ಆದಿತ್ಯನ ಆತಿಥ್ಯ ಬಯಸಿ

7

ಆದಿತ್ಯನ ಆತಿಥ್ಯ ಬಯಸಿ

Published:
Updated:

ಮಾನವ ಚಂದ್ರನ ಬಳಿಗೆ ಹೋಗಿಬಂದಾಯ್ತು. ಮಂಗಳನತ್ತ ಹೆಜ್ಜೆ ಹಾಕುವ ಪ್ರಯತ್ನಗಳೂ ಚಾಲ್ತಿಯಲ್ಲಿವೆ. ಈಗ ಅಮೆರಿಕದ ನಾಸಾ ಸಂಸ್ಥೆ ಸೂರ್ಯನ ಮೆಲ್ಮೈನಲ್ಲಿ ನಡೆಯುವ ಚಟುವಟಿಕೆಗಳನ್ನು ಅಧ್ಯಯನ ಮಾಡಲು ಸಿದ್ಧತೆ ನಡೆಸುತ್ತಿದೆ.

ಇದೊಂದು ವಿಶಿಷ್ಟ ಪ್ರಯತ್ನವಾಗಿದೆ. ಎಲ್ಲವೂ ಅಂದುಕೊಂಡಂತೆ ಆದರೆ, ಫ್ಲೋರಿಡಾದ ಕೆನಡಿ ಬಾಹ್ಯಾಕಾಶ ಸಂಸ್ಥೆಯಿಂದ, ಡೆಲ್ಟಾ-4 ಎಚ್.ಎಲ್. ನೌಕೆಯು ಮುಂದಿನ ತಿಂಗಳು ಅಂತರಿಕ್ಷ‌ಕ್ಕೆ ಪ್ರಯಾಣ ಬೆಳಸಲಿದೆ. ಈ ಮೂಲಕ 2018ನೇ ವರ್ಷದಲ್ಲಿ ಬಾಹ್ಯಾಕಾಶ ಕ್ಷೇತ್ರದಲ್ಲಿ ಐತಿಹಾಸಿಕ ಘಟನೆಯೊಂದು ದಾಖಲಾಗಲಿದೆ.

ಪಾರ್ಕರ್ ಸೋಲಾರ್ ಪ್ರೋಬ್: ಸೂರ್ಯನ ವಾತಾವರಣ ಅಧ್ಯಯನ ಮಾಡುವ ಈ ಯೋಜನೆಗೆ ನಾಸಾ ‘ಸೋಲಾರ್ ಪ್ರೋಬ್ ಪಬ್ಲಸ್’ ಎಂದು ಹೆಸರಿಟ್ಟಿತ್ತು. ಆದರೆ ಅಂತರರಾಷ್ಟ್ರೀಯ ಖಗೋಳ ಶಾಸ್ತ್ರಜ್ಞ ಯುಜಿನ್ ಪಾರ್ಕರ್ ಅವರ ಸಂಶೋಧನೆಗಳ ಗೌರವಾರ್ಥವಾಗಿ ಈ ಯೋಜನೆಯನ್ನು ಆರಂಭಿಸುತ್ತಿರುವುದಿರಂದ 2017ರಲ್ಲಿ ಯೋಜನೆಗೆ ‘ಪಾರ್ಕರ್ ಸೋಲಾರ್ ಪ್ರೋಬ್’ ಎಂದು ಮರುನಾಮಕರಣ ಮಾಡಲಾಯಿತು. 

ಏತಕ್ಕಾಗಿ ಈ ಪ್ರಯತ್ನ: ಸೂರ್ಯನ ಒಡಲಲ್ಲಿ ನಡೆಯುವ ಬೈಜಿಕ ಸಂಯೋಗ (ಒಂದು ಮೂಲವಸ್ತುವಿನ ಪರಮಾಣುಗಳು ಒಂದಾಗಿ ಅಪಾರಶಕ್ತಿಯನ್ನು ಬಿಡುಗಡೆ ಮಾಡುತ್ತಾ ಬೇರೆ ಮೂಲವಸ್ತುವಾಗುವುದು = ಪರಮಾಣು ಸೇರ್ಪಡೆ)ದಂತಹ ರಾಸಾಯನಿಕ ಪ್ರಕ್ರಿಯೆಗಳಿಂದ ಸೌರ ವಲಯದಲ್ಲಿ ಸೌರ ಕಲೆಗಳು, ಸೌರಜ್ವಾಲೆಗಳು, ಸೌರ ಮಾರುತಗಳು ಉಂಟಾಗುತ್ತಿವೆ. ಈ ಏರುಪೇರುಗಳು ಮಾನವ ನಿರ್ಮಿತ ಉಪಗ್ರಹಗಳು ಮತ್ತು ಅವುಗಳು ಚಲಿಸುವ ಪಥದ ಮೇಲೆ ಪರಿಣಾಮ ಬೀರುತ್ತವೆ ಮತ್ತು ದಿಕ್ಕನ್ನು ಬದಲಿಸುತ್ತವೆ. ಇವುಗಳು ವಿಜ್ಞಾನಿಗಳ ನಿಯಂತ್ರಣ ತಪ್ಪಿ ಹೋಗುವ ಸಾಧ್ಯತೆಗಳು ಹೆಚ್ಚು. ಇದು ನಾಸಾ ಸೇರಿದಂತೆ ಅನೇಕ ಬಾಹ್ಯಾಕಾಶ ಸಂಸ್ಥೆಗಳ ವಿಜ್ಞಾನಿಗಳಿಗೆ ತಲೆನೋವಾಗಿ ಪರಿಣಮಿಸಿದೆ. ಹಾಗಾಗಿ ಸೌರ ಮಾರುತಗಳು ಹಾಗೂ ಅವುಗಳಿಂದಾಗುವ ದುಷ್ಪರಿಣಾಮಗಳಿಗೆ ಅಂತ್ಯ ಹಾಡಲೆಂದು ಪಾರ್ಕರ್ ಸೋಲಾರ್ ಪ್ರೋಬ್ ಯೋಜನೆಯನ್ನು ಕಾರ್ಯಗತಗೊಳಿಸುತ್ತಿದೆ.

ಸೋಲಾರ್‌ ಪ್ರೋಬ್‌ ನೌಕೆಯು ಸುಮಾರು 6.2 ಮಿಲಿಯನ್ ಕಿ.ಮೀ ನಷ್ಟು ಹತ್ತಿರದಿಂದ ಸೂರ್ಯನನ್ನು ಅಧ್ಯಯನ ಮಾಡಲಿದೆ. ಇಲ್ಲಿವರೆಗೂ ಯಾವ ನೌಕೆಯೂ ಹೋಗಲಾರದಷ್ಟು ಸೂರ್ಯನ ಸಮೀಪಕ್ಕೆ, ಇದು ಹೋಗಲಿರುವುದು ಮತ್ತೊಂದು ವಿಶೇಷ. ಈ ನೌಕೆ, ಸೌರ ಮಾರುತಗಳ ಅಧ್ಯಯನದ ಜೊತೆ ಜೊತೆಗೆ, ಸೂರ್ಯನಲ್ಲಿ ನಡೆಯುವ ಬೈಜಿಕ ಬೆಸುಗೆಯ ದೃಶ್ಯಗಳನ್ನು ಸೆರೆ ಹಿಡಿಯಲಿದೆ. ಸೂರ್ಯನ ದ್ಯುತಿವಲಯ ಅಂದರೆ ಮೇಲ್ಮೈನಲ್ಲಿರುವ ತಾಪಕ್ಕಿಂತ, ಸೌರ ವಾಯುಮಂಡಲದ ಕೊನೆಯ ಪದರವಾದ ಕರೋನಾದ ತಾಪ ಹೆಚ್ಚಾಗಿರುವುದಕ್ಕೆ ಕಾರಣ ಏನು ಎಂಬುದನ್ನು ಪತ್ತೆ ಹಚ್ಚುವ ಪ್ರಯತ್ನವನ್ನು ಈ ನೌಕೆ ಮಾಡಲಿದೆ.

ಸೂರ್ಯನನ್ನು ತಲುಪಲು ಬೇಕಾಗುವ ಅವಧಿ: ಭೂಮಿಯು, ಸೂರ್ಯನಿಂದ 149.6 ದಶಲಕ್ಷ ಕಿ.ಮೀ. ದೂರದಲ್ಲಿದೆ.(14,96,00000 ಕಿ,ಮೀ.) ಈ ದೂರ ಕ್ರಮಿಸಬೇಕಾದರೆ ನಾವು ಬಳಸುವ ಅಂತರಿಕ್ಷ ನೌಕೆಗಳ ಸಾಮರ್ಥ್ಯವು ತಾಂತ್ರಿಕವಾಗಿ ಅಷ್ಟೆ ಪ್ರಬಲವಾಗಿರಬೇಕು. ಈಗ ನಾಸಾ ಸಿದ್ಧಪಡಿಸಿರುವ ಯೋಜನೆಯಲ್ಲಿ ಪಾರ್ಕರ್ ಪ್ರೋಬ್ ಹೊತ್ತೊಯಲಿರುವ ಡೆಲ್ಟಾ-4 ನೌಕೆಯು ಗಂಟೆಗೆ 4,30,000 ಮೈಲಿ ಅಥವಾ 7,00,000 ಕಿ.ಮೀ. ವೇಗದಲ್ಲಿ ಸೂರ್ಯನತ್ತ ಧಾವಿಸಲಿದೆ. ಇದನ್ನು ಹೀಗೆ ಊಹಿಸಿಕೊಂಡರೆ ಇನ್ನಷ್ಟು ಸ್ಪಷ್ಟತೆ ದೊರಕಬಹುದು. ಒಂದು ವೇಳೆ, ಈ ನೌಕೆಯಲ್ಲಿ ನಾವು ಕರ್ನಾಟಕದ ಉತ್ತರದ ತುದಿ ಬೀದರ್‌ನಿಂದ ಹೊರಟರೆ, ದಕ್ಷಿಣದ ತುತ್ತ ತುದಿ ಚಾಮರಾಜನಗರ ಜಿಲ್ಲೆಯನ್ನು ಕೇವಲ 4 ಸೆಕೆಂಡುಗಳಲ್ಲಿ ತಲುಪಬಹುದು. ಆದ್ದರಿಂದ ಇದೂವರೆಗೆ ಯಾವ ನೌಕೆಯು ಹೋಗದಷ್ಟು ಸೂರ್ಯನ ಹತ್ತಿರಕ್ಕೆ ಈ ನೌಕೆ ಹೋಗುವಷ್ಟು ಶಕ್ತವಾಗಿದೆ. ಹಾಗಾಗಿ ಈ ವ್ಯೋಮ ನೌಕೆಯು ಅತ್ಯಂತ ವೇಗವಾಗಿ ಕ್ರಮಿಸುವ ನೌಕೆ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಲಿದೆ.

ಕಾರ್ಯಾಚರಣೆ ಯಾವಾಗ ಆರಂಭ: ನಾವೆಲ್ಲ ನವೆಂಬರ್ 1ರಂದು ಕನ್ನಡ ರಾಜ್ಯೋತ್ಸವವನ್ನು ಅದ್ದೂರಿಯಾಗಿ ಆಚರಿಸುತ್ತಿರುವ ಹೊತ್ತಲ್ಲಿ, ಪಾರ್ಕರ್ ಸೋಲಾರ್ ಪ್ರೋಬ್ ಸೂರ್ಯನ ವಾತಾವರಣವನ್ನು ಪ್ರವೇಶಿಸಲಿದೆ. ಅಂದಿನಿಂದ ಸುಮಾರು 6 ವರ್ಷಗಳ ನಂತರ ಅಂದರೆ ಡಿಸೆಂಬರ್ 19, 2024 ರಂದು ಅತಿ ಹತ್ತಿರದ ಪೆರಿಹಿಲಿಯನ್ ತಲುಪಿ ತನ್ನನ್ನ ತಾನು ವಿಪರಿತ ತಾಪಕ್ಕೆ ಒಡ್ಡಿಕೊಳ್ಳಲಿದೆ. ಈ ಪರಿಯ ತಾಪವನ್ನು ತಡೆದುಕೊಳ್ಳಲೆಂದು, ಪ್ರೋಬ್ ಗೆ 11.43 ಸೆ.ಮೀ. ದಪ್ಪನೆಯ ಕಾರ್ಬನ್-ಕಾರ್ಬನ್ ಸಂಯೋಜಿತ ತಾಪ ನಿರೋಧಕ ಕವಚವನ್ನು ಅಳವಡಿಸಿದ್ದಾರೆ. ಇದು 13770 ಡಿಗ್ರಿ ಸೆಲ್ಸಿಯಸ್ ಬಿಸಿಯಲ್ಲಿಯೂ ಈ ನೌಕೆಗೆ ರಕ್ಷಣೆ ಒದಗಿಸುತ್ತದೆ.

ಹಾಟ್ ಟಿಕೆಟ್ ಹಾಗೂ ಹೆಸರು: ಸೋಲಾರ್‌ ಪ್ರೋಬ್ ಯಶಸ್ಸಿನಲ್ಲಿ ವಿಶ್ವವೇ ಪಾಲ್ಗೊಳ್ಳಬೇಕು ಎಂಬುದು ನಾಸಾ ಅಪೇಕ್ಷೆ.  ಇದಕ್ಕಾಗಿ ವಿಶ್ವದಾದ್ಯಂತ, ಅನೇಕರಿಗೆ ತಮ್ಮ ಹೆಸರುಗಳನ್ನು ಈ ನೌಕೆಯೊಂದಿಗೆ ಕಳುಹಿಸುವ ಸದಾವಕಾಶ ಒದಗಿಸಿತ್ತು. ಆಸಕ್ತರೆಲ್ಲರ ಹೆಸರುಗಳನ್ನು ಹಾಗೂ ಈ ಯೋಜನೆಯ ಕೇಂದ್ರ ಬಿಂದುವಾಗಿರುವ ಡಾ.ಯುಜಿನ್ ಪಾರ್ಕರ್ ಅವರ ಹೆಸರುಳ್ಳ ನೆನಪಿನ ಕಾರ್ಡ್‌ನೊಂದಿಗೆ ಪಾರ್ಕರ್ ಸೋಲಾರ್ ಪ್ರೋಬ್‍ನ ಗೋಡೆಯ ಮೇಲೆ ಅಲಂಕರಿಸಿ, ಸೌರ ಮಂಡಲದ ದರ್ಶನಕ್ಕೆ ಕಳುಹಿಸಿಕೊಡುತ್ತಿದೆ. ಈ ಎಲ್ಲ ಹೆಸರುಗಳ ಜೊತೆಗೆ ವಿಶೇಷ ಎನ್ನುವಂತೆ, ಯುಜಿನ್ ಪಾರ್ಕರ್ ಅವರ ಸೌರ ಮಾರುತಗಳ ಕುರಿತಾದ ಪ್ರಬಂಧದ ಪ್ರತಿಯನ್ನು ಕೂಡ ನಾಸಾ ಸೌರಯಾನಕ್ಕೆ ಕಳುಹಿಸಲಿದೆ. ಹೀಗೆ ಆಯ್ಕೆಯಾದ ಹೆಸರಿನವರು,  ತಾವೇ ಸೂರ್ಯನ ಬಳಿ ಹೋಗುತ್ತಿರುವ ಹಾಗೂ ಸೋಲಾರ್ ಪ್ರೋಬ್ ನಂತಹ ಐತಿಹಾಸಿಕ ಘಟನೆಯ ಭಾಗವಾಗುತ್ತಿರುವ ಹೆಮ್ಮೆ ಅನುಭವಿಸುವ ಅವಕಾಶವನ್ನು ನಾಸಾ ಎಲ್ಲರಿಗೂ ನೀಡಿದೆ. ಈ ಮೂಲಕ ನಾಸಾದ ಪ್ರಯತ್ನಕ್ಕೆ ಬಾರಿ ಜನ ಬೆಂಬಲವು ವ್ಯಕ್ತವಾಗಿದೆ.

ನಾಸಾದ ಅಧಿಕೃತ ಮಿಂಚಂಚೆಯಿಂದ ನನಗೆ ಬಂದ ನನ್ನ ಹೆಸರಿನ ಹಾಟ್ ಟಿಕೆಟ್ ಯುಜಿನ್ ಪಾರ್ಕರ್ ಅವರ ಹೆಸರಿನ ಜೊತೆ ಸೌರಯಾನಕ್ಕೆ ತೆರಳುತ್ತಿರುವ ಕುರಿತಾದ ಪ್ರಮಾಣಪತ್ರ ನನ್ನನ್ನು ಕೂಡ ಪುಳಕಗೊಳಿಸಿದೆ. (ಆ ಹಾಟ್ ಟಿಕೆಟ್‍ನ ಪ್ರತಿಗೆ ಚಿತ್ರನೋಡಿ). ಆದಿತ್ಯನ ಆತಿಥ್ಯ ಬಯಸಿ ಸೂರ್ಯನ ಬಳಿ ತೆರಳುತ್ತಿರುವ ನಾಸಾದ ಪ್ರಯತ್ನ ಸಫಲವಾದಲ್ಲಿ. ಇದೇ ತಂತ್ರಜ್ಞಾನವು ಬೇರೆ ರಾಷ್ಟ್ರಗಳಿಗೂ ಮಾದರಿಯಾಗಲಿದೆ.

ಇಸ್ರೊ ಪ್ರಯತ್ನ – ಆದಿತ್ಯ ಎಲ್-1:
ಭಾರತೀಯ ಬಾಹ್ಯಾಕಾಶ ಸಂಸ್ಥೆ – ಇಸ್ರೊ ಕೂಡ,  ಸೂರ್ಯನ ಅಧ್ಯಯನಕ್ಕೆ ಯೋಜನೆಯೊಂದನ್ನು ರೂಪಿಸಿದೆ. ಅದಕ್ಕೆ ಆದಿತ್ಯ ಎಲ್-1 ಎಂದು ಹೆಸರಿಸಿದೆ. ಇದನ್ನು 2019-2020 ರಲ್ಲಿ ಉಡಾವಣೆ ಮಾಡಲು ಯೋಜನೆ ರೂಪಿಸಲಾಗಿದೆ. ಪಾರ್ಕರ್ ಸೋಲಾರ್ ಪ್ರೋಬ್ ಎದುರಿಸಲಿರುವ ಎಲ್ಲ ರೀತಿಯ ಸವಾಲುಗಳನ್ನು ಅರ್ಥ ಮಾಡಿಕೊಳ್ಳುವಲ್ಲಿ ಜಗತ್ತಿನಾದ್ಯಂತ ಬಾಹ್ಯಾಕಾಶ ವಿಜ್ಞಾನಿಗಳು ಸಫಲರಾದರೆ, ಆದಿತ್ಯ ಎಲ್-1 ಕೂಡ ಯೋಜಿತ ಯಶಸ್ಸು ಸಾಧಿಸುವುದರಲ್ಲಿ ಯಾವುದೇ ಅನುಮಾನವೇ ಇಲ್ಲ.

Tags: 

ಬರಹ ಇಷ್ಟವಾಯಿತೆ?

  • 5

    Happy
  • 1

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !