ಪ್ರಜಾವಾಣಿ ಸಾಧಕರು 2023 | ಚಂದ್ರಶೇಖರ್ - ಆಟ, ಪಾಠ, ಹಸಿರು ನೋಟ

****

ಹೆಸರು : ಎಚ್‌.ಸಿ. ಚಂದ್ರಶೇಖರ್

ವೃತ್ತಿ : ಸರ್ಕಾರಿ ಶಾಲೆ ಶಿಕ್ಷಕ

ಸಾಧನೆ : ಪರಿಸರ ಸಂರಕ್ಷಣೆ

ಎಚ್.ಸಿ. ಚಂದ್ರಶೇಖರ್ ಚನ್ನಪಟ್ಟಣ ತಾಲ್ಲೂಕಿನ ಇಗ್ಗಲೂರು ಸರ್ಕಾರಿ ಪ್ರೌಢಶಾಲೆಯಲ್ಲಿ ಕನ್ನಡ ಶಿಕ್ಷಕರಾಗಿ ಸೇವೆ ಸಲ್ಲಿಸುತ್ತಿದ್ದಾರೆ. ತಮ್ಮ ಸ್ವಂತ ಖರ್ಚಿನಲ್ಲಿ ಶಾಲಾ ಆವರಣದಲ್ಲಿ ಗಿಡ, ಮರಗಳನ್ನು ಬೆಳೆಸುತ್ತಾ ವಿದ್ಯಾರ್ಥಿಗಳಲ್ಲಿ ಪರಿಸರ ಸಂರಕ್ಷಣೆ ಬಗ್ಗೆ ಜಾಗೃತಿ ಮೂಡಿಸುತ್ತಾ ‘ಪರಿಸರ ಪ್ರೇಮಿ ಶಿಕ್ಷಕ’ ಎಂಬ ಖ್ಯಾತಿಗೆ ಪಾತ್ರರಾಗಿದ್ದಾರೆ.

ಅವರ ಹುಟ್ಟೂರು ತಾಲ್ಲೂಕಿನ ಹರೂರು. ಶಾಲಾ ಆವರಣದ ಸುಮಾರು 10 ಗುಂಟೆ ಜಮೀನಿನಲ್ಲಿ ಪುಟ್ಟದೊಂದು ಕಾಡು ಹಾಗೂ ಕೈತೋಟ ನಿರ್ಮಿಸಿರುವುದು ಅವರ ಹಿರಿಮೆ. ಅಲ್ಲಿ ನೂರಾರು ಜಾತಿಯ ಮರಗಳನ್ನು ಬೆಳೆಸಿದ್ದಾರೆ. ಔಷಧಿ ಗಿಡಗಳನ್ನು ನೆಟ್ಟಿದ್ದಾರೆ. ನೀರಿನ ಇಂಗು ಗುಂಡಿಗಳನ್ನು ನಿರ್ಮಿಸಿದ್ದಾರೆ. ಮಳೆ ನೀರು ಸಂಗ್ರಹಕ್ಕೂ ಒತ್ತು ನೀಡಿದ್ದಾರೆ. ಹಸಿರೆಲೆ ಹಾಗೂ ಒಣಎಲೆ ಗೊಬ್ಬರ ತಯಾರಿಕೆ ಘಟಕ ನಿರ್ಮಿಸಿದ್ದಾರೆ. ಹೂ ಗಿಡಗಳು, ಸೊಪ್ಪು, ತರಕಾರಿ ಬೆಳೆಸಿ ಇತರರಿಗೆ ಮಾದರಿಯಾಗಿದ್ದಾರೆ. ಶಾಲೆಯ ನರ್ಸರಿಯಲ್ಲಿ ಬೆಳೆಸಿದ್ದ 500ಕ್ಕೂ ಹೆಚ್ಚು ವಿವಿಧ ಜಾತಿಯ ಗಿಡಗಳನ್ನು ತಾಲ್ಲೂಕಿನ ಹಲವು ಶಾಲೆಗಳಿಗೆ ಉಚಿತವಾಗಿ ಹಂಚಿ ಪರಿಸರ ಪ್ರೇಮ ಮೆರೆದಿರುವುದು ಅವರ ಹೆಗ್ಗಳಿಕೆ. ಅವರ ಪರಿಸರ ಪ್ರೇಮವನ್ನು ಮೆಚ್ಚಿ 2019ರಲ್ಲಿ ಶಾಲೆಗೆ ಜಿಲ್ಲಾ ಸಾರ್ವಜನಿಕ ಶಿಕ್ಷಣ ಇಲಾಖೆ ಹಾಗೂ ಪರಿಸರ ಇಲಾಖೆಯಿಂದ ‘ಹಸಿರು ಶಾಲೆ’ ಪ್ರಶಸ್ತಿ, ವಂಡರ್ ಲಾ ವತಿಯಿಂದ ‘ಗ್ರೀನ್ ಸ್ಕೂಲ್’ ಅವಾರ್ಡ್ ದೊರೆತಿದೆ.

‘ಶಿಕ್ಷಣ ನೀಡುವುದಷ್ಟೇ ಶಿಕ್ಷಕರ ಕೆಲಸವಾಗಬಾರದು. ಅವರಲ್ಲಿ ಪರಿಸರದ ಬಗ್ಗೆ ಕಾಳಜಿ ಬೆಳೆಸಬೇಕಾದುದು ಎಲ್ಲರ ಕರ್ತವ್ಯ’ ಎಂಬುದು ಚಂದ್ರಶೇಖರ್ ನಂಬಿಕೆ.