ಜೇನುನೊಣ ಕೊಲ್ಲುವ ಕಣಜದ ಗೂಡು ಅಮೆರಿಕದಲ್ಲಿ ಪತ್ತೆ: ನಾಶಕ್ಕೆ ಕೃಷಿ ಇಲಾಖೆ ಯೋಜನೆ

ಸ್ಥಳೀಯ ಜೇನು ನೊಣಗಳನ್ನು ರಕ್ಷಿಸುವುದಕ್ಕಾಗಿ ಹಾನಿಕಾರಕ ಕಣಜ ಮತ್ತು ಅವುಗಳ ಗೂಡುಗಳನ್ನು ನಾಶಪಡಿಲು ವಿಜ್ಞಾನಿಗಳು ಯೋಜನೆ ರೂಪಿಸಿದ್ದಾರೆ.

ಏಷ್ಯಾದ ದೈತ್ಯ ಕಣಜದ ಗೂಡುಗಳನ್ನು ಪತ್ತೆ ಮಾಡಲು ಬಲೆ ಸೇರಿದಂತೆ ವಿವಿಧ ಪರಿಕರಗಳೊಂದಿಗೆ ಕೃಷಿ ಇಲಾಖೆಯ ನೌಕರರು ವಾರಗಟ್ಟಲೆ ಶ್ರಮ ಪಟ್ಟಿದ್ದಾರೆ. ಈ ಕಣಜ ವಿಷಜಂತುವಾಗಿದ್ದು ಮನುಷ್ಯರಿಗೆ ಕಚ್ಚಿದರೆ ಅಪಾಯವಾಗಲೂಬಹುದು. ಮಾತ್ರವಲ್ಲ, ಬೆಳೆಗಳ ಪರಾಗಸ್ಪರ್ಶಕ್ಕೆ ನೆರವಾಗುವ ಜೇನು ನೊಣಗಳನ್ನೂ ನಾಶ ಮಾಡುತ್ತದೆ.

ಇಲಾಖೆಯ ವಕ್ತಾರ ಕರ್ಲಾ ಸಲ್ಫ್ ಅವರು ಈ ದೈತ್ಯ ಕಣಜದ ಗೂಡು ಪತ್ತೆ ಮಾಡಿರುವ ವಿಷಯವನ್ನು ವರ್ಚುವಲ್ ಸಭೆಯಲ್ಲಿ ತಿಳಿಸಿದ್ದಾರೆ. ‘ಪ್ರತಿಕೂಲ ಹವಾಮಾನದ ಕಾರಣದಿಂದಾಗಿ ಶುಕ್ರವಾರ ಸಿಯಾಟಲ್‌ನ ಉತ್ತರ ನಗರ ಬ್ಲೇನ್‌ನಲ್ಲಿ ಕಂಡು ಬರುವ ದೈತ್ಯ ಕಣಜದ ಗೂಡುಗಳನ್ನು ನಾಶಪಡಿಸಲು ವಿಳಂಬವಾಗಿದೆ’ ಎಂದು ಹೇಳಿದರು.

‘ಈ ಕಣಜದ ಗೂಡು ಬ್ಯಾಸ್ಕೆಟ್‌ ಬಾಲ್‌ನಷ್ಟು ದಪ್ಪನಾಗಿರುತ್ತದೆ. ಆ ಗೂಡಿನಲ್ಲಿ 100 ರಿಂದ 200 ಕಣಜಗಳು ಇರುತ್ತವೆ ಎಂದು ವಿಜ್ಞಾನಿಗಳು ಹೇಳಿದ್ದಾರೆ. ಈ ಆಕ್ರಮಣಕಾರಿ ಕಣಜಗಳು, ಕಳೆದ ವರ್ಷದ ಕೊನೆಯಲ್ಲಿ ಕಾಣಿಸಿಕೊಳ್ಳಲು ಪ್ರಾರಂಭಿಸಿದ್ದವು. ಆಗಿನಿಂದಲೂ ಈ ಪ್ರದೇಶದಲ್ಲಿರಬಹುದು ಎಂದು ವಿಜ್ಞಾನಿಗಳು ಶಂಕಿಸಿದ್ದಾರೆ. ಆದರೆ, ಈ ಕಣಜಗಳು ಉತ್ತರ ಅಮೆರಿಕಾಕ್ಕೆ ಹೇಗೆ ಬಂದಿವೆ ಎಂದು ತಿಳಿದಿಲ್ಲ’ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.