ನವದೆಹಲಿ:ತಮಿಳುನಾಡಿನಲ್ಲಿ ಸಂಭವಿಸಿದ ಹೆಲಿಕಾಪ್ಟರ್‌ ದುರಂತದಲ್ಲಿ ಮಡಿದ ಸೇನಾ ಸಿಬ್ಬಂದಿಯಲ್ಲಿ ಒಬ್ಬರಾದ ಬ್ರಿಗೇಡಿಯರ್‌ ಲಖ್ವಿಂದರ್ ಸಿಂಗ್‌ ಲಿದ್ದರ್‌ ಸದ್ಯದಲ್ಲೇ ಮೇಜರ್‌ ಜನರಲ್‌ ಆಗಿ ಅವರು ಬಡ್ತಿ ಪಡೆಯಲಿದ್ದರು ಎನ್ನಲಾಗಿದೆ.
ಸೇನಾಪಡೆಗಳ ಮುಖ್ಯಸ್ಥ ಜನರಲ್‌ ಬಿಪಿನ್ ರಾವತ್ ಅವರಿಗೆ ರಕ್ಷಣಾ ಸಹಾಯಕರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದ ಅವರು, ಮೂರೂ ಸೇನೆಗಳ ನಡುವಣ ಸಮನ್ವಯ ಸುಧಾರಣಾ ಯೋಜನೆಗಾಗಿ ಸಾಕಷ್ಟು ಕೆಲಸ ಮಾಡಿದ್ದರು. ಜಮ್ಮು ಮತ್ತು ಕಾಶ್ಮೀರದಲ್ಲಿ ನಡೆಸಲಾಗಿದ್ದ ಭಯೋತ್ಪಾದಕ ನಿಗ್ರಹ ಕಾರ್ಯಾಚರಣೆ ಗಳಲ್ಲಿ ಪ್ರಮುಖ ಪಾತ್ರವಹಿಸಿದ್ದರು. ಜೊತೆಗೆ, ಭಾರತ–ಚೀನಾ ಗಡಿಯಲ್ಲಿ ಸೇನಾ ತುಕಡಿ ಮುನ್ನಡೆಸಿದ್ದರು.
1990ರಲ್ಲಿ ಅವರು ಜಮ್ಮು ಮತ್ತು ಕಾಶ್ಮೀರ ರೈಫಲ್ಸ್‌ಗೆ ನಿಯೋಜನೆಗೊಂಡಿದ್ದರು. ಬಳಿಕ ಅವರು ಸೇನಾ ತುಕಡಿಯನ್ನು ಮುನ್ನಡೆಸಿದ್ದರು. ಕಝಕಿಸ್ತಾನದ ರಾಯಭಾರ ಕಚೇರಿಯಲ್ಲಿಯೂ ಲಿದ್ದರ್‌ ಸೇವೆ ಸಲ್ಲಿಸಿದ್ದರು.
ತಮ್ಮ ಸೇವೆಗಾಗಿ ‘ಸೇನಾ ಪದಕ’ ಮತ್ತು ‘ವಿಶಿಷ್ಠ ಸೇವಾ ಪದಕ’ಗಳನ್ನು ಲಿದ್ದರ್‌ ಪಡೆದಿದ್ದಾರೆ.
ಬ್ರಿಗೇಡಿಯರ್‌ ಲಿದ್ದರ್‌ ಕುರಿತು ಕೇಂದ್ರದ ಮಾಜಿ ಸಚಿವ, ನಿವೃತ್ತ ಯೋಧ ರಾಜ್ಯವರ್ಧನ್‌ ರಾಥೋಡ್‌ಟ್ವೀಟ್‌ ಮಾಡಿದ್ದಾರೆ. ‘ಎನ್‌ಡಿಎಯಲ್ಲಿ ಇಬ್ಬರೂ ಒಟ್ಟಿಗೆ ತರಬೇತಿ ಪಡೆದೆವು. ಕಾಶ್ಮೀರದಲ್ಲಿ ಭಯೋತ್ಪಾದಕರ ವಿರುದ್ಧ ಒಟ್ಟಿಗೇ ಹೋರಾಡಿದೆವು. ಬ್ರಿಗೇಡಿಯರ್‌ ಎಲ್‌.ಎಸ್‌. ಲಿದ್ದರ್‌ ನಿಧನದಿಂದ ಒಬ್ಬ ಅಪ್ರತಿಮ ಮತ್ತು ಧೈರ್ಯಶಾಲಿ ಅಧಿಕಾರಿಯನ್ನು ಭಾರತ ಕಳೆದುಕೊಂಡಿದೆ. ನಾನು ಒಬ್ಬ ಸ್ನೇಹಿತನನ್ನು ಕಳೆದುಕೊಂಡಿದ್ದೇನೆ’ ಎಂದು ಹೇಳಿದ್ದಾರೆ.
