ನವದೆಹಲಿ: ಕೋಳಿಗಳಿಗೆ ಒಂದೇ ಡೋಸ್ ನೀಡುವ ಲಸಿಕೆ ಈಗ ಭಾರತದಲ್ಲಿ ಲಭ್ಯ ಎಂದು ಬಯೋಫಾರ್ಮಾಸ್ಯೂಟಿಕಲ್ ಕಂಪನಿ ‘ಬೊಯಿಹ್ರಿಂಗರ್ ಇಂಗೆಲ್ಹಿಮ್ ಇಂಡಿಯಾ’ ಬುಧವಾರ ತಿಳಿಸಿದೆ.
ಈ ಲಸಿಕೆ ಇಡೀ ಜೀವಿತಾವಧಿಯುದ್ದಕ್ಕೂ ರಕ್ಷಣೆ ಒದಗಿಸುತ್ತದೆ. ’ವಿಎಎಕ್ಸ್ಎಕ್ಸ್ಐಟಿಇಕೆ ಎಚ್ವಿಟಿ+ಐಬಿಡಿ’ ಹೆಸರಿನಲ್ಲಿ ಈ ಲಸಿಕೆಯನ್ನು ಬಿಡುಗಡೆ ಮಾಡಲಾಗಿದೆ.
ಸೋಂಕು ಹರಡುವ ಬುರ್ಸಲ್ ಕಾಯಿಲೆ ಮತ್ತು ಮರೆಕ್ ಕಾಯಿಲೆಗಳ ವಿರುದ್ಧ ಈ ಲಸಿಕೆ ಪರಿಣಾಮಕಾರಿಯಾಗಿ ಕಾರ್ಯನಿರ್ವಹಿಸುತ್ತದೆ. ಈ ಕಾಯಿಲೆಗಳಿಂದಲೇ ಕುಕ್ಕುಟೋದ್ಯಮಕ್ಕೆ ಅಪಾರ ಹಾನಿಯಾಗುತ್ತಿದೆ. ಇದನ್ನು ತಡೆಯುವ ಉದ್ದೇಶದಿಂದ ಲಸಿಕೆ ತಯಾರಿಸಲಾಗಿದೆ ಎಂದು ಕಂಪನಿ ತಿಳಿಸಿದೆ.
ಬ್ರೆಜಿಲ್ನಲ್ಲಿ ಈ ಲಸಿಕೆಯನ್ನು ಮೊದಲ ಬಾರಿ ಬಿಡುಗಡೆ ಮಾಡಲಾಗಿತ್ತು. ಈಗ ಲಸಿಕೆಯು 100 ದೇಶಗಳಲ್ಲಿ ಲಭ್ಯವಾಗುತ್ತಿದೆ. ಜಾಗತಿಕವಾಗಿ 13 ಸಾವಿರ ಕೋಟಿ ಪಕ್ಷಿಗಳಿಗೆ ಲಸಿಕೆ ಹಾಕಲಾಗಿದೆ ಎಂದು ಕಂಪನಿ ತಿಳಿಸಿದೆ.
ಈ ಲಸಿಕೆಯು ಸರಳ ಮತ್ತು ಪರಿಣಾಮಕಾರಿಯಾಗಿದೆ. ಒಂದು ಲಸಿಕೆಯಿಂದ ಎರಡು ಕಾಯಿಲೆಗಳಿಗೆ ಔಷಧ ದೊರೆತಂತಾಗಿದೆ. ಜತೆಗೆ ಹೆಚ್ಚುವರಿಯಾಗಿ ಯಾವುದೇ ಲಸಿಕೆ ಹಾಕುವ ಅಗತ್ಯ ಇರುವುದಿಲ್ಲ ಎಂದು ‘ಬೊಯಿಹ್ರಿಂಗರ್ ಇಂಗೆಲ್ಹಿಮ್ ಇಂಡಿಯಾ’ ತಿಳಿಸಿದೆ.