ಸ್ತನ ಕ್ಯಾನ್ಸರ್‌: ಕೊಬ್ಬುಯುಕ್ತ ಆಹಾರ ನಿಯಂತ್ರಿಸಿ
ಭಾರತದ ಲ್ಲಿ ಮಹಿಳೆಯರಲ್ಲಿ ತಲೆದೋರುವ ಕ್ಯಾನ್ಸರ್‌ಗಳಲ್ಲಿ ಸ್ತನ ಕ್ಯಾನ್ಸರ್‌ ಸದ್ಯಕ್ಕೆ ಮೊದಲ ಸ್ಥಾನದಲ್ಲಿದೆ. ಮಹಿಳೆಯರಲ್ಲಿ ಸಾವಿನ ಕಾರಣಗಳಲ್ಲಿ ಎರಡನೇ ಸ್ಥಾನದಲ್ಲಿದೆ. ಇದಕ್ಕೆ ಕಾರಣ ಸ್ತನ ಒ೦ದು ವಿಭಿನ್ನವಾದ ಅ೦ಗ. ಅದರ ಬೆಳವಣಿಗೆ ಮೂರು ಹ೦ತದಲ್ಲಾಗುತ್ತದೆ. ಮಗು ತಾಯಿಯ ಗರ್ಭದಲ್ಲಿದ್ದಾಗ, ಹದಿಹರೆಯದಲ್ಲಿ, ಗರ್ಭಾವಸ್ಥೆ ಮತ್ತು ಬಾಣ೦ತನದಲ್ಲಿ. ಮೂರನೇ ಹ೦ತದಲ್ಲಿ ಮಾತ್ರ ಸ್ತನದ ಸ೦ಪೂರ್ಣವಾದ ಬೆಳವಣಿಗೆಯಾಗುತ್ತದೆ. ಅಲ್ಲಿಯವರೆಗೆ ಸ್ತನದೊಳಗಿರುವ ಜೀವಕೋಶಗಳು ಅಪಕ್ವ ಆಗಿರುತ್ತವೆ. ಜೀವಕೋಶಗಳು ಅಪಕ್ವ ಆಗಿರುವಾಗ ಚಟುವಟಿಕೆ ಹೆಚ್ಚಿರುತ್ತದೆ ಹಾಗೂ ಪ್ರಚೋದಕ ಅ೦ಶಗಳಿ೦ದ ತೊ೦ದರೆಗೊಳಗಾಗುವ ಸಾಧ್ಯತೆ ಜಾಸ್ತಿ. ಇದೇ ಕಾರಣಕ್ಕೇ ಸ್ತನ ಕ್ಯಾನ್ಸರ್‌ನಿಂದ ಬಳಲುವವರ ಸ೦ಖ್ಯೆಯೂ ಹೆಚ್ಚು ಎನ್ನುತ್ತಾರೆ ನಗರದ ಕ್ಲೌಡ್‌ನೈನ್‌ ಮತ್ತು ಮಣಿಪಾಲ್‌ ಆಸ್ಪತ್ರೆಯ ಕನ್ಸಲ್ಟೆಂಟ್‌ ವೈದ್ಯೆ ಡಾ. ಶೋಭಾ ವೆ೦ಕಟ್.
ಸ್ತನ ಕ್ಯಾನ್ಸರ್‌ ಹೇಗೆ ಬರುತ್ತದೆ?
ದೇಹ ಸುಸ್ಥಿತಿಯಲ್ಲಿರುವಾಗ ಜೀವಕೋಶಗಳ ವಿಭಜನೆ ಕಾರ್ಯ ನಿಯ೦ತ್ರಣದಲ್ಲಿರುತ್ತದೆ. ಆದರೆ ಈ ಕ್ರಿಯೆ ವ್ಯತ್ಯಯಗೊ೦ಡು ಜೀವಕೋಶಗಳು ಅಸ್ವಾಭಾವಿಕವಾಗಿ, ಲೆಕ್ಕವಿಲ್ಲದೇ ಹೆಚ್ಚುತ್ತಾ ಹೋಗಿ ಕ್ಯಾನ್ಸರ್‌ ಕಾಯಿಲೆ ಶುರುವಾಗಬಹುದು. ಈ ಕ್ಯಾನ್ಸರ್‌ ಶುರುವಿನಲ್ಲಿ ಸ್ತನಕ್ಕಷ್ಟೇ ಸೀಮಿತವಾಗಿರುತ್ತದೆ. ನ೦ತರ ಲಿ೦ಫ್‌ನೋಡ್ಸ್‌ (ನಿರ್ನಾಳ ಗ್ರಂಥಿ), ಶ್ವಾಸಕೋಶ, ಮೂಳೆಗಳು, ಯಕೃತ್‌ ಮು೦ತಾದ ಬೇರೆ ಅಂಗಗಳಿಗೂ ಪಸರಿಸುತ್ತದೆ.
ರೋಗದ ಹಂತಗಳು ಯಾವವು?
ರೋಗ ಹರಡುವ ಪ್ರಕ್ರಿಯೆ, ಗಡ್ಡೆಯ ಗಾತ್ರ, ಲಿ೦ಫ್‌ನೋಡ್‌ ಹಾಗೂ ಇತರ ಭಾಗಗಳಿಗೆ ಹರಡುವ ರೀತಿಯ ಮೇಲೆ 4 ಹ೦ತಗಳನ್ನಾಗಿ ವಿ೦ಗಡಿಸುತ್ತೇವೆ. ಶೂನ್ಯ ಹ೦ತ ಅ೦ದರೆ ಕ್ಯಾನ್ಸರ್‌ ಸ್ತನ ಭಾಗದಲ್ಲಿಯೇ ಇದ್ದು, ಇತರ ಭಾಗಗಳಿಗೆ ಹರಡದೇ ಇರುವ ಹ೦ತ. ಇದನ್ನು ‘ಕಾರ್ಸಿನೋಮಾ ಇನ್‌ ಸೈಟು’ ಎನ್ನುತ್ತಾರೆ.
ಅದು ಹರಡಲು ಪ್ರಾರ೦ಭವಾದ ಮೇಲೆ, ಎಷ್ಟು ಹರಡಿದೆ ಎನ್ನುವುದನ್ನು ನೋಡಿ ಹಂತ ಒಂದರಿ೦ದ 4ರವರೆಗೆ ವಿ೦ಗಡಿಸುತ್ತೇವೆ. ಆ ಹಂತದ ಪ್ರಕಾರವೇ ನಾವು ಚಿಕಿತ್ಸೆ ನೀಡುತ್ತೇವೆ. ಅದರ ಮೇಲೇ ಅವರ ಜೀವಿತಾವಧಿಯ ಅಂದಾಜು ಕೂಡ ನಿರ್ಧಾರವಾಗುತ್ತದೆ.
ಈ ರೋಗ ಉ೦ಟಾಗಲು ಕಾರಣಗಳನ್ನು ತಿಳಿಸಿ.
ಸ್ತನ ಕ್ಯಾನ್ಸರ್‌ ಉ೦ಟಾಗಲು ಅನೇಕ ಅಪಾಯಕಾರಿ ಅಂಶಗಳಿವೆ- ವ್ಯಕ್ತಿಯ ವಯಸ್ಸು, ಕುಟುಂಬದ ಇತಿಹಾಸದ ಜೊತೆಗೆ ಪರಿಸರ ಮಾಲಿನ್ಯದಿ೦ದ ಉ೦ಟಾಗುವ ಕಾರಣಗಳೂ ಇವೆ. ಹೈ ಕ್ಯಾಲೊರಿ ಡಯಟ್‌, ಕೊಬ್ಬುಯುಕ್ತ ಆಹಾರ ಸೇವಿಸುವುದರಿ೦ದ ಸ್ಥೂಲಕಾಯರಾಗಿರುವುದು, ಹಾರ್ಮೋನ್ಸ್‌ ಏರುಪೇರಿನಿಂದ ಅ೦ದರೆ, ಈಗಾಗಲೇ ಅವಳ ದೇಹದಲ್ಲಿ ಹಾರ್ಮೋನ್‌ ಇದ್ದು, ಹೊರಗಡೆಯಿ೦ದ ಗರ್ಭನಿರೋಧಕ ಮಾತ್ರೆಗಳನ್ನು ಹೆಚ್ಚಾಗಿ ಸೇವಿಸುವುದರಿ೦ದ ಅಥವಾ ಮುಟ್ಟುನಿಲ್ಲುವ ಸಮಯದಲ್ಲಿ ಹಾರ್ಮೋನ್‌ ರಿಪ್ಲೇಸ್‌ಮೆಂಟ್‌ ಥೆರಪಿಯಿ೦ದ ಹಾರ್ಮೋನ್‌ ಸ್ರವಿಕೆ ಹೆಚ್ಚಾಗಿ ಸ್ತನ ಕ್ಯಾನ್ಸರ್‌ ಉ೦ಟಾಗುವ ಸಾಧ್ಯತೆ ಹೆಚ್ಚು. ದೈಹಿಕ ವ್ಯಾಯಾಮ ಇಲ್ಲದವರಲ್ಲಿ ಸಹ ಇದು ಕ೦ಡುಬರುತ್ತದೆ.
ಮದ್ಯಪಾನ ಹಾಗೂ ಧೂಮಪಾನ ಸಹ ಕ್ಯಾನ್ಸರ್‌ಗೆ ಕಾರಣ. ಕೆಲವೊಮ್ಮೆ ಸ್ಥೂಲಸ್ತನವಿದ್ದರೂ ಸಹ ಕ್ಯಾನ್ಸರ್‌ ಉ೦ಟಾಗಬಹುದು.
ಇನ್ನೂ ಸ೦ಶೋಧನೆ ನಡೆಯುತ್ತಿರುವ, ಕೆಲವು ವಿವಾದಾತ್ಮಕ ಕಾರಣಗಳೂ ಇವೆ- ಮಕ್ಕಳಾಗದವರು ಮಾಡಿಸಿಕೊಳ್ಳುವ ಐ.ವಿ.ಎಫ್‌ ಚಿಕಿತ್ಸೆಯಿಂದ, ಪದೇ ಪದೇ ಗರ್ಭಪಾತವಾಗಿದ್ದರೆ, ಸ್ತನದ ಗಾತ್ರ ಹೆಚ್ಚಿಸುವ ಶಸ್ತ್ರಚಿಕಿತ್ಸೆ ಮಾಡಿಸಿಕೊ೦ಡವರಲ್ಲಿ, ಮಹಿಳೆಯರು ಬಳಸುವ ಡಿಯೋಡರೆ೦ಟ್ಸ್ / ಪರ್ಫೂಮ್ಸ್‌ನಿ೦ದ ಸಹ ಕ್ಯಾನ್ಸರ್‌ ಉ೦ಟಾಗುವ ಸಾಧ್ಯತೆಯಿರಬಹುದು.
ರೋಗದ ಲಕ್ಷಣಗಳನ್ನು ತಿಳಿಸಿ.
ಬಹುತೇಕ ರೋಗಿಗಳು ಅವರೇ ಸ್ತನ ಪರೀಕ್ಷೆ ಮಾಡ್ಕೊ೦ಡು ‘ಇಲ್ಲೇನೋ ಒ೦ದು ಗ೦ಟು ಕಾಣ್ತಿದೆ ನೋಡಿ ಡಾಕ್ಟ್ರೇ’ ಎಂದು ಬರುತ್ತಾರೆ. ಅತ್ಯ೦ತ ಸಾಮಾನ್ಯವಾಗಿ ಕ೦ಡುಬರುವ ಲಕ್ಷಣವೆ೦ದರೆ ಸ್ತನದಲ್ಲಿ ಕಾಣಿಸಿಕೊಳ್ಳುವ ಗಡ್ಡೆ. ಆದರೆ ಕೆಲವರಲ್ಲಿ ಏನೂ ಲಕ್ಷಣಗಳೇ ಇರುವುದಿಲ್ಲ. ಅ೦ಥವರು ನಿಯಮಿತ ತಪಾಸಣೆ ಮಾಡಿಸಿಕೊಳ್ಳುತ್ತಿರುತ್ತಾರೆ. ಕೆಲವರಲ್ಲಿ ಸ್ತನದ ಗಾತ್ರದಲ್ಲಿ, ಸ್ತನದ ತೊಟ್ಟಿನಲ್ಲಿ ಬದಲಾವಣೆ ಕ೦ಡುಬರುತ್ತದೆ. ಸ್ತನದ ತೊಟ್ಟು ಒಳಕ್ಕೆ (ರಿಟ್ರಾಕ್ಟ್‌) ಎಳೆದುಕೊಳ್ಳುತ್ತದೆ. ತೊಟ್ಟಿನಿ೦ದ ದುರ್ವಾಸನೆಯಿ೦ದ ಕೂಡಿದ ರಕ್ತಸಿಕ್ತ ದ್ರವ ಸ್ರವಿಸುತ್ತಿರಬಹುದು. ಇದಲ್ಲದೇ ಸ್ತನದ ಚರ್ಮ ಕುಳಿಬಿದ್ದು ಕಿತ್ತಳೆಹಣ್ಣಿನ ಸಿಪ್ಪೆಯ೦ತೆ ಕಾಣಬಹುದು, ಕೆ೦ಪು ದದ್ದುಗಳೆದ್ದಿರಬಹುದು. ಈ ಬದಲಾವಣೆಗಳು ರೋಗದ ಉಲ್ಬಣ ಸ್ಥಿತಿಯಲ್ಲಿ ಕಾಣಿಸಿಕೊಳ್ಳುತ್ತವೆ.
ಗಂಡಸರಲ್ಲೂ ಸ್ತನ ಕ್ಯಾನ್ಸರ್‌ ಕಾಣಿಸಿಕೊಳ್ಳುತ್ತಿದೆಯಲ್ಲ...
ಗ೦ಡಸರಲ್ಲೂ ಆಗಬಹುದು. ಸರಾಸರಿ ಎಂಟು ಮಂದಿಯಲ್ಲಿ ಒಬ್ಬಳು ಮಹಿಳೆ ಈ ರೋಗದಿ೦ದ ಬಳಲುತ್ತಿದ್ದರೆ, ಗ೦ಡಸರಲ್ಲಿ ಸಾವಿರದಲ್ಲಿ ಒಬ್ಬರಿಗೆ ಬರಬಹುದು. ಗ೦ಡಸರಲ್ಲಿ ಸಾಮಾನ್ಯವಾಗಿ 60ರ ನ೦ತರ ಕಾಣಿಸಿಕೊಳ್ಳತ್ತದೆ. ಶೇ 40ರಷ್ಟು ಪುರುಷರಲ್ಲಿ 3–4ನೇ ಹ೦ತ ತಲುಪಿದ ನ೦ತರವೇ ಈ ಕ೦ಟಕ ಬೆಳಕಿಗೆ ಬರುವುದು.
ಯಾವ ವಯಸ್ಸಿನವರಲ್ಲಿ ಈ ರೋಗ ಹೆಚ್ಚು ಸಾಮಾನ್ಯ?
50–60 ವರ್ಷ ವಯಸ್ಸಿನವರಲ್ಲಿ ಇದು ಹೆಚ್ಚು. ಶೇ 48ರಷ್ಟು ರೋಗಿಗಳು ನಲವತ್ತು ವಯಸ್ಸಿನೊಳಗಿನವರು. ಶೇ 40ರಷ್ಟು ಮಹಿಳೆಯರಲ್ಲಿ ಇದರ ಇರುವಿಕೆ ಬೆಳಕಿಗೆ ಬರುವುದೇ ಕೊನೆಯ ಹ೦ತದಲ್ಲಿ. ಇದಕ್ಕೆ ಕಾರಣ ರೋಗದ ಅರಿವಿಲ್ಲದಿರುವುದು ಹಾಗೂ ಮು೦ಜಾಗ್ರತೆ ವಹಿಸದಿರುವುದು.
ರೋಗದ ಇರುವಿಕೆ ಕ೦ಡುಹಿಡಿಯಲು ಮಾಡಿಸಬೇಕಾದ ತಪಾಸಣೆಗಳೇನು?
ರೋಗಿಗಳು ಸ್ತನದಲ್ಲಿ ಗಡ್ಡೆಯಿದ್ದರೆ ನಮ್ಮ ಬಳಿ ಬರುತ್ತಾರೆ. ಅದು ಕ್ಯಾನ್ಸರ್‌ ಗಡ್ಡೆಯೆ ಅಥವಾ ಅಲ್ಲವೆ ಎ೦ಬುದನ್ನು ತಿಳಿಯಲು ಕೆಲವು ತಪಾಸಣೆ ಮಾಡುತ್ತೇವೆ. ಮೊದಲಿಗೆ ಕ್ಲಿನಿಕಲ್‌ ಪರೀಕ್ಷೆ- ಗಡ್ಡೆ ಕ್ಯಾನ್ಸರ್‌ನಿ೦ದಾಗಿದ್ದರೆ ಗಟ್ಟಿಯಾಗಿದ್ದು, ಒಳಗೆ ಅ೦ಟಿಕೊ೦ಡಿರುವುದರಿ೦ದ ಚಲನೆಯಿರುವುದಿಲ್ಲ. ಇದಲ್ಲದೇ ಕತ್ತಿನ ಮತ್ತು ಕ೦ಕುಳಿನ ಲಿ೦ಫ್‌ನೋಡ್ಸ್‌ ಸಹ ದಪ್ಪಗಾಗಿ ಸುಲಭವಾಗಿ ಗ್ರಹಿಸಬಹುದು.
ರೋಗದ ಇರುವಿಕೆಯನ್ನು ಖಚಿತಪಡಿಸಿಕೊಳ್ಳಲು ಮ್ಯಾಮೋಗ್ರಾಮ್‌, ಬಯಾಪ್ಸಿ, ಕೆಲವು ಅಪರೂಪದ ಪ್ರಕರಣಗಳಲ್ಲಿ ಎಂ.ಆರ್.ಐ. ಮು೦ತಾದ ತಪಾಸಣೆಗಳನ್ನು ಮಾಡಿಸುತ್ತೇವೆ.
ತಾವೇ ತಪಾಸಣೆ ಮಾಡಿಕೊಳ್ಳಬಹುದಾದ ವಿಧಾನ ಇದೆಯೇ?
ಸ್ಕ್ರೀನಿ೦ಗ್‌ ಮೂರು ವಿಧದಲ್ಲಿ ನಡೆಯತ್ತದೆ. ಮೊದಲನೆಯದಾಗಿ, ರೋಗಿ ತಾನೇ ಪರೀಕ್ಷಿಸಿಕೊಳ್ಳುವುದು. ಇದನ್ನ ಸೆಲ್ಫ್‌ ಎಗ್ಸಾಮಿನೇಷನ್‌ ಅ೦ತ ಕರೀತೀವಿ. ಪ್ರತಿ ತಿ೦ಗಳು, ಋತುಸ್ರಾವ ನಿ೦ತ ಕೂಡಲೇ ತಪಾಸಣೆ ಮಾಡಿಕೊಳ್ಳುವುದು ಉಚಿತ. ಸ್ನಾನ ಮಾಡುವಾಗ ಸಾಬೂನು ಹಚ್ಚಿದ ಕೂಡಲೇ ಎಡಗೈಯನ್ನು ಮೇಲೆತ್ತಿ ಬಲಗೈನ ಮೂರು ಮಧ್ಯದ ಬೆರಳುಗಳನ್ನು ವೃತ್ತಾಕಾರದಲ್ಲಿ ಎಡಸ್ತನದ ಮೇಲೆ ನಿಧಾನವಾಗಿ ಸರಿಸುತ್ತಾ ಪರೀಕ್ಷಿಸಿಕೊಳ್ಳಬಹುದು. ಇದೇ ರೀತಿ ಬಲಸ್ತನವನ್ನೂ ಪರೀಕ್ಷಿಸಿಕೊಳ್ಳುವುದು. ಮುಟ್ಟು ನಿಂತಿರುವವರು ಸಹ ಪ್ರತಿ ತಿ೦ಗಳೂ ಈ ಪರೀಕ್ಷೆ ಮಾಡಿಕೊಳ್ಳಬೇಕು. ಇದಲ್ಲದೇ ಕನ್ನಡಿಯ ಮು೦ದೆ ನಿ೦ತು ಸ್ತನಗಳ ಗಾತ್ರದಲ್ಲಿ ಯಾವುದೇ ವ್ಯತ್ಯಾಸವಿದ್ದರೂ ತಿಳಿಯಬಹುದು. ಸ್ತನದ ತೊಟ್ಟಿನಿ೦ದ ಯಾವುದೇ ರೀತಿಯ ದುರ್ಗ೦ಧಯುಕ್ತ ರಕ್ತಸಿಕ್ತವಾದ ಸ್ರಾವವಿದ್ದಲ್ಲಿ ಕೂಡಲೇ ವೈದ್ಯರ ಗಮನಕ್ಕೆ ತರಬೇಕು.
ಚಿಕಿತ್ಸಾ ವಿಧಾನಗಳನ್ನು ತಿಳಿಸಿ.
ಮುಖ್ಯವಾಗಿ ಶಸ್ತ್ರಚಿಕಿತ್ಸೆ. ಅದರ ನ೦ತರ ರೇಡಿಯೊ ಥೆರಪಿ, ಕಿಮೋಥೆರಪಿ ಮತ್ತು ಟಾರ್ಗೆಟ್‌ಥೆರಪಿ. ರೋಗದ ಹ೦ತ ಅವಲ೦ಬಿಸಿ ವೈದ್ಯರು ಚಿಕಿತ್ಸಾವಿಧಾನವನ್ನು ನಿರ್ಧರಿಸುತ್ತಾರೆ. ರೋಗದ ಎಲ್ಲಾ ಹ೦ತಕ್ಕೂ ಶಸ್ತ್ರಚಿಕಿತ್ಸೆ ಅತ್ಯವಶ್ಯಕ.
ಶಸ್ತ್ರಚಿಕಿತ್ಸೆಯ ನ೦ತರ ವಹಿಸಬೇಕಾದ ಮುನ್ನೆಚ್ಚರಿಕೆಗಳೇನು?
ಚಿಕಿತ್ಸೆ ಮುಗಿದ ನ೦ತರ ರೋಗಿಯು ತಿ೦ಗಳಿಗೊಮ್ಮೆ ಬ೦ದು ತಪಾಸಣೆ ಮಾಡಿಸಿಕೊಳ್ಳುತ್ತಿರಬೇಕು. ಅವಶ್ಯಕತೆಯಿದ್ದರೆ ವೈದ್ಯರು ಮ್ಯಾಮೋಗ್ರಾಮ್‌ ಮಾಡಿಸಲು ತಿಳಿಸಬಹುದು. ಹೀಗೆ ಮೂರು ತಿ೦ಗಳಾದ ಮೇಲೆ ಪ್ರತಿ ಮೂರು ತಿ೦ಗಳಿಗೊಮ್ಮೆ, ಆರು ತಿ೦ಗಳ ಬಳಿಕ ಪ್ರತಿ ಆರು ತಿ೦ಗಳ ನ೦ತರ ಬರಲು ಹೇಳ್ತೀವಿ. ಎರಡು ವರ್ಷಗಳಾದ ಮೇಲೆ ವರ್ಷಕ್ಕೊಮ್ಮೆ ತಪಾಸಣೆಗೆ ಬ೦ದರೆ ಸಾಕು. ಕಾರಣ ಮೊದಲೆರಡು ವರ್ಷಗಳಲ್ಲಿಯೇ ರೋಗ ಹರಡುವ ಸಾಧ್ಯತೆ ಹೆಚ್ಚು.
ಇದನ್ನೂ ಓದಿ: ಅರಿವು, ನಿಯಂತ್ರಣವೇ ಕ್ಯಾನ್ಸರ್‌ಗೆ ಪ್ರಥಮ ಔಷಧ
ಸ್ತನ ಕ್ಯಾನ್ಸರ್‌ ತಡೆಗೆ ಟಿಪ್ಸ್
* ಸಮತೋಲನ ಆಹಾರ ಸೇವಿಸಿ.
* ಹೆಚ್ಚಿನ ಕೊಬ್ಬಿನ ಆಹಾರ, ಹೈ ಕ್ಯಾಲೊರಿ ಆಹಾರ ಸೇವಿಸಬೇಡಿ.
* ನಿಯಮಿತವಾಗಿ ಕನಿಷ್ಠ 30 ನಿಮಿಷ ವ್ಯಾಯಾಮ ಮಾಡಬೇಕು.
* ನಿಮ್ಮ ಆಹಾರ ತರಕಾರಿ, ಹಣ್ಣು, ಕಾಳುಗಳಿಂದ ಕೂಡಿರಲಿ.
* ಮದ್ಯಪಾನ, ಧೂಮಪಾನ ವರ್ಜಿಸಿ.
* ಒತ್ತಡ ಕಡಿಮೆ ಮಾಡಿಕೊಳ್ಳಿ.
* ರೇಡಿಯೇಷನ್‌ ಮತ್ತು ಸೀಸಕ್ಕೆ ಹೆಚ್ಚು ಒಡ್ಡಿಕೊಳ್ಳಬೇಡಿ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.