ಕೀಮಾ ಸವಿ; ಘಮ್ಮೆನ್ನುವ ಸೂಪ್

7

ಕೀಮಾ ಸವಿ; ಘಮ್ಮೆನ್ನುವ ಸೂಪ್

Published:
Updated:

ಮುಂಜಾನೆ ಏಳು ಗಂಟೆಗೆಲ್ಲ ಈ ಹೋಟೆಲಿನಲ್ಲಿ ಕೀಮಾ ಗೊಜ್ಜು ಘಮ್ಮೆಂದು ಪರಿಮಳ ಬೀರುತ್ತಿರುತ್ತದೆ. ಬೆಂಗಳೂರು–ಮೈಸೂರು ಹೆದ್ದಾರಿಗುಂಟ ಸಾಗುವ, ಈ ಹೋಟೆಲಿನ ಪರಿಚಯ ಇರುವ ಮಂದಿ ಇದರ ಸ್ವಾದ ಸವಿಯದೇ ಮುಂದುವರೆಯುವುದಿಲ್ಲ. ಇನ್ನೂ ಬೆಳಿಗ್ಗೆ 11ರ ನಂತರ ಕಾಲು ಸೂಪ್‌ ಕುಡಿಯಲೆಂದೇ ಸಾಕಷ್ಟು ಗ್ರಾಹಕರು ಇಲ್ಲಿಗೆ ಬರುವುದುಂಟು.

ಚನ್ನಪಟ್ಟಣ ಬಿಟ್ಟು ಆರೇಳು ಕಿಲೋಮೀಟರ್ ಮುಂದಕ್ಕೆ ಸಾಗಿದರೆ ಬಿ.ಎಂ. ರಸ್ತೆಯ ಬದಿಯಲ್ಲಿಯೇ ವೈಶಾಲಿ ಎಂಬ ಹೆಸರಿನ ದೊಡ್ಡ ರೆಸ್ಟೋರೆಂಟ್‌ ನಿಮ್ಮನ್ನು ಸ್ವಾಗತಿಸುತ್ತದೆ. ಇಡೀ ದಿನ ತೆರೆದಿರುವ ಇದರೊಳಗೆ ಮಾಂಸಾಹಾರಿ ಪ್ರಿಯರಿಗೆ ಇಷ್ಟವಾಗುವಂತಹ ಬಗೆಬಗೆಯ ಭಕ್ಷ್ಯಗಳ ಪಟ್ಟಿಯೇ ಇದೆ. ಸಸ್ಯಾಹಾರಿಗಳಿಗೂ ಮೆಚ್ಚುಗೆಯಾಗುವ ನಾನಾ ಬಗೆಯ ಆಹಾರ ಇಲ್ಲಿ ಸಿಗುತ್ತದೆ.

ವೈಶಾಲಿಯಲ್ಲಿ ಮಾತ್ರ ಸಿಗುವ ಹಲವು ವಿಶಿಷ್ಟ ಬಗೆಯ ಆಹಾರಗಳು ಇವೆ. ಕೀಮಾ ಗೊಜ್ಜು, ಕಾಲು ಸೂಪ್‌ ಅದರಲ್ಲಿ ಪ್ರಮುಖವಾದವು. ಮುಂಜಾನೆ ಉಪಾಹಾರಕ್ಕೆ ಮಾಂಸಾಹಾರ ಬಯಸುವವರಿಗೆಂದೇ ವಿಶೇಷವಾಗಿ ಕೀಮಾ ಗೊಜ್ಜು ಅನ್ನು ಸಿದ್ಧಪಡಿಸಲಾಗುತ್ತದೆ. ಮಾಂಸವನ್ನು ಹುರಿದು ಉಂಡೆ ಕಟ್ಟಿ ಹದವಾಗಿ ಬೇಯಿಸಿ ಅದಕ್ಕೆ ಬಗೆಬಗೆಯ ಮಸಾಲೆ ಹಾಕಿ ಗೊಜ್ಜಿನ ರೀತಿಯಲ್ಲಿ ತಯಾರಿಸಲಾಗುತ್ತದೆ. ಸಾಂಬಾರ್‌ ಅಲ್ಲದ, ಡ್ರೈ ಕೂಡ ಅಲ್ಲದ ಅರೆ ದ್ರವ ರೂಪದ ಈ ಗೊಜ್ಜಿಗೆ ಜೊತೆಯಾಗಿ ದೋಸೆಯನ್ನು ಬಡಿಸಲಾಗುತ್ತದೆ. ಇದನ್ನು ಸವಿಯಲೆಂದೇ ಸಾಕಷ್ಟು ಮಂದಿ ಇಲ್ಲಿಗೆ ಬರುತ್ತಾರೆ.

ಕಾಲು ಸೂಪ್‌ ಈ ರೆಸ್ಟೋರೆಂಟಿನ ಇನ್ನೊಂದು ವಿಶೇಷ. ಬಟ್ಟಲಿನಲ್ಲಿ ಬಡಿಸಿದ, ಕುರಿ/ಮೇಕೆಯ ಬೆಂದ ಕಾಲುಗಳು ಅರೆ ಅದ್ದಿದ ಸ್ಥಿತಿಯಲ್ಲಿ ಇರುವ ಸೂಪಿನಿಂದ ಹೊರಹೊಮ್ಮುವ ಹಬೆ ಮಿಶ್ರಿತ ಪರಿಮಳವು ಗ್ರಾಹಕರನ್ನು ಹೆಚ್ಚು ಆಕರ್ಷಿಸುತ್ತದೆ. ಹೆಚ್ಚು ಮಸಾಲೆಗಳು ಇಲ್ಲದ, ಮೂಳೆಗಳ ಜಿಡ್ಡಿನಿಂದ ಕೂಡಿದ ಸೂಪ್‌ ಎಲ್ಲರಿಗೂ ಇಷ್ಟವಾಗುವಂತೆ ಇದೆ. ‘ಬೆಂಗಳೂರು–ಮೈಸೂರು ನಡುವೆ ಪ್ರಯಾಣಿಸುವ ನಮ್ಮ ಗ್ರಾಹಕರಲ್ಲಿ ಸಾಕಷ್ಟು ಮಂದಿ ಇದರ ರುಚಿ, ಪರಿಮಳಕ್ಕೆ ಮಾರು ಹೋಗಿದ್ದಾರೆ. ಇದಕ್ಕೆಂದೇ ಬರುವವರೂ ಇದ್ದಾರೆ’ ಎನ್ನುತ್ತಾರೆ ಹೋಟೆಲ್‌ನ ವ್ಯವಸ್ಥಾಪಕ ಭದ್ರಪ್ಪ.

‘ವೈಶಾಲಿ ಸ್ಪೆಷಲ್‌’ ಎನ್ನುವ ಇನ್ನೊಂದು ಬಗೆಯ ವಿಶೇಷ ಆಹಾರವನ್ನು ಇಲ್ಲಿನ ಬಾಣಸಿಗರು ತಯಾರಿಸುತ್ತಾರೆ. ಸಸ್ಯಾಹಾರ ಹಾಗೂ ಮಾಂಸಾಹಾರ–ಎರಡೂ ಮಾದರಿಯಲ್ಲಿಯೂ ಈ ಸ್ಪೆಷಲ್ ತಿನಿಸು ಸಿದ್ಧವಿದೆ.

ಸಮುದ್ರ ಮೀನುಗಳಿಂದ ಮಾಡಿದ ಬಗೆಬಗೆಯ ತಿನಿಸುಗಳೂ ಇಲ್ಲಿ ಸಿಗುತ್ತದೆ. ಅದರಲ್ಲೂ ಎಂಜಲ್‌ ಫ್ರೈ, ತಂದೂರಿ, ಸೀಲ್‌ ತಂದೂರಿ ಮೊದಲಾದ ಮೀನಿನ ಖಾದ್ಯಗಳು ನೀರೂರಿಸುತ್ತವೆ. ಇಲ್ಲಿನ ಬಿರಿಯಾನಿಗಳು ಕೂಡ ಗ್ರಾಹಕರ ನೆಚ್ಚಿನ ತಿನಿಸು. ಆಂಧ್ರ ಮತ್ತು ನಾಟಿ ಶೈಲಿ ಎರಡೂ ಬಗೆಯಲ್ಲಿ ಇವುಗಳನ್ನು ಸಿದ್ಧಪಡಿಸಲಾಗುತ್ತದೆ. ಮಟನ್‌ ಮತ್ತು ಚಿಕನ್‌ ಬಿರಿಯಾನಿಗಳು ಲಭ್ಯವಿದೆ.

ಇದಲ್ಲದೆ ಮಾಂಸಾಹಾರದಲ್ಲಿ ಸುಲ್ತಾನ್‌ ತಂದೂರಿ, ಲೆಮನ್‌, ಬಟರ್‌, ಪೆಪ್ಪರ್ ಡ್ರೈ, ಚಾಪ್ಸ್‌, ಟಿಕ್ಕಾ, ಲಾಲಿಪಪ್‌ ಸೇರಿದಂತೆ ನಾನಾ ಬಗೆಯ ಆಹಾರ ಸಿಗುತ್ತದೆ. ಸಸ್ಯಾಹಾರಿಗಳಿಗೆ ಪನೀರ್‌ ಬಟರ್‌, ಮಶ್ರೂಮ್‌ ಚಿಲ್ಲಿ, ಬೇಬಿಕಾರ್ನ್‌ ಮೊದಲಾದ ಖಾದ್ಯಗಳನ್ನು ಬಡಿಸಲಾಗುತ್ತದೆ.

ಬೆಳಗ್ಗಿನ ಉಪಾಹಾರಕ್ಕೆ ಬಗೆಬಗೆಯ ದೋಸೆ, ಅಕ್ಕಿ ರೊಟ್ಟಿ, ರಾಗಿ ರೊಟ್ಟಿ, ಇಡ್ಲಿ ವಡೆ ಸಹಿತ ನಾನಾ ಬಗೆಯ ಉಪಾಹಾರಗಳು ಸಿಗುತ್ತದೆ.
‘ಕಳೆದ ಏಳು ವರ್ಷಗಳಿಂದ ಈ ಹೋಟೆಲ್‌ ಜನರಿಗೆ ಇಷ್ಟವಾಗಿದೆ. ಪ್ರತಿ ಆಹಾರವನ್ನು ನುರಿತ ಬಾಣಸಿಗರು ತಯಾರಿಸುತ್ತಾರೆ. ಮಾಂಸದ ಆಯ್ಕೆಯಲ್ಲೂ ಕಾಳಜಿ ವಹಿಸುತ್ತೇವೆ. ರುಚಿ–ಶುಚಿಗೆ ನಮ್ಮ ಆದ್ಯತೆ’ ಎನ್ನುತ್ತಾರೆ ವ್ಯವಸ್ಥಾಪಕ ಭದ್ರಯ್ಯ.

ಹೆದ್ದಾರಿ ಪಕ್ಕದಲ್ಲಿಯೇ ಇರುವುದರಿಂದ ಹೋಟೆಲ್‌ ಹುಡುಕುವ ತೊಂದರೆ ಇಲ್ಲ. ವಾಹನ ನಿಲುಗಡೆಗೆ ಸಾಕಷ್ಟು ಸ್ಥಳಾವಕಾಶವೂ ಇದೆ. ಗ್ರಾಹಕರು ಆರಾಮವಾಗಿ ಊಟ/ಉಪಾಹಾರ ಮುಗಿಸಿ ತುಸು ವಿಶ್ರಾಂತಿ ಪಡೆದು ತೆರಳಬಹುದಾಗಿದೆ.

 

ಬರಹ ಇಷ್ಟವಾಯಿತೆ?

  • 14

    Happy
  • 0

    Amused
  • 0

    Sad
  • 1

    Frustrated
  • 0

    Angry

Comments:

0 comments

Write the first review for this !