ಆಗ್ರಾ/ಲಖನೌ: ಹರಿಯಾಣದ ಗುರುಗ್ರಾಮದಿಂದ ಮಧ್ಯಪ್ರದೇಶದ ಪನ್ನಾ ನಗರಕ್ಕೆ ಹೊರಟ್ಟಿದ್ದ ಖಾಸಗಿ ಬಸ್‌ವೊಂದನ್ನು ಆಗ್ರಾದಲ್ಲಿ ಬುಧವಾರ ಅಪಹರಿಸಲಾಗಿದೆ.
ಹಣಕಾಸು ವಿಷಯಕ್ಕಾಗಿ ಈ ಅಪಹರಣ ನಡೆದಿದೆ. ಫೈನಾನ್ಸ್‌ ಕಂಪನಿಯೊಂದರ ಏಜೆಂಟರು ಬಸ್‌ ಅಪಹರಿಸಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಚಾಲಕ, ಸಿಬ್ಬಂದಿ ಹಾಗೂ ಬಸ್‌ನಲ್ಲಿದ್ದ ಪ್ರಯಾಣಿಕರೆಲ್ಲರೂ ಸುರಕ್ಷಿತವಾಗಿದ್ದಾರೆ ಎಂದು ಗೃಹ ಇಲಾಖೆಯ ಹೆಚ್ಚುವರಿ ಮುಖ್ಯಕಾರ್ಯದರ್ಶಿ ಅವನೀಶ್‌ ಅವಸ್ಥಿ ತಿಳಿಸಿದ್ದಾರೆ.
‘ಬಸ್‌ನಿಂದ ತಪ್ಪಿಸಿಕೊಂಡಿದ್ದ ಮೂವರು ಪ್ರಯಾಣಿಕರು ಈ ಅಪಹರಣ ಕೃತ್ಯದ ಕುರಿತು ಮಾಹಿತಿ ನೀಡಿದರು. ಈ ಬಸ್‌ ಖರೀದಿಸಲು ಸಾಲ ನೀಡಿದ್ದ ಫೈನಾನ್ಸ್‌ ಕಂಪನಿಯೇ ಬಸ್‌ಅನ್ನು ಅಪಹರಿಸಿದ ಬಗ್ಗೆ ಪ್ರಾಥಮಿಕ ಮಾಹಿತಿ ದೊರೆತಿದ್ದು, ಬಸ್‌ಗಾಗಿ ಶೋಧ ಕಾರ್ಯ ನಡೆದಿದೆ’ ಎಂದು ಹಿರಿಯ ಜಿಲ್ಲಾ ಪೊಲೀಸ್‌ಅಧಿಕಾರಿ ಬಬ್ಲೂಕುಮಾರ್ ತಿಳಿಸಿದ್ದಾರೆ.
