7

ಚೆಟ್ಟಿನಾಡು ಸಸ್ಯಾಹಾರ ಊಟದ ವೈಭೋಗ

Published:
Updated:

ಹೈ ದರಾಬಾದ್‌ ಬಿರಿಯಾನಿಗೆ ಫೇಮಸ್‌ ಆಗಿರುವಂತೆ, ಚೆಟ್ಟಿನಾಡು ಮಾಂಸಾಹಾರ ಖಾದ್ಯಗಳ ರುಚಿಗೆ ಹೆಸರುವಾಸಿ. ಆದರೆ ಈ ಚೆಟ್ಟಿನಾಡುವಿನಲ್ಲೂ ಸಸ್ಯಾಹಾರ ಅಡುಗೆಗಳೂ ಇವೆ. ಅವುಗಳೂ ವ್ಹಾವ್ ಎನಿಸುವ ಖಾರ ಖಾರ... ಚೆಟ್ಟಿನಾಡು ಆಹಾರಗಳ ಸವಿಯಲು ಇಂದಿರಾನಗರದ ಸೌತ್‌ ಇಂಡೀಸ್‌ ಹೋಟೆಲ್‌ ಒಳಹೊಕ್ಕೆವು. 

ಕಣ್ಸೆಳೆಯುವ ಒಳಾಂಗಣ ವಿನ್ಯಾಸ, ಸಾಲು ದೀಪಗಳ ಮಂದ ಬೆಳಕು, ಹಿನ್ನೆಲೆ ಸಂಗೀತ, ಪ್ರಶಾಂತ ವಾತಾವರಣ ಊಟಕ್ಕೆ ಜೊತೆಯಾಗುತ್ತದೆ. ತಮಿಳುನಾಡಿನ ಚೆಟ್ಟಿನಾಡು ಪ್ರದೇಶದ ಖಾದ್ಯಗಳ ಸಾಂಪ್ರದಾಯಿಕ ರುಚಿ ಆಹಾರೋತ್ಸವದ ವಿಶೇಷ. ಚೆಟ್ಟಿನಾಡಿನ ಹೆಸರಿನೊಂದಿಗೆ ಪ್ರಸಿದ್ಧವಾಗಿರುವ ಕೆಲ ಖಾದ್ಯಗಳನ್ನು ಶೆಫ್‌ ಮನು ಬೆಂಗಳೂರಿಗರ ರುಚಿಗೆ ಒಗ್ಗುವಂತೆ ತಯಾರಿಸಿದ್ದಾರೆ.

ಚೆಟ್ಟಿನಾಡು ಅಂದ್ರೆ ನೆನಪಾಗುವುದು ನಾಲಿಗೆ ಚುರ್‍ರ್ ಎನ್ನುವ ಖಾರ ಖಾರ ಖಾದ್ಯ, ಊಟ. ಅಲ್ಲಿನ ಸಾಂಪ್ರದಾಯಿಕ ರುಚಿಯನ್ನು ನೀಡುವ ಕರಿ ಕರಿ ಚೆಟ್ಟಿನಾಡು ಸೂಪ್‌, ಮುರ್ಗಾನಿ  ಕೀರಲ್‌ ವಡಾ, ಪಚ್ಚಪಯರು ಪನಿಯರಂ, ಮಶ್ರೂಮ್‌ ಕಟ್ಲೆಟ್‌, ಪೀನಟ್‌ ಸುಂಡೆ, ಪಾಲ್‌ ಕಟ್ಟಿ ಕಾಲನ್‌ ಕರಿ, ಪೆಪ್ಪರ್‌ ರಸಂ ಇಲ್ಲಿನ ವಿಶೇಷ. ಸ್ಟಾರ್ಟರ್ಸ್‌ನಿಂದ ಡೆಸರ್ಟ್‌ ತನಕವೂ ಚೆಟ್ಟಿನಾಡು ಅಡುಗೆಗಳನ್ನೇ ಆಸ್ವಾದಿಸಬಹುದು. 

ಸಂಜೆ ವಾತಾವರಣದಲ್ಲಿ ಬಿಸಿ ಬಿಸಿಯಾಗಿ ಸೂಪ್‌ ಕುಡಿಯೋಣ ಎಂದುಕೊಂಡಾಗ ನಮ್ಮ ಮುಂದಿತ್ತು ಚೆಟ್ಟಿನಾಡು ಸೂಪ್‌. ಎಲ್ಲಾ ಬಗೆಯ ತರಕಾರಿಗಳನ್ನು ಬೇಯಿಸಿ, ಅದರ ನೀರಿಗೆ ಮಸಾಲಾ ಪದಾರ್ಥಗಳನ್ನು ಬೆರೆಸಿ ಸೂಪ್‌ ತಯಾರಿಸಲಾಗಿತ್ತು. ನೋಡಿದರೆ ರಸಂನಂತೆ ಕಾಣುತ್ತಿದ್ದ ಅದನ್ನು ಒಂದು ಚಮಚ ಬಾಯಿಗಿಡುತ್ತಿದ್ದಂತೆ ನಾಲಿಗೆಗೆ ಖಾರದ ಅನುಭವವಾಗುತ್ತದೆ.

ನಂತರ ರುಚಿ ನೋಡಿದ್ದು ಮಶ್ರೂಮ್‌ ಕಟ್ಲೆಟ್‌. ಒಂದು ತುಂಡು ಕಟ್‌ ಮಾಡಿ ಬಾಯಿಗಿಟ್ಟಾಗ ಮೃದುವಾದ ಅನುಭವ ಬಾಯಿಯನ್ನು ಆವರಿಸಿತ್ತು. ಆದರೆ ಮಶ್ರೂಮ್‌ ಎಲ್ಲಿಯೂ ಕಾಣಲಿಲ್ಲ. ಎಲ್ಲಾ ಬಗೆಯ ಮಸಾಲ, ಬೇಳೆ ಜೊತೆ ಅಣಬೆಯನ್ನು ಬೇಯಿಸಿ, ಅದನ್ನು ಚೆನ್ನಾಗಿ ಕಲಸಿ, ಉಂಡೆ ಕಟ್ಟಿದಂತಿತ್ತು. ಅಣಬೆ ಇಷ್ಟವಿಲ್ಲ ಆದರೆ ದೇಹಾರೋಗ್ಯಕ್ಕೆ ಅಣಬೆ ಮುಖ್ಯ ಎನ್ನುವವರು ಈ ಕಟ್ಲೆಟ್‌ ಅನ್ನು ಆರಾಮವಾಗಿ ಸವಿಯಬಹುದು. 

ಅನಾನಸು ಅನ್ನು ತುಂಡು ತುಂಡು ಮಾಡಿ, ಅದನ್ನು ಸ್ವಲ್ಪ ಬಿಸಿ ಮಾಡಿ, ಅದಕ್ಕೆ ಚಾಟ್ ಮಸಾಲ ಬೆರೆಸಿದ ಪೈನಾಪಲ್‌ ಚುಟ್ಟುಡು ಹುಳಿ, ಸಿಹಿ, ಖಾರ ಮಿಶ್ರಣದಿಂದ ಮತ್ತೆ ಮತ್ತೆ ತಿನ್ನಬೇಕೆನಿಸುತ್ತದೆ. ಹೆಸರು ಕಾಳು ಪಡ್ಡು, ಶೇಂಗಾದ ಖಾರ ಚಟ್ನಿಯ ಪೋಡಿ ಇಡ್ಲಿಯ ತಟ್ಟೆ ಕೈ ಸೇರುತ್ತಿದ್ದಂತೆ ಅಷ್ಟೇ ಬೇಗನೆ ಕೈ ಮತ್ತು ಬಾಯಿಗೆ ಕೆಲಸ ಮಾಡುತ್ತಿತ್ತು. ಸ್ಟಾರ್ಟರ್‌ಗಳು ಕೊಂಚ ಖಾರವಾಗಿದ್ದರೂ, ರುಚಿಯಲ್ಲಿ ಭಿನ್ನವಾಗಿದ್ದವು.

