ನವದೆಹಲಿ: 2022–23ನೇ ಸಾಲಿನಲ್ಲಿಪ್ರತಿ ದಿನ 50 ಕಿ.ಮೀ. ನಂತೆ ದಾಖಲೆಯ 18,000 ಕಿ.ಮೀ ಹೆದ್ದಾರಿ ನಿರ್ಮಾಣ ಮಾಡುವ ಗುರಿ ಹಾಕಿಕೊಳ್ಳಲಾಗಿದೆ ಎಂದು ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವಾಲಯ ಭಾನುವಾರ ತಿಳಿಸಿದೆ.
‘2025ರ ಒಳಗಾಗಿ 2 ಲಕ್ಷ ಕಿ.ಮೀ ರಾಷ್ಟ್ರೀಯ ಹೆದ್ದಾರಿ ಅಭಿವೃದ್ಧಿಪಡಿಸುವ ಉದ್ದೇಶ ಇದೆ. ಕೋವಿಡ್‌ ಸಂಬಂಧಿತ ಅಡೆತಡೆಗಳು ಮತ್ತು ದೇಶದ ಕೆಲವು ಭಾಗಗಳಲ್ಲಿ ವಾಡಿಕೆಗಿಂತ ಹೆಚ್ಚು ಕಾಲದವರೆಗೆ ಮಳೆ ಮುಂದುವರಿದ ಕಾರಣ 2021–22ನೇ ಸಾಲಿನಲ್ಲಿ ರಾಷ್ಟ್ರೀಯ ಹೆದ್ದಾರಿ ನಿರ್ಮಾಣ ಕಾಮಗಾರಿ ನಿಧಾನಗೊಂಡಿತ್ತು. ದಿನಕ್ಕೆ ಕೇವಲ 28.64 ಕಿ.ಮೀ ರಸ್ತೆಯನ್ನು ಮಾತ್ರ ನಿರ್ಮಾಣ ಮಾಡಲಾಗಿದೆ. ಆದರೆ 2020–21ರಲ್ಲಿ ದಿನವೊಂದಕ್ಕೆ ದಾಖಲೆಯ 37 ಕಿ.ಮೀ ರಸ್ತೆ ನಿರ್ಮಾಣ ಮಾಡಲಾಗಿತ್ತು’ ಎಂದು ಅದು ತಿಳಿಸಿದೆ.
2021–22ರಲ್ಲಿ 10,457 ಕಿ.ಮೀ ರಾಷ್ಟ್ರೀಯ ಹೆದ್ದಾರಿ ನಿರ್ಮಾಣ ಮಾಡಲಾಗಿದೆ. 2020–21ರಲ್ಲಿ 13,327 ಕಿ.ಮೀ ರಸ್ತೆ ನಿರ್ಮಿಸಲಾಗಿತ್ತು ಎಂದು ತಿಳಿಸಲಾಗಿದೆ.
