ಜಮ್ಮು: ಅಂತರರಾಷ್ಟ್ರೀಯ ಗಡಿ ದಾಟಿ ಪಾಕಿಸ್ತಾನದ ಕಡೆಯಿಂದ ಒಳ ನುಸುಳುವ ಯತ್ನವನ್ನು ವಿಫಲಗೊಳಿಸಿರುವ ಗಡಿ ಭದ್ರತಾ ಪಡೆ (ಬಿ.ಎಸ್.ಎಫ್) ಸಿಬ್ಬಂದಿ, ಮಾದಕ ವಸ್ತುಗಳಿದ್ದ 58 ಪ್ಯಾಕೆಟ್ ಗಳು ಹಾಗೂ ಎರಡು ಪಿಸ್ತೂಲ್ ಅನ್ನು ವಶಕ್ಕೆ ಪಡೆದಿದ್ದಾರೆ.
ಇಲ್ಲಿನ ಆರ್‌.ಎಸ್. ಪುರ ವಲಯದಲ್ಲಿ ಶಂಕಿತ ಕಳ್ಳಸಾಗಣೆದಾರರು ಶನಿವಾರ ಮಧ್ಯರಾತ್ರಿ ಒಳನುಸುಳಲು ಯತ್ನಿಸಿದ್ದರು. ಶಂಕಾಸ್ಪದವಾಗಿದ್ದ ಕೆಲವರ ಚಲನವಲನ ಗಮನಿಸಿದ ಬುಧ್ವಾರ್ ಮತ್ತು ಬುಲ್ಲೆಚಾಕ್‌ನಲ್ಲಿ ಬಿಎಸ್‌ಎಫ್‌ ಸಿಬ್ಬಂದಿ ಗುಂಡು ಹಾರಿಸಿದ್ದಾರೆ. ಬಳಿಕ ಶಂಕಿತರು ಪರಾರಿಯಾಗಿದ್ದಾರೆ ಎಂದು ಅಧಿಕಾರಿಯೊಬ್ಬರು ತಿಳಿಸಿದರು.
ಈ ವೇಳೆ ಘಟನಾ ಸ್ಥಳದಿಂದ ಪರಿಶೀಲಿಸಿದಾಗ 58 ಮಾದಕ ದ್ರವ್ಯಗಳ ಪ್ಯಾಕೆಟ್, 2 ಪಿಸ್ತೂಲುಗಳು, ನಾಲ್ಕು ಮ್ಯಾಗಜೀನ್ ಗಳು ಹಾಗೂ ಕೆಲ ಶಸ್ತ್ರಾಸ್ತ್ರಗಳು ಪತ್ತೆಯಾಗಿದ್ದು, ವಶಕ್ಕೆ ಪಡೆಯಲಾಗಿದೆ ಎಂದು ತಿಳಿಸಿದ್ದಾರೆ.
