ವನ್ಯಜೀವಿ ಸಂರಕ್ಷಕನ ಪ್ರಾಣಿಪ್ರೀತಿ

7

ವನ್ಯಜೀವಿ ಸಂರಕ್ಷಕನ ಪ್ರಾಣಿಪ್ರೀತಿ

Published:
Updated:
Deccan Herald

ಪರಿಸರ ಹಾಗೂ ವನ್ಯಜೀವಿ ಸಂರಕ್ಷಣೆಯಲ್ಲಿ ಕಟಿಬದ್ಧರಾಗಿ ತೊಡಗಿಸಿಕೊಂಡವರು ನಗರದ ವನ್ಯಜೀವಿ ಸಂರಕ್ಷಕ ಪ್ರಸನ್ನ ಕುಮಾರ್‌ ಎ. ಬಿಬಿಎಂಪಿ ವನ್ಯಜೀವಿ ಅಪರಾಧ ನಿಯಂತ್ರಣ ದಳ ಹಾಗೂ ವನ್ಯಜೀವಿ ಸಂರಕ್ಷಕರ ತಂಡದ ಸದಸ್ಯರಾಗಿರುವ ಅವರು ಬೆಂಗಳೂರು ನಗರ ಹಾಗೂ ಗ್ರಾಮಾಂತರ ಜಿಲ್ಲೆಯಲ್ಲಿ ವನ್ಯಜೀವಿಗಳ ರಕ್ಷಣೆಯಲ್ಲಿ 15 ವರ್ಷಗಳಿಂದಲೂ ತೊಡಗಿಕೊಂಡಿದ್ದಾರೆ.

14 ವರ್ಷದ ಬಾಲಕನಾಗಿರುವಾಗಲೇ ವನ್ಯಜೀವಿಗಳ ಒಡನಾಟ ಆರಂಭವಾಯಿತಂತೆ. ಬೆಕ್ಕಿನಗೆರೆ ಗ್ರಾಮದ ದಾಸನಪುರದ ಸಮೀಪದ ಹಳ್ಳಿಯಲ್ಲಿ ಹುಟ್ಟಿ ಬೆಳೆದ ಅವರ ಕುಟುಂಬದ ಮುಖ್ಯ ಕೆಲಸ ಕುರಿ ಮೇಯಿಸುವುದು ಹಾಗೂ ವ್ಯವಸಾಯ. ಬಳಿಕ ಕುಟುಂಬ ತುರಹಳ್ಳಿಗೆ ಸ್ಥಳಾಂತರವಾಯಿತು. ಅದೇ ವೇಳೆ ಅಲ್ಲಿ ವನ್ಯಜೀವಿಗಳ ಪುನರ್ವಸತಿ ಕೇಂದ್ರ ಸ್ಥಾಪನೆಯಾಯಿತು. ಇದು ಪ್ರಸನ್ನಕುಮಾರ್‌ ಜೀವನಕ್ಕೆ ತಿರುವು ನೀಡಿತು.

ಆ ಕೇಂದ್ರದಲ್ಲಿ ವ್ಯವಸ್ಥಾಪಕರಾಗಿದ್ದ ಬಾಬು ಎಂಬುವವರು ಪ್ರಾಣಿ ಬೇಟೆಯಿಂದ ಪರಿಸರ ಸಮತೋಲನಕ್ಕೆ ಆಗುವ ನಷ್ಟ, ಮಾನವ– ಪ್ರಾಣಿಗಳ ಸಂಘರ್ಷದ ಬಗ್ಗೆ ತಿಳಿಸಿ ಹೇಳಿ, ಪ್ರಸನ್ನ ಅವರ ಅಪ್ಪ– ಅಮ್ಮನಿಗೆ ಪ್ರಾಣಿಪಾಲಕರಾಗಿ ಕೆಲಸ ಕೊಡಿಸಿದರು. ಆಗ ಪ್ರಸನ್ನಗೆ 14 ವರ್ಷ. ಅಮ್ಮ ಹಗಲು ಹೊತ್ತಿನಲ್ಲಿ ಕೇಂದ್ರದಲ್ಲಿ ಕೆಲಸ ಮಾಡಿದರೆ, ಅಪ್ಪ ರಾತ್ರಿ ಕೆಲಸ ಮಾಡುತ್ತಿದ್ದರು. ಅಲ್ಲಿ ಕೋತಿಮರಿಗಳ ಆರೈಕೆ, ಗಾಯಗೊಂಡ ಪ್ರಾಣಿಗಳ ಕಾಳಜಿಯನ್ನು ಮಾಡುವುದನ್ನು ಪ್ರಸನ್ನ ನೋಡುತ್ತಿದ್ದರು. ಹಾಗೇ ಪ್ರಾಣಿಗಳ ಜೊತೆ ಒಡನಾಟ ಆರಂಭವಾಯಿತು.

2005ರಲ್ಲಿ ಪ್ರಸನ್ನ ವನ್ಯಜೀವಿ ಪುನರ್ವಸತಿ ಕೇಂದ್ರದಲ್ಲಿ ಪೂರ್ಣಪ್ರಮಾಣದಲ್ಲಿ ಸ್ವಯಂಸೇವಕರಾಗಿ ಸೇರಿಕೊಂಡರು. ಅಲ್ಲಿನ ವೈದ್ಯರ ಜೊತೆ ಸಹಾಯಕನಾಗಿ ಕೆಲಸ ಮಾಡುತ್ತಾ ಮೂರು ವರ್ಷಗಳ ಕಾಲ ವನ್ಯಜೀವಿ ರಕ್ಷಣೆ ಹಾಗೂ ಪರಿಸರ ಕಾಳಜಿ ಬಗ್ಗೆ ತರಬೇತಿ ಪಡೆದುಕೊಂಡರು. ‘ಆಗ ಪ್ರಾಣಿಗಳ ಜೊತೆ ಹೆಚ್ಚು ಕಾಲ ಇದ್ದಿದ್ದರಿಂದ ಅವುಗಳ ಸ್ವಭಾವವನ್ನೂ ಅರ್ಥ ಮಾಡಿಕೊಳ್ಳಲು ಸಹಾಯವಾಯಿತು. ಗಾಯಗೊಂಡ ಪ್ರಾಣಿಗಳ ರಕ್ಷಣೆ, ಹಾವು ಹಾಗೂ ಬೇರೆ ಬೇರೆ ಹಕ್ಕಿಗಳನ್ನು ರಕ್ಷಣೆ ಮಾಡುವುದನ್ನು ಕಲಿತುಕೊಂಡೆ’ ಎಂದು ಹೇಳುತ್ತಾರೆ ಪ್ರಸನ್ನ.

2008ರಲ್ಲಿ ಬಿಬಿಎಂಪಿಯಲ್ಲಿ ಅರಣ್ಯ ಘಟಕ ಆರಂಭವಾಯಿತು. ಅದರಲ್ಲಿ ವನ್ಯಜೀವಿ ಸಂರಕ್ಷಕನಾಗಿ ಕೆಲಸಕ್ಕೆ ಸೇರಿದರು. ಈವೆರೆಗೂ ಸಾವಿರಕ್ಕೂ ಹೆಚ್ಚು ಹಾವುಗಳನ್ನು ರಕ್ಷಣೆ ಮಾಡಿ, ಸುರಕ್ಷಿತ ಸ್ಥಳಕ್ಕೆ ಬಿಟ್ಟಿದ್ದಾರೆ. ಅಪಘಾತದಿಂದ ಗಾಯಗೊಂಡ ದನ, ನಾಯಿಗಳನ್ನು ರಕ್ಷಿಸಿದ್ದಾರೆ. ದಾರ, ಎತ್ತರದ ಕಟ್ಟಡಗಳಿಂದ ಗಾಯಗೊಂಡ ಪಕ್ಷಿಗಳನ್ನು ಉಪಚರಿಸಿದ್ದಾರೆ. 

‘2015ರಲ್ಲಿ ಚೈನೀಸ್‌ ಮಾಂಜ ಎಂಬ ಗಾಳಿಪಟ ದಾರವು ಹದ್ದು, ಬಾವಲಿ, ಗೂಬೆ, ಗಿಳಿಗಳ ಪ್ರಾಣಕ್ಕೆ ಕಂಟಕವಾಗುತ್ತಿತ್ತು. ಆ ದಾರ ಅವುಗಳ ಕತ್ತನ್ನೇ ಸೀಳಿ, ಸಾಯುವಂತಹ ಸ್ಥಿತಿ ನಿರ್ಮಾಣವಾಗುತ್ತಿತ್ತು. ದೊಡ್ಡ ದೊಡ್ಡ ಮರಗಳಲ್ಲಿ ಅಪಾಯದಲ್ಲಿ ಸಿಲುಕುವ ಪಕ್ಷಿಗಳನ್ನು ಕಡಿಮೆ ಸಮಯದಲ್ಲಿ ರಕ್ಷಿಸುವುದೇ ದುಸ್ತರವಾಗಿತ್ತು. ಹೀಗಾಗಿ ದಾರವನ್ನೇ ನಿಷೇಧ ಮಾಡುವಂತೆ ಸರ್ಕಾರಕ್ಕೆ ನಮ್ಮ ತಂಡ ಮನವಿ ಮಾಡಿತು. ಸರ್ಕಾರ 2016ರಲ್ಲೇ ಆ ದಾರವನ್ನು ರಾಜ್ಯದೆಲ್ಲೆಡೆ ನಿಷೇಧ ಮಾಡಿದೆ’ ಎಂದು ಖುಷಿ ವ್ಯಕ್ತಪಡಿಸುತ್ತಾರೆ. 

‘ಹಕ್ಕಿಗಳು ಮರದ ಪ್ರತಿಬಿಂಬವನ್ನು ಕಂಡು ಗಾಜಿಗೆ ಡಿಕ್ಕಿ ಹೊಡೆದು, ಕೆಳಗೆ ಬೀಳುತ್ತವೆ. ಅಪಾರ್ಟ್‌ಮೆಂಟ್‌ಗಳಲ್ಲಿ ಮಂಗಗಳ ಕಾಟಕ್ಕೆ ವಿಷ ಇಟ್ಟು ಸಾಯಿಸುತ್ತಾರೆ. ಹಾವುಗಳನ್ನು ಬಡಿದು ಕೊಲ್ಲುತ್ತಾರೆ. ಆದರೆ ಈ ಪ್ರಾಣಿಗಳನ್ನು ಸಾಯಿಸುವ ಬದಲು ಒಂದೇ ಒಂದು ಫೋನ್‌ ಕರೆ ಮಾಡಿ, ಎಷ್ಟೇ ದೂರವಿದ್ದರೂ ನಾನು ಅಥವಾ ಬಿಬಿಎಂಪಿ ಅರಣ್ಯ ಘಟಕದ ಸಿಬ್ಬಂದಿ ಹಾಜರಿರುತ್ತೇವೆ’ ಎಂದು ಮನವಿ ಮಾಡುತ್ತಾರೆ ಅವರು.

‘ಹೆಮ್ಮಿಗೆಪುರದಲ್ಲಿ ನಾಗರಹಾವು ಹಿಡಿಯಲು ತೆರಳಿದ್ದಾಗ ಜನರ ಅರಚಾಟ, ಸೆಲ್ಫಿ ತೆಗೆಯುವ ಹುಚ್ಚಾಟಕ್ಕೆ ಒಂದು ಕ್ಷಣ  ಕೈ ನಡುಗಿತು. ಅಷ್ಟರಲ್ಲಿ ಹಾವು ಮಣಿಗಂಟೆಗೆ ಕಚ್ಚಿತ್ತು. ಅಲ್ಲಿಂದ ಆಸ್ಪತ್ರೆಗೆ ಸಾಗಿಸುವ ಹಾದಿಯಲ್ಲಿ ಕೋಮಾ ಸ್ಥಿತಿಗೆ ಜಾರಿದ್ದೆ. ಆಗ ಚಿಕಿತ್ಸೆಗೂ ನನ್ನ ಬಳಿ ದುಡ್ಡಿರಲಿಲ್ಲ. ಆ ಸಂದರ್ಭದಲ್ಲಿ ಅರಣ್ಯ ಘಟಕದ ಸಿಬ್ಬಂದಿ ದುಡ್ಡು ಒಟ್ಟು ಮಾಡಿ ಚಿಕಿತ್ಸೆಗೆ ಸಹಾಯ ಮಾಡಿದ್ದರು’ ಎಂದು ಈ ಕೆಲಸದ ಹಿಂದಿರುವ ಅಪಾಯದ ಬಗ್ಗೆಯೂ ಹೇಳುತ್ತಾರೆ. 

ಪ್ರಸನ್ನಕುಮಾರ್‌ ಹಾಗೂ ಅವರ ತಂಡ ವನ್ಯಜೀವಿ ರಕ್ಷಣೆ ಜೊತೆಗೆ ಜಾಗೃತಿ ಮೂಡಿಸುವ ಕೆಲಸದಲ್ಲೂ ತೊಡಗಿಸಿಕೊಂಡಿದ್ದಾರೆ. ಸದ್ಯ ಪ್ರಸನ್ನ ಅವರು ಬೆಂಗಳೂರು ಗ್ರಾಮಾಂತರ ಜಿಲ್ಲೆಗೆ ಹೆಚ್ಚುವರಿ ಜಿಲ್ಲಾ ವನ್ಯಜೀವಿ ಪರಿಪಾಲಕನಾಗಿ ನೇಮಕಗೊಂಡಿದ್ದಾರೆ.

ನಗರದಲ್ಲಿ ವನ್ಯಜೀವಿ ರಕ್ಷಣೆ ಜಾಗೃತಿ ಕೆಲಸವನ್ನೂ ಪ್ರಸನ್ನ ಹಾಗೂ ಅರಣ್ಯ ಘಟಕ ಮಾಡುತ್ತಿದೆ. ‘ವನ್ಯಜೀವಿಗಳಿಗೆ ಹಿಂಸೆ ಅಥವಾ ಹತ್ಯೆ ಮಾಡಿದರೆ ಮೂರು ವರ್ಷಗಳ ಕಾಲ ಜೈಲುಶಿಕ್ಷೆ ಬಗ್ಗೆ ಮಾಹಿತಿ ನೀಡಿ, ಪರಿಸರ ಸಮತೋಲನಕ್ಕೆ ವನ್ಯಜೀವಿಗಳ ಕೊಡುಗೆ ಬಗ್ಗೆ ಅರಿವು ಮೂಡಿಸುತ್ತಾರೆ. ಶಾಲಾ– ಕಾಲೇಜಿನಲ್ಲಿ ಜಾಗೃತಿ ಕಾರ್ಯಕ್ರಮ, ಬನ್ನೇರುಘಟ್ಟ ಸುತ್ತಮುತ್ತಲಿನ ಬುಡಕಟ್ಟು ಜನಾಂಗದವರಿಗೆ ಕಾನೂನಾತ್ಮಕ ಅರಿವು ಹಾಗೂ ಅರಣ್ಯದೊಳಗೆ ಉದ್ಯೋಗ ಸೃಷ್ಟಿ, ಇಕೋ– ಟೂರಿಸಂ ಬಗ್ಗೆ ಮಾಹಿತಿ ಒದಗಿಸುವುದು, ನಗರದ ಖಾಲಿ ಪ್ರದೇಶಗಳಲ್ಲಿ ಹೆಚ್ಚು ವರ್ಷಗಳ ಕಾಲ ಬದುಕುವಂತಹ ಮರಗಳನ್ನು  ಗೋಮಾಳ ಜಾಗದಲ್ಲಿ ನೆಡುವುದು, ಖಾಲಿ ಜಾಗದಲ್ಲಿ ಬೀಜ ಚೆಂಡುಗಳನ್ನು ಎಸೆಯುವ ಬೀಜ ಆಂದೋಲನವನ್ನೂ ನಡೆಸುತ್ತಾರೆ.

ಪ್ರಸನ್ನ ಸಂಪರ್ಕ ಸಂಖ್ಯೆ– 99027 94711

Tags: 

ಬರಹ ಇಷ್ಟವಾಯಿತೆ?

  • 1

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !