಅಂಗವಿಕಲರೇ ನೀಗಿಸಿದ್ದಾರೆ ಎನ್ನುವ ಈ ದಂಪತಿ, ಸಂಸ್ಥೆಯಲ್ಲಿ ಆಶ್ರಯ ಪಡೆದವರೇ ನಮ್ಮ ಕುಟುಂಬ. ಅವರಿಂದಲೇ ದಿನ ಪ್ರಾರಂಭ. ಅವರಿಂದಲೇ ದಿನ ಅಂತ್ಯ. ಅವರನ್ನು ನೋಡುತ್ತಲೇ ಒಂದು ದಿನ ದೈವಿಕರಾಗುತ್ತೇವೆ ಎನ್ನುತ್ತಾರೆ.

ಸಂಪರ್ಕ: 9597167987 / 9811340308. ಹೆಚ್ಚಿನ ಮಾಹಿತಿಗೆ:www.miracleonwheels.in / info@miracleonwheels.in

ಬರಹ ಇಷ್ಟವಾಯಿತೆ?

  • 1

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !