ನವದೆಹಲಿ: ದೇಶದಲ್ಲಿ ಕೋವಿಡ್‌ ರೂಪಾಂತರ ತಳಿ ಓಮೈಕ್ರಾನ್‌ ಪತ್ತೆಯಾಗಿರುವ ಮಧ್ಯೆಯೇ ಭಾರತದಲ್ಲಿ ಮುಖಗವಸು (ಮಾಸ್ಕ್‌) ಧರಿಸುವ ಮಾರ್ಗಸೂಚಿಗಳ ಅನುಸರಣೆ ಅತ್ಯಂತ ಕಡಿಮೆ ಮಟ್ಟದಲ್ಲಿದೆ ಎಂಬ ಕಳವಳಕಾರಿ ಅಂಶವನ್ನು ಸಮೀಕ್ಷೆಯೊಂದು ಬಹಿರಂಗಪಡಿಸಿದೆ.
ಸಮೀಕ್ಷೆ ನಡೆಸಿದವರಲ್ಲಿ ಶೇ 2 ರಷ್ಟು ಜನರು ಮಾತ್ರ ತಮ್ಮ ಪ್ರದೇಶದಲ್ಲಿನ ಜನರು ಮಾಸ್ಕ್‌ ಧರಿಸುವ ಮಾರ್ಗಸೂಚಿಗಳನ್ನು ಅನುಸರಿಸುತ್ತಿದ್ದಾರೆ ಎಂದು ತಿಳಿಸಿರುವುದಾಗಿ ಅದು ಹೇಳಿದೆ.
ಡಿಜಿಟಲ್‌ ಸಮುದಾಯ ಆಧಾರಿತ ವೇದಿಕೆಯಾದ ಲೋಕಲ್‌ ಸರ್ಕಲ್ಸ್‌ ಇತ್ತೀಚಿಗೆ ಸಮೀಕ್ಷೆಯೊಂದನ್ನು ನಡೆಸಿದೆ. ತಮ್ಮ ಪ್ರದೇಶದಲ್ಲಿನ ಅನೇಕ ಜನರು ಮನೆಯಿಂದ ಹೊರಗಡೆ ಹೋಗುವಾಗ ಮಾಸ್ಕ್‌ ಧರಿಸುವುದಿಲ್ಲ ಎಂದು ಸಮೀಕ್ಷೆ ನಡೆಸಿದ ಮೂವರಲ್ಲಿ ಒಬ್ಬರು ಭಾರತೀಯರು ಹೇಳುತ್ತಾರೆ ಎಂದು ಲೋಕಲ್‌ ಸರ್ಕಲ್ಸ್‌ ಸಂಸ್ಥೆ ಹೇಳಿದೆ.
ಕಳೆದ ಏಪ್ರಿಲ್‌ನಲ್ಲಿ ಸಂಸ್ಥೆ ಭಾರತದ 364 ಜಿಲ್ಲೆಗಳಲ್ಲಿ ನಡೆಸಿದ ಸಮೀಕ್ಷೆಯಲ್ಲಿ 25 ಸಾವಿರಕ್ಕೂ ಹೆಚ್ಚು ಜನರಿಂದ ಪ್ರತಿಕ್ರಿಯೆಗಳನ್ನು ಪಡೆದಿದೆ.
ಮಾಸ್ಕ್‌ ಧರಿಸುವ ಬಗ್ಗೆ ಜನರಲ್ಲಿ ಅಗತ್ಯ ಜಾಗೃತಿ ಮೂಡಿಸಬೇಕಿದೆ ಎಂದು ಸಮೀಕ್ಷೆ ಅಭಿಪ್ರಾಯಪಟ್ಟಿದೆ.
‘ಓಮೈಕ್ರಾನ್‌ ವೈರಾಣು ಪತ್ತೆಯಾಗಿರುವ ಈ ಸಮಯದಲ್ಲಿ ಮಾಸ್ಕ್‌ ಧರಿಸುವ ಬಗ್ಗೆ ಕೇಂದ್ರ, ರಾಜ್ಯ ಸರ್ಕಾರಗಳು ಹಾಗೂ ಜಿಲ್ಲಾಡಳಿತಗಳು ಅಗತ್ಯ ಕ್ರಮಗಳನ್ನು ಕೈಗೊಳ್ಳಬೇಕು’ ಎಂದು ಸಂಸ್ಥೆಯ ಸ್ಥಾಪಕ ಸಚಿನ್‌ ತಪಾರಿಯಾ ಹೇಳಿದ್ದಾರೆ.
