ನವದೆಹಲಿ:ಮಾನ್ಸೂನ್ ಮಳೆಯು ಈಶಾನ್ಯ ರಾಜ್ಯಗಳನ್ನು ಪ್ರವೇಶಿಸುತ್ತಿದ್ದಂತೆ ಮೇಘಾಲಯದ ಚಿರಾಪುಂಜಿಯಲ್ಲಿ ಬುಧವಾರ ಬೆಳಿಗ್ಗೆ 8.30ಕ್ಕೆ ಕೊನೆಗೊಂಡ 24 ತಾಸುಗಳಲ್ಲಿ 811.6 ಮಿ.ಮೀ ಭಾರಿ ಮಳೆ ಸುರಿದಿದೆ.
1995ರ ಜೂನ್‌ನಿಂದ ಈವರೆಗೆ ಇಷ್ಟೊಂದು ಪ್ರಮಾಣದ ಮಳೆ ಒಂದೇ ದಿನದಲ್ಲಿ ಸುರಿದಿರಲಿಲ್ಲ. 27 ವರ್ಷಗಳ ನಂತರ ಅತಿ ಹೆಚ್ಚು ಮಳೆ ಬಿದ್ದಿದೆ ಎಂದು ಭಾರತೀಯ ಹವಾಮಾನ ಇಲಾಖೆ (ಐಎಂಡಿ) ತಿಳಿಸಿದೆ.
ಚಿರಾಪುಂಜಿಯಿಂದ 10 ಕಿ.ಮೀ ವೈಮಾನಿಕ ಅಂತರದಲ್ಲಿ, ದೇಶದ ಅತ್ಯಂತ ಆರ್ದ್ರ ಸ್ಥಳವಾದ ಮೌಸಿನ್ರಾಮ್‌ನಲ್ಲಿ ಇದೇ ಅವಧಿಯಲ್ಲಿ 710.6 ಮಿ.ಮೀ ಮಳೆ ದಾಖಲಾಗಿದೆ. ಇದು1966ರಜೂನ್‌ ನಂತರ ಸುರಿದ ಗರಿಷ್ಠ ಮಳೆ ಎನಿಸಿದೆ.
ವಿಶ್ವದ ಅತ್ಯಂತ ಆರ್ದ್ರ ಸ್ಥಳಗಳಲ್ಲಿ ಒಂದಾದ ಚಿರಾಪುಂಜಿಯಲ್ಲಿ ಜೂನ್‌ನಲ್ಲಿ ಒಂದೇ ದಿನದಲ್ಲಿ ದಾಖಲೆಯ 750 ಮಿಲಿ ಮೀಟರ್‌ಗಿಂತ ಹೆಚ್ಚು ಮಳೆ ಬಿದ್ದಿರುವುದು ಐಎಂಡಿ ದತ್ತಾಂಶದಲ್ಲಿ ದಾಖಲಾಗಿದೆ.
