ನವದೆಹಲಿ: ಕೊರೊನಾ ಸಾಂಕ್ರಾಮಿಕದ ಬಿಕ್ಕಟ್ಟಿನಿಂದಾಗಿ ಕಳೆದ ಆರ್ಥಿಕ ವರ್ಷದಲ್ಲಿ ರೈಲ್ವೆ ಸಚಿವಾಲಯವು ಪ್ರಯಾಣಿಕರ ವಿಭಾಗದಲ್ಲಿ ₹38,017 ಕೋಟಿ ನಷ್ಟ ಅನುಭವಿಸಿತು. ಆದರೆ, ಶ್ರಮಿಕ ರೈಲುಗಳ ಸೇವೆ, ಅಗತ್ಯ ಸರಕು ಸಾಣೆಯಲ್ಲಿ ಕೈಗೊಂಡ ಕೆಲವೊಂದು ಹೊಸ ಪ್ರಯತ್ನಗಳಿಂದಾಗಿ ಸ್ವಲ್ಪ ಮಟ್ಟಿಗೆ ನಷ್ಟವನ್ನು ಸರಿದೂಗಿಸಿಕೊಳ್ಳಲಾಗಿದೆ.
ಪ್ರಯಾಣಿಕರ ವಿಭಾಗದಲ್ಲಿ ಕಳೆದ ವರ್ಷ ರೈಲ್ವೆ ಸಚಿವಾಲಯದ ನಿವ್ವಳ ಆದಾಯ ₹53,525.57 ಕೋಟಿ ಇತ್ತು. ಆದರೆ ಈ ವರ್ಷ ಕೇವಲ ₹15,507.68 ಕೋಟಿ ಆಗಿದ್ದು, ಶೇ 71.03ರಷ್ಟು ಕಡಿಮೆಯಾಗಿದೆ.
ಏಪ್ರಿಲ್ 2020ರಿಂದ ಫೆಬ್ರವರಿ 2021ರವರೆಗೆ ಪ್ರಯಾಣಿಕರ ವಿಭಾಗದ ಒಟ್ಟು ಆದಾಯ ₹ 12,409.49 ಕೋಟಿಗಳಾಗಿದ್ದು, ಹಿಂದಿನ ವರ್ಷ ಇದೇ ಅವಧಿಯಲ್ಲಿ ₹48,809.40 ಕೋಟಿ ಆಗಿತ್ತು.
