ಬಂಡೀಪುರ: ಅವಳಿ ಮರಿಗಳಿಗೆ ಜನ್ಮನೀಡಿದ ಆನೆ

‘ಬಂಡೀಪುರ ವಲಯದಲ್ಲಿ ಭಾನುವಾರ ಆನೆಯು ಎರಡು ಮರಿಗಳಿಗೆ ಜನ್ಮ ನೀಡಿದೆ. ತಾಯಿ ಮತ್ತು ಎರಡು ಮರಿಗಳೂ ಆರೋಗ್ಯವಾಗಿವೆ. ಇದು ಅಪರೂಪದ ಪ್ರಕರಣ’ ಎಂದು ಬಂಡೀಪುರ ಉಪ ವಿಭಾಗದ ಸಹಾಯಕ ಅರಣ್ಯ ಸಂರಕ್ಷಣಾಧಿಕಾರಿ ನವೀನ್ ಅವರು ‘ಪ್ರಜಾವಾಣಿ’ಗೆ ಮಾಹಿತಿ ನೀಡಿದರು.

ಸೋಮವಾರ ಸಫಾರಿಗೆ ಹೋದವರಿಗೆ ತಾಯಿ ಆನೆಯ ಜೊತೆ ಎರಡು ಮರಿಯಾನೆಗಳು ಚಿನ್ನಾಟ ಆಡುವ ದೃಶ್ಯ ಕಂಡಿದೆ. ಕೆಲವರು ಫೋಟೊವನ್ನೂ ತೆಗೆದಿದ್ದಾರೆ.

‘40 ವರ್ಷಗಳಿಂದ ಇಂತಹ ಅಪರೂಪದ ಪ್ರಕರಣ ಈ ಅರಣ್ಯ ಪ್ರದೇಶದಲ್ಲಿ ನಡೆದಿಲ್ಲ ಎಂದು ಬಂಡೀಪುರದ ಸಿಬ್ಬಂದಿ ಹೇಳುತ್ತಾರೆ. ಆನೆ ಹಾಗೂ ಮರಿಗಳನ್ನು ನಾನೂ ನೋಡಿದ್ದೇನೆ. ಈ ಮೊದಲು ನಮ್ಮಲ್ಲಿ ಆನೆ ಅವಳಿ ಮರಿಗಳಿಗೆ ಜನ್ಮ ನೀಡಿರುವುದು ನನ್ನ ಗಮನಕ್ಕೆ ಬಂದಿಲ್ಲ’ ಎಂದು ವನ್ಯಜೀವಿ ಛಾಯಾಗ್ರಾಹಕ ಆರ್.ಕೆ.ಮಧು ಅವರು ತಿಳಿಸಿದರು.