‘ವಿ ದಿ ವಿಮೆನ್‌’’ ಉತ್ಸವ: ಎದುರು ಬದುರಾದ ಫೇಸ್‌ಬುಕ್‌ ಮುಖಗಳು..

5
‘ವಿ ದಿ ವಿಮೆನ್‌’ ಉತ್ಸವದಲ್ಲಿ ತೆರೆದ ಅಂತರಂಗ

‘ವಿ ದಿ ವಿಮೆನ್‌’’ ಉತ್ಸವ: ಎದುರು ಬದುರಾದ ಫೇಸ್‌ಬುಕ್‌ ಮುಖಗಳು..

Published:
Updated:
Deccan Herald

ಬೆಂಗಳೂರು: ಯಾರು ಏನೇ ಅಂದರೂ ಧೈರ್ಯ ಕಳೆದುಕೊಳ್ಳಬೇಡಿ. ಧೈರ್ಯದಿಂದ ಮುನ್ನುಗ್ಗಿ...

–ಘಟ ವಾದಕಿ ಸುಕನ್ಯಾ ರಾಮಗೋಪಾಲ್‌ ಅವರ ದ್ವನಿ ಘಟ ನಾದದಷ್ಟೇ ಗಟ್ಟಿಯಾಗಿ ಕೇಳಿಬಂತು. ಬದುಕಿನಲ್ಲಿ ಧೈರ್ಯ, ನಂಬಿಕೆ, ಮುಕ್ತತೆ ಇರಲಿ ಎಂಬ ಒಕ್ಕೊರಲಿನ ಧ್ವನಿಗಳಿಗೆ ವೇದಿಕೆಯೊಂದು ಸಿಕ್ಕಿತ್ತು. 

ನಗರದ ಲಲಿತ್‌ ಅಶೋಕ್‌ ಹೋಟೆಲ್‌ನಲ್ಲಿ ಭಾನುವಾರ ‘ವಿ ದಿ ವಿಮೆನ್‌’ ಉತ್ಸವಕ್ಕೆ ಫೇಸ್‌ಬುಕ್‌ ವೇದಿಕೆ ಕಲ್ಪಿಸಿತ್ತು. 

ಕಿರುತೆರೆ, ಹಿರಿತೆರೆ, ಉದ್ಯಮ, ಸಾಹಿತ್ಯ ವಲಯದಲ್ಲಿ ಮುಂಚೂಣಿಯಲ್ಲಿರುವ ಮಹಿಳೆಯರು ತಮ್ಮ ಅಂತರಂಗ ತೆರೆದಿಟ್ಟರು. ತಾಲತರಂಗ ಘಟವಾದನ ಕಛೇರಿ ನಡೆಸಿಕೊಟ್ಟ ಸುಕನ್ಯಾ ಅವರ ಮಾತು ಅಲ್ಲಿ ಸೇರಿದ್ದ ಯುವ ಮನಸ್ಸುಗಳಲ್ಲಿ ಹೊಸ ಉತ್ಸಾಹ
ಮೂಡಿಸಿತು.

‘ಮೊದಲ ಬಾರಿಗೆ ಕಛೇರಿ ನೀಡಲು ಪ್ರತಿಷ್ಠಿತ ಕಾರ್ಯಕ್ರಮವೊಂದಕ್ಕೆ ಹೋದಾಗ ನನ್ನನ್ನು ಬಾಗಿಲಲ್ಲೇ ತಡೆದಿದ್ದರು. ನನ್ನ ಸಾಥ್‌ ಪಡೆಯಲು ಮೃದಂಗ ವಾದಕ ಒಪ್ಪಿರಲಿಲ್ಲ. ಮೈಕ್‌ ಕೊಡಲೂ ಅಡ್ಡಿ
ಪಡಿಸುತ್ತಿದ್ದ ಘಟನೆಗಳು ನಡೆದಿವೆ. ಆದರೆ, ನಾನು ಹಿಂಜರಿಯಲಿಲ್ಲ. ನನ್ನದೇ ಆದ ಹಾದಿಯಲ್ಲಿ ನಡೆದೆ. ಆಮೇಲೆ ಹಿಂದಿರುಗಿ ನೋಡಲಿಲ್ಲ’ ಎಂದರು.

ಮುಂದಿನದು ಲೇಖಕಿ ಶ್ವೇತಾ ಬಚ್ಚನ್‌ ನಂದಾ ಅವರ ಸರದಿ. ‘ನಾನು ಲೇಖಕಿಯಾಗಿ ಗುರುತಿಸಿಕೊಂಡಿದ್ದು ತಡವಾಗಿ. ಆದರೂ, ತಡವಾಯಿತು ಎಂದು ಅನಿಸುತ್ತಿಲ್ಲ. ಸಾಧನೆಗೆ ಮನಸ್ಸು ಮುಖ್ಯವೇ ಹೊರತು ವಯಸ್ಸಲ್ಲ’ ಎಂದು ಅವರು ಹೇಳಿದರು. 

‘ನಾನು ಪ್ರಸಿದ್ಧ ವ್ಯಕ್ತಿ ಅಲ್ಲ. ಆದರೆ, ಖ್ಯಾತನಾಮರ ಜತೆ ಉತ್ತಮ ಬಾಂಧವ್ಯ ಹೊಂದಿದ್ದೇನೆ. ತಂದೆ, ತಾಯಿ, ಸಹೋದರ ಖ್ಯಾತನಾಮರಾಗಿರುವುದರಿಂದ ಅವರ ಜತೆ ನನ್ನ ಹೆಸರೂ ಸೇರಿಕೊಂಡಿದೆ. ನನಗೆ ಸಹಜ, ಸಾಮಾನ್ಯ ಜೀವನ ಇಷ್ಟ’ ಎಂದರು.

ಕಿರುಕುಳ ಹೇಗೆ ಎದುರಿಸಬೇಕು?:

‘ಒಬ್ಬರು ತಮಗಾದ ತೊಂದರೆಯನ್ನು ಧೈರ್ಯವಾಗಿ ಹೇಳಿಕೊಳ್ಳುವಾಗ ಅವರಲ್ಲಿ ನಂಬಿಕೆ ಇಡಬೇಕು. ಹಾಗೆ ಹೇಳಿಕೊಂಡವರಿಗೆ ಧೈರ್ಯ ತುಂಬಬೇಕು. ಮನೆಯಲ್ಲಿ ಹೆಣ್ಣು ಮಕ್ಕಳಿಗೆ ತಮ್ಮ ಅನಿಸಿಕೆ ಹೇಳಿಕೊಳ್ಳುವ ಮುಕ್ತ ಅವಕಾಶ, ವಾತಾವರಣ ಕಲ್ಪಿಸಬೇಕು. ನನ್ನ ಮನೆಯಲ್ಲಿ ಇದೇ ವಾತಾವರಣ ರೂಪಿಸಿದ್ದೇನೆ. ನನ್ನ ಮಗಳಿಗೆ ನಾನು ಒಬ್ಬ ಗೆಳತಿಯಂತೆ ಇರುತ್ತೇನೆ’ ಎಂದು ಪ್ರಶ್ನೆಯೊಂದಕ್ಕೆ ಶ್ವೇತಾ ಉತ್ತರಿಸಿದರು.  

ಜಾಲತಾಣಗಳ ಬಗ್ಗೆ: ‘ಇಂಟರ್‌ನೆಟ್‌ನಲ್ಲಿ ಯಾವುದನ್ನು ಪ್ರಕಟಿಸಬೇಕು, ಏನನ್ನು ಪ್ರಕಟಿಸಬಾರದು ಎಂಬ ಎಚ್ಚರ, ವಿವೇಚನೆ ಇರಬೇಕು. ಎಷ್ಟೋ ಬಾರಿ ಅದು ದುರುಪಯೋಗ ಆಗುವುದಿದೆ. ತಂದೆಯ ಹೆಸರನ್ನು ಮೀಮ್‌ಗಳಲ್ಲಿ ಬಳಸಿದಾಗ, ಟ್ರೋಲ್‌ ಮಾಡಿದಾಗ, ಆಂಬುಲೆನ್ಸ್‌ನಲ್ಲಿ ಸಾಗಿಸುವ ಚಿತ್ರಗಳನ್ನು ಮಾಧ್ಯಮಗಳಲ್ಲಿ ಬಿತ್ತರಿಸಿದಾಗ ಸಹಜವಾಗಿ ನೊಂದುಕೊಂಡಿದ್ದೇನೆ. ನಮಗೆ ಖಾಸಗಿತನ ಮುಖ್ಯ. ಅದನ್ನೇ ನನ್ನ ಮಕ್ಕಳಿಗೂ ಹೇಳುತ್ತೇನೆ’ ಎಂದರು.

ಹಿರಿಯ ಪತ್ರಕರ್ತೆ ಬರ್ಖಾದತ್‌ ಕಾರ್ಯಕ್ರಮ ನಿರೂಪಿಸಿದರು.

ತೆರೆದ ಬಾಗಿಲಲ್ಲಿ ಮುಕ್ತ ಮಹಿಳೆ

ಸಭಾಂಗಣದಲ್ಲಿ ಮಹಿಳೆ ಬಾಗಿಲಿನಿಂದಾಚೆ ಬರುವ ಪರಿಕಲ್ಪನೆ ಬಿಂಬಿಸುವ ತೆರೆದ ಬಾಗಿಲು ಮಾದರಿ ಇಡಲಾಗಿತ್ತು. ಇಡೀ ಕಾರ್ಯಕ್ರಮದ ಥೀಮ್‌ ತೆರೆದ ಬಾಗಿಲು ಮತ್ತು ಸ್ವಾತಂತ್ರ್ಯ. ಅತಿಥಿಗಳು ವೇದಿಕೆಗೆ ಬಾಗಿಲು ತೆರೆದು ಪ್ರವೇಶಿಸುತ್ತಿದ್ದರು. ಯುವ ಸಮೂಹ, ಕಾಲೇಜು ಯುವತಿಯರು ಹೆಚ್ಚು ಸಂಖ್ಯೆಯಲ್ಲಿದ್ದರು. ಅಲಂಕಾರಿಕ ಸಾಮಗ್ರಿ, ಉಡುಪುಗಳ ಮಾರಾಟ ನಡೆಯಿತು. ಪ್ರವೇಶ ಪ್ರದೇಶದ ಬಳಿ ಸಾಧಕ ಮಹಿಳೆಯರ, ವಿವಿಧ ಕ್ಷೇತ್ರದಲ್ಲಿ ಕಾರ್ಯನಿರ್ವಹಿಸುವ ಮಹಿಳೆಯರ ಕಪ್ಪು–ಬಿಳುಪು ಛಾಯಾಚಿತ್ರಗಳನ್ನು 
ಪ್ರದರ್ಶನಕ್ಕಿಡಲಾಗಿತ್ತು.

ಬರಹ ಇಷ್ಟವಾಯಿತೆ?

  • 1

    Happy
  • 1

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !