Cencus 2026: ಮೊಬೈಲ್‌ನಲ್ಲಿಯೇ ಸ್ವಯಂ ಗಣತಿ ಮಾಡುವುದು ಹೇಗೆ? ಇಲ್ಲಿದೆ ಮಾಹಿತಿ

2026ರ ಏಪ್ರಿಲ್ 1ರಿಂದ ಮೊದಲ ಹಂತದ ಜನಗಣತಿ ಆರಂಭವಾಗಿದೆ. ಇದರ ಭಾಗವಾಗಿ ಆನ್ಲೈನ್ ಮೂಲಕವೇ ಜನರು ವಿವರವನ್ನು ಭರ್ತಿಮಾಡಬಹುದು. ಡಿಜಿಟಲ್ ಮೂಲಕ ಜನಗಣತಿ ಮಾಡುವುದನ್ನು ಇದೇ ಮೊದಲ ಬಾರಿಗೆ ದೇಶದಲ್ಲಿ ಪರಿಚಯಿಸಲಾಗಿದೆ.

ಸರ್ಕಾರದ ಅಧಿಕೃತ ಜಾಲತಾಣದಲ್ಲಿ ಜನರು ತಮ್ಮ ಮಾಹಿತಿಯನ್ನು ಸಲ್ಲಿಸಬೇಕು. ಬಳಿಕ ಸ್ವಯಂ ಗಣತಿಯ ಐಡಿ ದೊರೆಯುತ್ತದೆ. ಅದನ್ನು ಗಣತಿದಾರರು ಮನೆಗೆ ಬಂದಾಗ ತೋರಿಸುವುದು ಕಡ್ಡಾಯ. ಹಾಗಾದರೆ ಮನೆಯಲ್ಲಿಯೇ ಸುಲಭವಾಗಿ ಸ್ವಯಂ ಜನಗಣತಿ ಮಾಡುವುದು ಹೇಗೆ ಎಂಬ ಸಂಪೂರ್ಣ ಮಾಹಿತಿ ಇಲ್ಲಿದೆ.

. ಮೊದಲ ಹಂತದಲ್ಲಿ ಸರ್ಕಾರದ ಅಧಿಕೃತ ಜಾಲತಾಣವಾದ https://se.census.gov.in/ ಕ್ಕೆ ಭೇಟಿ ನೀಡಿ. ಬಳಿಕ ಮುಖಪುಟದಲ್ಲಿ ನಿಮ್ಮ ರಾಜ್ಯ ಆಯ್ಕೆ ಮಾಡಿ, ಅಲ್ಲಿರುವ ಕ್ಯಾಪ್ಚಾ ನಮೂದಿಸಿರಿ. 'Verify & Proceed' ಕೊಡಿ.

. ಬಳಿಕ ‘Self-Enumeration (HLO) Login ’ ಪುಟ ತೆರೆಯುತ್ತದೆ. ಅಲ್ಲಿ ಮನೆಯ ಮುಖ್ಯಸ್ಥರ (ರೇಶನ್ ಕಾರ್ಡ್ನಲ್ಲಿರುವಂತೆ) ಹೆಸರು, ಮೊಬೈಲ್ ಸಂಖ್ಯೆ ಮತ್ತು ಇ–ಮೇಲ್ ವಿಳಾಸ ಹಾಕಿ 'Verify & Proceed' ಕೊಡಿ.

. ‘Language Selection and OTP Verification’ ಪುಟ ತೆರೆಯುತ್ತದೆ. ನೀವು ಲಾಗಿನ್ ಮಾಡಲು ಬಳಸಿರುವ ಮೊಬೈಲ್ ಸಂಖ್ಯೆಗೆ ಒಟಿಪಿ ಬಂದಿರುತ್ತದೆ. ಒಟಿಪಿಯನ್ನು ನಮೂದಿಸಿ ಲಾಗಿನ್ ಮಾಡಿರಿ. ಜತೆಗೆ ನಿಮ್ಮ ಭಾಷೆಯನ್ನು ಆಯ್ಕೆ ಮಾಡಿ.

. ಬಳಿಕ ‘ಮನೆಪಟ್ಟಿ ಕಾರ್ಯಾಚರಣೆಗಳು - ಸ್ವಯಂ-ಗಣತಿ (SE)’ ಪುಟ ತೆರೆಯುತ್ತದೆ. ಈ ಪುಟದಲ್ಲಿ ಒಟ್ಟು 6 ವಿಭಾಗ ಇರುತ್ತದೆ. ಪ್ರತಿ ವಿಭಾಗದ ಮಾಹಿತಿಯನ್ನು ಭರ್ತಿ ಮಾಡಬೇಕು.

ಮೊದಲಿಗೆ ‘ಸ್ವ ವಿವರಗಳು’ ವಿಭಾಗದಿಂದ ಆರಂಭಿಸಿ ‘ಜನಗಣತಿ ಮನೆ ವಿವರಗಳು’, ‘ಸಾಮಾನ್ಯ ಮಾಹಿತಿ’, ‘ಸೌಲಭ್ಯಗಳು’ ಹಾಗೂ ’ಸ್ವತ್ತುಗಳು’ ವಿಭಾಗದ ಮಾಹಿತಿಯನ್ನು ಭರ್ತಿ ಮಾಡಿ.

. ಎಲ್ಲ ಮಾಹಿತಿಯನ್ನು ಭರ್ತಿ ಮಾಡಿದ ನಂತರ ‘ತಿದ್ದುಪಡಿಗಾಗಿ ಹಿಂತಿರುಗಿ’, ‘ಡ್ರಾಫ್ಟ್ ಆಗಿ ಉಳಿಸಿ’ ಮತ್ತು ‘ಧೃಢೀಕರಿಸಿ’ ಆಯ್ಕೆಗಳಿರುತ್ತವೆ. ಮಾಹಿತಿ ಸರಿ ಇದ್ದಲ್ಲಿ ಧೃಢೀಕರಿಸಿ ಆಯ್ಕೆಯನ್ನು ಕ್ಲಿಕ್ ಮಾಡಿ.

. ಎಲ್ಲಾ ಮಾಹಿತಿ ಭರ್ತಿಯಾದ ಬಳಿಕ ‘ಸ್ವಯಂ ಗಣತಿಯ ಐಡಿ’ ಲಭ್ಯವಾಗುತ್ತದೆ. ಈ ಐಡಿಯನ್ನು ಒಂದು ಕಡೆ ಸೇವ್ ಮಾಡಿ ಇಟ್ಟುಕೊಳ್ಳಿ. ಏಪ್ರಿಲ್ 15ರ ನಂತರ ಗಣತಿದಾರರು ಮನೆಗೆ ಬಂದಾಗ ಐಡಿ ತೋರಿಸುವುದು ಕಡ್ಡಾಯವಾಗಿರುತ್ತದೆ.