ನವದೆಹಲಿ: ಗುಜರಾತ್, ಹಿಮಾಚಲ ಪ್ರದೇಶ ವಿಧಾನಸಭೆಗಳ ಹಾಗೂ ಹಲವು ರಾಜ್ಯಗಳ ಉಪಚುನಾವಣೆಗಳ ಮತ ಎಣಿಕೆ ಗುರುವಾರ ನಡೆಯಲಿದೆ.
ಗುಜರಾತ್ ಹಾಗೂ ಹಿಮಾಚಲ ಪ್ರದೇಶಗಳಲ್ಲಿ ಹೊಸ ದಾಖಲೆಗಳನ್ನು ಬರೆಯುವ ಉಮೇದಿನಲ್ಲಿ ಬಿಜೆಪಿ ಇದೆ. ಗುಜರಾತ್‌ನಲ್ಲಿ ಸತತ ಆರು ಚುನಾವಣೆಗಳನ್ನು (27 ವರ್ಷ) ಕಮಲ ಪಾಳಯ ಗೆದ್ದಿದೆ. ಒಂದು ವೇಳೆ, ಈ ಸಲ ಗೆದ್ದರೆ ಪಶ್ಚಿಮ ಬಂಗಾಳದ ಎಡರಂಗದ ಸರ್ಕಾರದ ದಾಖಲೆಯನ್ನು (1977ರಿಂದ 2011ರ ಅವಧಿಯಲ್ಲಿ ಸತತ ಏಳು ಚುನಾವಣೆ ಗೆಲುವು) ಸರಿಗಟ್ಟಿದಂತಾಗುತ್ತದೆ.
2017ಕ್ಕೆ ಹೋಲಿಸಿದರೆ ಈ ಸಾಲಿನಲ್ಲಿ ಪಕ್ಷ ಉತ್ತಮ ಸಾಧನೆ ಮಾಡಲಿದೆ ಎಂಬುದು ಕಾಂಗ್ರೆಸ್‌ ನಾಯಕರ ವಿಶ್ವಾಸ. ತಮ್ಮ ಪಕ್ಷವು ಉತ್ತಮ ಸಾಧನೆ ಮಾಡಲಿದೆ ಎಂದು ಎಎಪಿ ನಾಯಕರು ಭರವಸೆ ವ್ಯಕ್ತಪಡಿಸಿದ್ದಾರೆ.
