ಗುರುವಾರ, 28 ಮಾರ್ಚ್ 2024
×
ADVERTISEMENT
ಈ ಕ್ಷಣ :
ADVERTISEMENT
ADVERTISEMENT

ಇಸ್ರೊ ಗಗನಯಾನ ಮಿಷನ್‌: ಎಲ್‌ ಆ್ಯಂಡ್‌ ಟಿಯಿಂದ ‘ಬೂಸ್ಟರ್‌ ಸೆಗ್ಮೆಂಟ್‌’ ಪೂರೈಕೆ

ಭಾರತದಲ್ಲೇ ತಯಾರಾದ ಪ್ರಪ್ರಥಮ ಉಡಾವಣಾ ಉಪಕರಣ
Last Updated 17 ನವೆಂಬರ್ 2020, 12:37 IST
ಅಕ್ಷರ ಗಾತ್ರ

ಮುಂಬೈ: ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆಯ (ಇಸ್ರೊ) ಮಹಾತ್ವಾಕಾಂಕ್ಷೆಯ ಯೋಜನೆಗಳಲ್ಲಿ ಒಂದಾದ ಮಾನವಸಹಿತ ‘ಗಗನಯಾನ’ ಯೋಜನೆಯು ಕೋವಿಡ್‌–19 ಪಿಡುಗಿನ ನಡುವೆಯೂ ಚುರುಕು ಪಡೆದಿದೆ.

ಲಾರ್ಸೆನ್‌ ಆ್ಯಂಡ್‌ ಟುಬ್ರೊ (ಎಲ್‌ ಆ್ಯಂಡ್‌ ಟಿ) ಕಂಪನಿಯು ಗಗನಯಾನ ಯೋಜನೆಯ ಉಡಾವಣಾ ರಾಕೆಟ್‌ನ ಮೊದಲ ಉಪಕರಣವನ್ನು(ಎಸ್‌–200 ಬೂಸ್ಟರ್‌ ಸೆಗ್ಮಂಟ್‌) ಇಸ್ರೊಗೆ ಹಸ್ತಾಂತರಿಸಿದೆ. ಬೂಸ್ಟರ್‌ ಸೆಗ್ಮೆಂಟ್‌ ಅನ್ನು ಮುಂಬೈನಲ್ಲಿರುವ ಎಲ್‌ ಆ್ಯಂಡ್‌ ಟಿಯ ಪೊವೈ ಏರೋಸ್ಪೇಸ್‌ ಉತ್ಪಾದನಾ ಘಟಕದಲ್ಲಿ ತಯಾರಿಸಲಾಗಿದೆ. ನಿಗದಿತ ಅವಧಿಗೂ ಮೊದಲೇ ಬೂಸ್ಟರ್‌ನ ಮಧ್ಯಭಾಗವನ್ನು ತಯಾರಿಸಲಾಗಿದೆ. ಇಸ್ರೊ ಅಧ್ಯಕ್ಷ ಡಾ.ಕೆ.ಶಿವನ್‌, ಎಲ್‌ ಆ್ಯಂಡ್‌ ಟಿ ಮಂಡಳಿಯ ನಿರ್ದೇಶಕ ಜಯಂತ್‌ ಪಾಟಿಲ್‌ ಅವರು ಆನ್‌ಲೈನ್‌ ಮೂಲಕ ನಡೆದ ಕಾರ್ಯಕ್ರಮದಲ್ಲಿ ಇದರ ರವಾನೆಗೆ ಹಸಿರು ನಿಶಾನೆ ತೋರಿದರು.

ಗಗನಯಾನ ಯೋಜನೆಯಲ್ಲಿ ಪ್ರಮುಖ ಪಾತ್ರ ವಹಿಸುತ್ತಿರುವ ಎಲ್‌ ಆ್ಯಂಡ್‌ ಟಿ, ಚಂದ್ರಯಾನ ಹಾಗೂ ಮಂಗಳಯಾನ ಯೋಜನೆಗಳಿಗೂ ಹಲವು ಉಪಕರಣಗಳನ್ನು ನಿರ್ಮಿಸಿದೆ. ಪ್ರಸ್ತುತ ನಿರ್ಮಿಸಿರುವ ಬೂಸ್ಟರ್‌ ಸೆಗ್ಮೆಂಟ್‌, 3.2 ಮೀ ವ್ಯಾಸ, 8.5 ಮೀ ಉದ್ದವಿದ್ದು 5.5 ಟನ್‌ ತೂಕವಿದೆ.

‘ಗುಣಮಟ್ಟದ ಎಲ್ಲ ಮಾನದಂಡಗಳನ್ನು ಪಾಲಿಸಿಕೊಂಡು ಎರಡೂ ತಂಡಗಳು ನಿರಂತರವಾಗಿ ಕಾರ್ಯನಿರ್ವಹಿಸಿನಿಗದಿತ ಅವಧಿಯೊಳಗೇ ಇದನ್ನು ಸಾಧಿಸಿದೆ’ ಎಂದು ಶಿವನ್‌ ಶ್ಲಾಘಿಸಿದರು. ‘ಮಹತ್ತರವಾದ ಗಗನಯಾನ ಯೋಜನೆಗೆ ಇಸ್ರೊ ನಮ್ಮ ಮೇಲೆ ಇಟ್ಟಿರುವ ನಂಬಿಕೆಗೆ ಹೆಮ್ಮೆ ಇದೆ. ಐದು ದಶಕದಿಂದ ಇಸ್ರೊ ಜೊತೆಗೆ ಎಲ್‌ ಆ್ಯಂಡ್‌ ಟಿ ಕಾರ್ಯನಿರ್ವಹಿಸುತ್ತಿದ್ದು, ಜೊತೆಯಾಗಿ ರಾಷ್ಟ್ರದ ಮಹತ್ವಾಕಾಂಕ್ಷೆಯನ್ನು ಈಡೇರಿಸುತ್ತೇವೆ’ ಎಂದು ಪಾಟಿಲ್‌ ತಿಳಿಸಿದರು.

‘ಗಗನಯಾನ ಯೋಜನೆಗೆ ಗಗನಯಾನಿಗಳನ್ನು ಹೊತ್ತೊಯ್ಯಲು ಜಿಎಸ್‌ಎಲ್‌ವಿ ಮಾರ್ಕ್‌–3 ರಾಕೆಟ್‌ ಬಳಸಲು ನಿರ್ಧರಿಸಲಾಗಿದೆ. ಈ ರಾಕೆಟ್‌ಗೆ ಎಸ್‌–200 ಉತ್ಕೃಷ್ಟ ಬೂಸ್ಟರ್‌ ಆಗಿ ಕಾರ್ಯನಿರ್ವಹಿಸಲಿದೆ’ ಎಂದು ಪ್ರಕಟಣೆಯಲ್ಲಿ ಎಲ್‌ ಆ್ಯಂಡ್‌ ಟಿ ತಿಳಿಸಿದೆ.

ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.

ADVERTISEMENT
ADVERTISEMENT
ADVERTISEMENT
ADVERTISEMENT