ಮೋದಕಪ್ರಿಯನಿಗೆ ಬಗೆಬಗೆಯ ಸಿಹಿಗಳು...

7

ಮೋದಕಪ್ರಿಯನಿಗೆ ಬಗೆಬಗೆಯ ಸಿಹಿಗಳು...

Published:
Updated:

ಶಿರಾ ಮೋದಕ

ಬೇಕಾಗುವ ಸಾಮಗ್ರಿಗಳು: ಮೈದಾ – 1/2ಕಪ್‌, ಚಿರೋಟಿ ರವೆ – 1/2ಕಪ್‌, ಉಪ್ಪು – ರುಚಿಗೆ ತಕ್ಕಷ್ಟು, ತುಪ್ಪ – 4ಚಮಚ ಅಥವಾ ಎಣ್ಣೆ, ಸಕ್ಕರೆ, ಹಾಲು, ಎಲಕ್ಕಿ ಪುಡಿ ಹಾಕಿ ಮಾಡಿದ ಶಿರಾ (ಕೇಸರಿ ಬಾತ್) ಒಂದೂವರೆ ಕಪ್. ಕರಿಯಲು ಎಣ್ಣೆ.

ತಯಾರಿಸುವ ವಿಧಾನ: ಮೈದಾ, ರವೆ, ಉಪ್ಪು ಬೆರೆಸಿ ತುಪ್ಪ ಅಥವಾ ಎಣ್ಣೆ ಹಾಕಿ ತಕ್ಕಷ್ಟು ನೀರಿನಿಂದ ಚಪಾತಿ ಹಿಟ್ಟಿನಂತೆ ಕಲೆಸಿ ಖಾಲಿ ಎಣ್ಣೆ ಕವರಿನಲ್ಲಿ ಹಾಕಿ ಚೆನ್ನಾಗಿ ನಾದಿ ಇಡಿ. ನಂತರ ಕೇಸರಿಬಾತ್ ರೆಡಿ ಮಾಡಿ. ಸ್ವಲ್ಪ ಆರಿದ ಮೇಲೆ ಕಣಕದ ಹಿಟ್ಟಿನಲ್ಲಿ ಚಿಕ್ಕ ಪೂರಿಗಳಂತೆ ಲಟ್ಟಿಸಿ, ಕೇಸರಿಬಾತ್ ತುಂಬಿ ಮೋದಕದ ಆಕಾರಕ್ಕೆ ರೆಡಿ ಮಾಡಿ, ಕಾದ ಎಣ್ಣೆಯಲ್ಲಿ ಕರಿಯಿರಿ.

***

ಶಂಕರಪೊಳೆ ಅಥವಾ ಪಾರಸ್ ಫೇಣಿ

ಬೇಕಾಗುವ ಸಾಮಗ್ರಿಗಳು: ಹಾಲು – 1ಕಪ್, ಸಕ್ಕರೆ – 1ಕಪ್, ಎಣ್ಣೆ ಅಥವಾ ದಾಲ್ಡಾ – 1ಕಪ್, ಮೈದಾಹಿಟ್ಟು – 1/2ಕೆ.ಜಿ., ಗೋಧಿಹಿಟ್ಟು – 1/2ಕೆ.ಜಿ. (ಎರಡನ್ನೂ ಸೇರಿಸಿ ಬೆರೆಸಿದ ಮಿಶ್ರಣ), ಕರಿಯಲು ಎಣ್ಣೆ.

ತಯಾರಿಸುವ ವಿಧಾನ: ಒಂದು ದೊಡ್ಡ ತಟ್ಟೆಗೆ ಸ್ವಲ್ಪ ಬೆಚ್ಚನೆಯ ಹಾಲು ಮತ್ತು ಸಕ್ಕರೆಗಳನ್ನು ಹಾಕಿ ಕೈಯಿಂದ ಚೆನ್ನಾಗಿ ಉಜ್ಜಿ. ಅದಕ್ಕೆ ಕಾಯಿಸಿದ ದಾಲ್ಡಾ ಅಥವಾ ಎಣ್ಣೆ ಹಾಕಿ ಮತ್ತೆ ಉಜ್ಜಿ. ಇದಕ್ಕೆ ಹಿಡಿಸುವಷ್ಟು ಹಿಟ್ಟುಗಳ ಮಿಶ್ರಣವನ್ನು ಹಾಕಿ ಚೆನ್ನಾಗಿ ಚಪಾತಿಹಿಟ್ಟಿನಂತೆ ಕಲೆಸಿ. ಎಣ್ಣೆ ಕವರಿನಲ್ಲಿ ಹಾಕಿ ನಾದಿಡಿ. ಹಿಟ್ಟನ್ನು ಸ್ವಲ್ಪ ಮೆತ್ತಗೆ ಕಲೆಸಿಡಿ. ಸ್ವಲ್ಪ ಸಮಯದ ನಂತರ ಅದು ಗಟ್ಟಿಯಾಗುತ್ತದೆ. ಚಪಾತಿಯಂತೆ ಸ್ವಲ್ಪ ದಪ್ಪಕ್ಕೆ ಲಟ್ಟಿಸಿ (ಹಿಟ್ಟು ಅದ್ದಿಕೊಳ್ಳದೆ) ಡೈಮಂಡ್‌ ಆಕಾರಕ್ಕೆ ಕತ್ತರಿಸಿ. ಕಾದ ಎಣ್ಣೆಯಲ್ಲಿ ಹೊಂಬಣ್ಣ ಬರುವಂತೆ ಕರಿಯಬೇಕು. ಸ್ವಲ್ಪ ಕಂದುಬಣ್ಣ ಬರುವಂತೆ ಕರಿದರೂ ಗರಿ ಗರಿಯಾಗಿರುತ್ತದೆ. ಚಿಕ್ಕ ಪೂರಿಗಳಂತೆ ಲಟ್ಟಿಸಿ ಕರಿದರೆ ಇದಕ್ಕೆ ‘ಪಾರಸ್ ಫೇಣಿ’ ಎನ್ನುತ್ತಾರೆ.

***

ಅಪೀಲ್ ಉಂಡೆ

ಬೇಕಾಗುವ ಸಾಮಗ್ರಿಗಳು: ‌ಮೈದಾಹಿಟ್ಟು – 1ಕಪ್‌, ತುಪ್ಪ – 2ಟೇಬಲ್ ಚಮಚ, ಉಪ್ಪು – ರುಚಿಗೆ, ನೀರು, ಒಣಕೊಬ್ಬರಿ ತುರಿ – 1ಕಪ್‌, ಏಲಕ್ಕಿಪುಡಿ – ಸ್ವಲ್ಪ, ದ್ರಾಕ್ಷಿ ಹಾಗೂ ಗೋಡಂಬಿ, ಎಣ್ಣೆ – ಕರಿಯಲು 

ತಯಾರಿಸುವ ವಿಧಾನ: ಒಂದು ಕಪ್ ಮೈದಾಹಿಟ್ಟು ಜರಡಿ ಹಿಡಿದು, ಅದಕ್ಕೆ ಉಪ್ಪು ಹಾಗೂ ಒಂದು ಟೇಬಲ್ ಚಮಚ ತುಪ್ಪ ಹಾಕಿ ಚೆನ್ನಾಗಿ ಕಲೆಸಿ ಬೇಕೆನ್ನಿಸುವಷ್ಟು ನೀರು ಹಾಕಿ ಪೂರಿಹಿಟ್ಟಿನಂ ತೆ ಕಲೆಸಿಕೊಳ್ಳಿ. ನಂತರ ದೊಡ್ಡ ಪೂರಿಯಂತೆ ತೆಳುವಾಗಿ ಲಟ್ಟಿಸಿ ಅಂಚಿಗೆ ನೀರನ್ನು ಹಚ್ಚಿ ಮಡಿಸಿ. ಮತ್ತೊಮ್ಮೆ ಅದರ ಮೇಲೆ ಹದವಾಗಿ ಲಟ್ಟಿಸಿ, ಕಾದ ಎಣ್ಣೆಯಲ್ಲಿ ಹದವಾಗಿ ಕರಿಯಿರಿ. ಸ್ವಲ್ಪ ತಣಿದಮೇಲೆ ಕೈಯಿಂದ ಪುಡಿ ಮಾಡಿ. ನಂತರ ಸಕ್ಕರೆ ಎಳೆಪಾಕ ಮಾಡಿಕೊಂಡು ಅದಕ್ಕೆ ಪುಡಿ ಮಾಡಿಕೊಂಡ ಪೂರಿಯ ಪುಡಿಗೆ ಒಣಕೊಬ್ಬರಿ ತುರಿ, ಏಲಕ್ಕಿ ಪುಡಿ ದ್ರಾಕ್ಷಿ, ಗೋಡಂಬಿ ತುಂಡುಗಳನ್ನು ಹಾಕಿ ಚೆನ್ನಾಗಿ ಕೆದಕಿ ಕೆಳಗಿಳಿಸಿ. ಸ್ವಲ್ಪ ಆರಿದಮೇಲೆ ಕೈಗೆ ಅಕ್ಕಿಹಿಟ್ಟು ಅದ್ದಿಕೊಂಡು ಉಂಡೆ ಕಟ್ಟಿ. ಇದು ತುಂಬಾ ರುಚಿಯಾಗಿರುತ್ತದೆ. ಒಂದು ವಾರ ಕೆಡದೆಯೂ ಇರುತ್ತದೆ.

***

ಸೆವೆನ್ ಕಪ್ ಸ್ವೀಟ್

ಬೇಕಾಗುವ ಸಾಮಗ್ರಿಗಳು: ಸಕ್ಕರೆ – 3ಕಪ್‌, ಹಾಲು – 1ಕಪ್‌, ಒಂದು ಕಪ್ ಕಡ್ಲೆಹಿಟ್ಟು – 1ಕಪ್‌, ತುಪ್ಪ ಅಥವಾ ಎಣ್ಣೆ – 1ಕಪ್‌, ತೆಂಗಿನತುರಿ – 1ಕಪ್‌, ಗೋಡಂಬಿ ಪುಡಿ – 1/2ಕಪ್‌ 

ತಯಾರಿಸುವ ವಿಧಾನ: ತಳ ದಪ್ಪಕ್ಕಿರುವ ಒಂದು ಪಾತ್ರೆಗೆ ಅಥವಾ ಕೋಟಿಂಗ್ ಬಾಣಲೆಗೆ ಗೋಡಂಬಿ ಪುಡಿ ಬಿಟ್ಟು ಮಿಕ್ಕೆಲ್ಲವನ್ನೂ ಹಾಕಿ ಸಣ್ಣ ಉರಿಯಲ್ಲಿ ಕೈಬಿಡದೇ ಕೆದಕುತ್ತಿರಿ. ಹತ್ತು ನಿಮಿಷದ ನಂತರ ಈ ಮಿಶ್ರಣ ಬಂಗಾರದ ಬಣ್ಣ ಬಂದು ಘಮ ಬರುತ್ತದೆ. ಪಾತ್ರೆಯ ಅಂಚಿನಿಂದ ತುಪ್ಪ ಬಿಟ್ಟು ಬಂದಂತಾದಾಗ, ಗೋಡಂಬಿಪುಡಿಯನ್ನು ಹಾಕಿ ಚೆನ್ನಾಗಿ ಕೆದಕಿ ಅಂಚಿರುವ ದೊಡ್ಡ ಸ್ಟೀಲ್ ತಟ್ಟೆಗೆ ತುಪ್ಪ ಹಚ್ಚಿ ಈ ಮಿಶ್ರಣವನ್ನು ಸಮನಾಗಿ ಸುರಿದು ಆರಲು ಬಿಡಿ. ಸ್ವಲ್ಪ ಆರಿದ ನಂತರ ಬೇಕಾದ ಆಕಾರಕ್ಕೆ ಕತ್ತರಿಸಿ ಸವಿಯಿರಿ.

***

ಪೂಜೆಯ ನೈವೇದ್ಯಕ್ಕೆ

ಭಟ್ಟಿಯಲ್ಲಿ ಹುರಿದ ಅವಲಕ್ಕಿ ಪುರಿ ಒಂದು ಕಪ್, 2ಚಮಚ ಹುರಿದ ಎಳ್ಳು, ಬೆಲ್ಲದ ಪುಡಿ, 1ಕಪ್ ಕೊಬ್ಬರಿತುರಿ, ಹುರಿಗಡಲೆ ಅರ್ಧ ಕಪ್, ಹುರಿದು ಸಿಪ್ಪೆ ತೆಗೆದ ಕಡಲೆಬೀಜ ಒಂದು ಹಿಡಿ – ಈ ಎಲ್ಲವನ್ನೂ ಸೇರಿಸಿ ಒಂದು ಬೌಲ್‌ಗೆ ಹಾಕಿ ಸೇರಿಸಿ ಮಿಕ್ಸ್ ಮಾಡಿ ಗಣಪನಿಗೆ ನೈವೇದ್ಯ ಮಾಡಿ. 

ಬರಹ ಇಷ್ಟವಾಯಿತೆ?

  • 2

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !