ಮೋದಿ ಆದಿವಾಸಿ ಸಮುದಾಯದ ವಿರೋಧಿ: ಕಾಂಗ್ರೆಸ್‌ ಟೀಕೆ

‘ವಿವಿಧ ಯೋಜನೆಗಳಿಗಾಗಿ ವಿದೇಶಿ ಕಂಪನಿಗಳು ಹಾಗೂ ಬಂಡವಾಳಶಾಹಿಗಳಿಗೆ ಅರಣ್ಯ ಭೂಮಿಯನ್ನು ಗುತ್ತಿಗೆ ರೂಪದಲ್ಲಿ ಕೊಡಲು ಇರುವ ಅಡಚಣೆ ನಿವಾರಿಸುವ ಸಲುವಾಗಿ ಮೋದಿ ಸರ್ಕಾರ ಕಾಯ್ದೆ ತಿದ್ದುಪಡಿಗೆ ತೀರ್ಮಾನಿಸಿದೆ. ಇದರೊಂದಿಗೆ ಆದಿವಾಸಿಗಳ ಜೀವಿಸುವ ಹಕ್ಕಿನ ಮೇಲೆ ಗದಾಪ್ರಹಾರ ನಡೆಸಲು ಮುಂದಾಗಿದೆ. ಇದನ್ನು ಕಾಂಗ್ರೆಸ್‌ ವಿರೋಧಿಸಲಿದೆ’ ಎಂದು ತಿಳಿಸಿದೆ.

‘ಅರಣ್ಯ ಭೂಮಿ ಕಬಳಿಸುವುದಕ್ಕಾಗಿ ಮೋದಿ ಮಿತ್ರ ಸರ್ಕಾರವು ಕಾಯ್ದೆಗೆ ತಿದ್ದುಪಡಿ ತಂದಿದೆ. ಹೊಸ ನಿಯಮಗಳನ್ನು ನಮ್ಮ ಪಕ್ಷ ವಿರೋಧಿಸಲಿದೆ. ಈ ವಿಚಾರದಲ್ಲಿ ಪಕ್ಷವು ಆದಿವಾಸಿ ಸಮುದಾಯದ ಸಹೋದರ–ಸಹೋದರಿಯರ ಜೊತೆ ನಿಲ್ಲಲಿದೆ. ಜಲ, ಅರಣ್ಯ ಹಾಗೂ ಭೂಮಿಯ ರಕ್ಷಣೆಗಾಗಿ ಅವರು ನಡೆಸುವ ಹೋರಾಟಕ್ಕೆ ಬೆಂಬಲ ನೀಡಲಿದೆ’ ಎಂದು ಕಾಂಗ್ರೆಸ್‌ ನಾಯಕ ರಾಹುಲ್‌ ಗಾಂಧಿ ಟ್ವೀಟ್‌ ಮಾಡಿದ್ದಾರೆ.

‘ಬಿಜೆಪಿ ಸರ್ಕಾರದ ನೂತನ ನೀತಿಯು 2006ರ ಅರಣ್ಯ ಹಕ್ಕು ಕಾಯ್ದೆಯ ಆಶಯವನ್ನೇ ನಾಶಪಡಿಸಲಿದೆ. ಬೆರಳೆಣಿಕೆ ಮಂದಿಯ ಹಿತಕ್ಕಾಗಿ ಬಿಜೆಪಿ ಸರ್ಕಾರವು ಬಹುಸಂಖ್ಯಾತರ ಬದುಕನ್ನು ಕಸಿದುಕೊಳ್ಳಲು ಮುಂದಾಗಿದೆ’ ಎಂದು ರಾಜ್ಯಸಭಾ ಸದಸ್ಯ ಜೈರಾಮ್‌ ರಮೇಶ್‌ ಟ್ವೀಟ್ ಮೂಲಕ ಟೀಕಿಸಿದ್ದಾರೆ.

‘ವಿಜ್ಞಾನ ಮತ್ತು ತಂತ್ರಜ್ಞಾನ, ಪರಿಸರ, ಅರಣ್ಯ ಮತ್ತು ಹವಾಮಾನ ಬದಲಾವಣೆ ಸಂಬಂಧಿತ ಸಂಸದೀಯ ಸ್ಥಾಯಿ ಸಮಿತಿ ಸದಸ್ಯರ ಗಮನಕ್ಕೆ ತರದೆ, ಅವರೊಂದಿಗೆ ಚರ್ಚಿಸದೆಯೇ ಏಕಪಕ್ಷೀಯವಾಗಿ ನೂತನ ನಿಯಮಗಳನ್ನು ಜಾರಿಗೊಳಿಸಲಾಗಿದೆ’ ಎಂದು ದೂರಿದ್ದಾರೆ.