ಮೇನ್‌ ಕೋರ್ಸ್‌ನಲ್ಲಿ ತರಕಾರಿ ಪುಲಾವ್‌ ಜೊತೆ ಕರಿಬೇವು-ಬೆಳ್ಳುಳ್ಳಿ ಗ್ರೇವಿ (ಕೈಕರಿ ಸ್ಟ್ಯೂ), ಬೆಂಡಿ ಕಡಾಲಿ ಚೆಟ್ಟಿನಾಡು, ಮಿಕ್ಸ್‌ ವೆಜ್‌ ಸಾಂಬಾರ್‌, ಹೆಸರುಕಾಳು ಉಂಡೆ ಸಾಂಬಾರ್‌ ಜೊತೆಯಾಗುತ್ತದೆ. ಎಲ್ಲವೂ ಖಾರವಾಗಿದ್ದರಿಂದ ಕಣ್ಣು– ಮೂಗಲ್ಲೆಲ್ಲಾ ನೀರು ಸುರಿಯಲಾರಂಭಿಸಿದರೂ, ಆದರಲ್ಲೂ ಒಂದು ಬಗೆಯ ಆನಂದವಿತ್ತು.

ಕರಿಬೇವು, ಬೆಳ್ಳುಳ್ಳಿ, ಹುಣಸೆಹಣ್ಣು, ತುಸು ಅಡುಗೆ ಎಣ್ಣೆಯನ್ನಷ್ಟೇ ಬಳಸಿ ತಯಾರಿಸಿದ್ದ ಕೈಕರಿ ಸ್ಟ್ಟೂ ಆಹಾರೋತ್ಸವದ ವಿಶೇಷ ಖಾದ್ಯ. ಅನ್ನದೊಂದಿಗೆ ಕಲೆಸಿ ತುತ್ತುಮಾಡಿ ಬಾಯಿಗಿಟ್ಟರೆ, ಬೇವಿನ ಘಮ ಆವರಿಸಿತ್ತು. ಬೆಳ್ಳುಳ್ಳಿ, ಹುಣಸೆಯ ಸ್ವಾದ ಅನ್ನಕ್ಕೆ ವಿಶೇಷ ಸಂಗಾಂತಿಯಂತೆ ಬೆರೆತು ಭಿನ್ನ ರುಚಿಯ ಅನುಭವ ನೀಡಿತ್ತು. 

ಸೌತ್‌ ಇಂಡೀಸ್‌ಗೆ ಹೋದ ಮೇಲೆ ಎಳನೀರು ಪಾಯಸ ರುಚಿ ನೋಡದೇ ಹೊರಡುವುದೆಂತು? ಕೊನೆಯಲ್ಲಿ ಡ್ರೈ ಜಾಮೂನು ಹಾಗೂ ಎಳನೀರಿನ ಪಾಯಸ ಕುಡಿದು ಊಟ ಮುಗಿಸಿದ್ದಾಯ್ತು. ತೆಂಗಿನಹಾಲಿಗೆ ಸಕ್ಕರೆ, ಹಾಲು, ಏಲಕ್ಕಿಪುಡಿ ಸೇರಿಸಿದ ಪಾಯಸದ ಸ್ವಾದ ರುಚಿಮೊಗ್ಗುಗಳ ನೆನಪಿನಂಗಳದಲ್ಲಿ ಹಾಗೆಯೇ ಉಳಿದಿತ್ತು.

**
ರೆಸ್ಟೊರೆಂಟ್: ಸೌತ್ ಇಂಡೀಸ್

ವಿಶೇಷ: ಚೆಟ್ಟಿನಾಡು ಆಹಾರೋತ್ಸವ

ಕೊನೆಯ ದಿನ: ಜೂನ್‌ 30

ದರ: ₹520ರಿಂದ ಆರಂಭ

ವಿಳಾಸ: ಸೌತ್ ಇಂಡೀಸ್, ನೂರು ಅಡಿ ರಸ್ತೆ, ಗಿರಿಯಾಸ್ ಮಳಿಗೆ ಮೊದಲ ಮಹಡಿ, ಇಂದಿರಾ ನಗರ

ಟೇಬಲ್ ಕಾಯ್ದಿರಿಸಲು: 080 4163 6363

Tags: 

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !