ನವದೆಹಲಿ (ಪಿಟಿಐ): ದೆಹಲಿ ನಗರದಲ್ಲಿ ಕೋವಿಡ್ ರೋಗಿಗಳನ್ನು ಆಸ್ಪತ್ರೆಗೆ ಸೇರಿಸುವ ಸಲುವಾಗಿ ಆಂಬುಲೆನ್ಸ್‌ಗಳಿಗೆ ಭಾರಿ ಬೇಡಿಕೆ ಸೃಷ್ಟಿಯಾಗಿದೆ. ಈ ಸಲುವಾಗಿ ಕಳೆದೊಂದು ವಾರದಿಂದ ನಿತ್ಯವೂ 2,550 ಕರೆಗಳು ಬಂದಿವೆ. ನಗರಾಡಳಿತವು ನೀಡಿರುವ ಈ ದತ್ತಾಂಶವನ್ನು ಗಮನಿಸಿದರೆ ದೆಹಲಿಯಲ್ಲಿ ಕೋವಿಡ್ ಅಲೆಯ ಹೊಡೆತ ಎಷ್ಟಿದೆ ಎಂದು ತಿಳಿಯುತ್ತದೆ.
ಒಟ್ಟಾರೆ ಒಂದು ವಾರದಲ್ಲಿ 17,924 ಕರೆಗಳು ಬಂದಿವೆ. ಹಿಂದಿನ ವಾರಗಳಿಗೆ ಹೋಲಿಸಿದರೆ ಭಾರಿ ಪ್ರಮಾಣದಲ್ಲಿ ಏರಿಕೆಯಾಗಿದೆ. ಏಪ್ರಿಲ್ ಮೊದಲ ವಾರದಲ್ಲಿ 1,900 ಕರೆಗಳು ಬಂದಿದ್ದವು.
ಏಪ್ರಿಲ್ 15 ಮತ್ತು 16ರಂದು 2,279, ಏಪ್ರಿಲ್ 20ರಂದು 2,861, ಏಪ್ರಿಲ್ 21ರಂದು 2,618 ಆಂಬುಲೆನ್ಸ್‌ಗಳನ್ನು ಬೇಡಿಕೆ ಮೇರೆಗೆ ಕಳುಹಿಸಿಕೊಡಲಾಗಿದೆ. ಈ ಅವಧಿಯಲ್ಲಿ ದೆಹಲಿಯಲ್ಲಿ 1,347 ಜನರು ಮೃತಪಟ್ಟಿದ್ದಾರೆ.
ಸಾವಿನ ಸಂಖ್ಯೆಯಲ್ಲಿನ ಹೆಚ್ಚಳದಿಂದಾಗಿ, ಅಧಿಕಾರಿಗಳು ಈಗ ನೇರ ಮೇಲ್ವಿಚಾರಣಾ ವ್ಯವಸ್ಥೆ ಜಾರಿಗೊಳಸಿದ್ದಾರೆ. ಸ್ಮಶಾನಗಳ ನಿರ್ವಹಣೆಗೆ ನಿಯಂತ್ರಣ ಕೊಠಡಿ ಪ್ರಾರಂಭಿಸಿದ್ದಾರೆ.
