ಮಂಗಳವಾರ, ಡಿಸೆಂಬರ್ 7, 2021
27 °C

ಸಬ್ಯಸಾಚಿ ಜಾಹೀರಾತು ವಿವಾದ: ಪುನರಾವರ್ತನೆಯಾದರೆ ನೇರ ಕ್ರಮ- ನರೋತ್ತಮ್ ಮಿಶ್ರಾ

ಪಿಟಿಐ Updated:

ಅಕ್ಷರ ಗಾತ್ರ : | |

ಭೋಪಾಲ್: ವಿವಾದಕ್ಕೆ ಕಾರಣವಾಗಿದ್ದ ಪ್ರತ್ಯೇಕ ಜಾಹೀರಾತುಗಳನ್ನು ಡಿಸೈನರ್ ಬ್ರಾಂಡ್ ಸಬ್ಯಸಾಚಿ ಮತ್ತು ಡಾಬರ್ ಇಂಡಿಯಾ ಹಿಂತೆಗೆದುಕೊಂಡಿವೆ. ಈ ಹಿಂದೆ ಇಬ್ಬರಿಗೂ ಎಚ್ಚರಿಕೆ ನೀಡಿದ್ದ ಮಧ್ಯಪ್ರದೇಶದ ಗೃಹ ಸಚಿವ ನರೋತ್ತಮ್ ಮಿಶ್ರಾ, ಇದು ಮತ್ತೊಮ್ಮೆ ಪುನರಾವರ್ತನೆಯಾದರೆ ಎಚ್ಚರಿಕೆ ನೀಡದೆ ನೇರವಾಗಿ ಕ್ರಮ ಕೈಗೊಳ್ಳಲಾಗುವುದು ಎಂದು ಹೇಳಿದ್ದಾರೆ.

ಡಾಬರ್ ಮತ್ತು ಸಬ್ಯಸಾಚಿಯ ವಿವಾದಾತ್ಮಕ ಜಾಹೀರಾತುಗಳನ್ನು ಉಲ್ಲೇಖಿಸಿದ ಮಿಶ್ರಾ, ಅವುಗಳನ್ನು ಮೊದಲ ಬಾರಿಗೆ ಮಾಡಿದ 'ತಪ್ಪು' ಎಂದು ಪರಿಗಣಿಸುತ್ತಿರುವುದಾಗಿ ಹೇಳಿದರು.

'ಆಕ್ಷೇಪಾರ್ಹ ಮತ್ತು ಅಶ್ಲೀಲತೆಯಿಂದ ಕೂಡಿರುವ ಜಾಹೀರಾತನ್ನು ಹಿಂತೆಗೆದುಕೊಳ್ಳುವಂತೆ ಮಧ್ಯ ಪ್ರದೇಶದ ಗೃಹ ಸಚಿವರು ನರೋತ್ತಮ್ ಮಿಶ್ರಾ ಅವರು, ಸಬ್ಯಸಾಚಿ ಮುಖರ್ಜಿ ಅವರಿಗೆ 24 ಗಂಟೆಗಳ ಗಡುವು ನೀಡಿದ್ದರು. ಇದಾದ ಕೆಲವೇ ಗಂಟೆಗಳ ನಂತರ, ಜಾಹೀರಾತು ಸಮಾಜದ ಒಂದು ವರ್ಗಕ್ಕೆ ನೋವುಂಟು ಮಾಡಿರುವುದರಿಂದ ನಮಗೆ 'ತೀವ್ರ ದುಃಖವಾಗಿದೆ' ಎಂದಿದ್ದ ಸಬ್ಯಸಾಚಿ ಭಾನುವಾರ ತನ್ನ ಮಂಗಳಸೂತ್ರ ಜಾಹೀರಾತನ್ನು ಎಲ್ಲ ಕಡೆಯಿಂದಲೂ ಹಿಂತೆಗೆದುಕೊಂಡಿತ್ತು.

ಇದನ್ನೂ ಓದಿ: 

ಜಾಹೀರಾತಿನಲ್ಲಿ ಅರೆನಗ್ನವಾಗಿ ಕಾಣಿಸಿಕೊಂಡಿದ್ದ ಮಹಿಳೆಯೊಬ್ಬರು ಮಂಗಳಸೂತ್ರವನ್ನು ಧರಿಸಿ ಪುರುಷನೊಂದಿಗೆ ನಿಂತಿದ್ದರು. ಇದಕ್ಕೆ ಸಾಮಾಜಿಕ ಜಾಲತಾಣಗಳಲ್ಲೂ ವ್ಯಾಪಕ ವಿರೋಧ ವ್ಯಕ್ತವಾಗಿತ್ತು.

'ಜಾಹೀರಾತನ್ನು ಹಿಂತೆಗೆದುಕೊಳ್ಳುವಂತೆ ನಾನು ಸಬ್ಯಸಾಚಿ ಮುಖರ್ಜಿ ಅವರಿಗೆ ಹೇಳಿದ ನಂತರ ಅವರು ತಮ್ಮ ಜಾಹೀರಾತನ್ನು ಹಿಂಪಡೆದಿದ್ದಾರೆ. ಅಲ್ಲಿಗೆ ಈ ವಿಚಾರ ಮುಗಿಯಿತು. ಡಾಬರ್ ಆಗಲಿ ಅಥವಾ ಸಬ್ಯಸಾಚಿಯಾಗಲಿ ಈಗ ಮಾಡಿರುವುದು ಮೊದಲ ಬಾರಿಗೆ ಆದ ತಪ್ಪು ಎಂದು ನಾವು ಪರಿಗಣಿಸಿದ್ದೇವೆ. ಇದು ಪುನರಾವರ್ತನೆಯಾದಲ್ಲಿ ಎಚ್ಚರಿಕೆ ನೀಡದೆಯೇ ನೇರವಾಗಿ ಕ್ರಮ ಕೈಗೊಳ್ಳಲಾಗುವುದು' ಎಂದು ಮಿಶ್ರಾ ಸುದ್ದಿಗಾರರಿಗೆ ತಿಳಿಸಿದರು.

ಇದನ್ನೂ ಓದಿ: 

'ಜನರ ಭಾವನೆಗಳು ಮತ್ತು ನಂಬಿಕೆಯನ್ನು ನೋಯಿಸಬೇಡಿ ಎಂದು ನಾನು ಅವರಿಗೆ (ಡಾಬರ್ ಮತ್ತು ಸಬ್ಯಸಾಚಿ) ಮನವಿ ಮಾಡುತ್ತೇನೆ' ಎಂದು ಅವರು ಹೇಳಿದರು.

ಕಳೆದ ವಾರವಷ್ಟೇ, ಹಿಂದೂ ಚಿಹ್ನೆಗಳನ್ನು ಅವಮಾನಿಸಿದಕ್ಕಾಗಿ ಕಾನೂನು ಕ್ರಮಗಳನ್ನು ತೆಗೆದುಕೊಳ್ಳುವುದಾಗಿ ಮಿಶ್ರಾ ಎಚ್ಚರಿಸಿದ ನಂತರ ಡಾಬರ್ ಇಂಡಿಯಾ ತನ್ನ ಫೆಮ್ ಕ್ರೀಮ್ ಬ್ಲೀಚ್ ಜಾಹೀರಾತನ್ನು ಹಿಂತೆಗೆದುಕೊಂಡಿತ್ತು. ಇದರಲ್ಲಿ 'ಲೆಸ್ಬಿಯನ್' ದಂಪತಿಗಳು ಕರ್ವಾ ಚೌತ್ ಆಚರಿಸುತ್ತಿರುವುದು ಮತ್ತು ಜರಡಿ ಮೂಲಕ ಪರಸ್ಪರ ನೋಡುತ್ತಿರುವುದನ್ನು ತೋರಿಸಲಾಗಿತ್ತು.

ತಾಜಾ ಮಾಹಿತಿ ಪಡೆಯಲು ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು