ಪಾಲ್ಘರ್‌, ಮಹಾರಾಷ್ಟ್ರ: ‘ಮಹಾರಾಷ್ಟ್ರದ ಪಾಲ್ಘರ್‌ ಜಿಲ್ಲೆಯ ಕೋರ್ಟ್‌ ಆವರಣಕ್ಕೆ ಅಪರಿಚಿತ ವ್ಯಕ್ತಿಯೊಬ್ಬ ನುಗ್ಗಿ, ಪ್ರಕರಣವೊಂದಕ್ಕೆ ಸಂಬಂಧಪಟ್ಟ ದಾಖಲೆಗಳನ್ನು ಕಳ್ಳತನ ಮಾಡಲು ಪ್ರಯತ್ನಿಸಿದ ಘಟನೆ ನಡೆದಿದೆ’ ಎಂದು ಪೊಲೀಸ್‌ ಅಧಿಕಾರಿಯೊಬ್ಬರುಶುಕ್ರವಾರ ತಿಳಿಸಿದ್ದಾರೆ.
‘ಕೋರ್ಟ್‌ನ ಅಧಿಕಾರಿಗಳು ನೀಡಿರುವ ದೂರಿನ ಆಧಾರದ ಪ್ರಕಾರ, ಬುಧವಾರ ಮಧ್ಯರಾತ್ರಿ ವೇಳೆ ಈ ಕೃತ್ಯ ನಡೆದಿದೆ. ಆರೋಪಿಯು ಮೇಲ್ಚಾವಣಿಯ ಮೂಲಕ ಕೋರ್ಟ್‌ನ ದಾಖಲೆಗಳ ಕೊಠಣಿಗೆ ಪ್ರವೇಶಿಸಿ, ನಿರ್ದಿಷ್ಟ ಪ್ರಕರಣವೊಂದಕ್ಕೆ ಸಂಬಂಧಿಸಿದ ದಾಖಲೆಗಳನ್ನು ಕದಿಯಲು ಯತ್ನಿಸಿದ್ದಾನೆ’ ಎಂದು ಪೊಲೀಸ್‌ ಪಿಆರ್‌ಒ ಸಚಿನ್‌ ನಾವಡ್ಕರ್‌ ಹೇಳಿದರು.
‘ಮರುದಿನ ಬೆಳಿಗ್ಗೆ ನ್ಯಾಯಾಲಯದ ಸಿಬ್ಬಂದಿಯು ಕೋರ್ಟ್‌ಗೆ ಬಂದಾಗ, ಆತ್ಮಹತ್ಯೆಗೆ ಪ್ರಚೋದನೆಗೆ ಸಂಬಂಧಿಸಿದ ಪ್ರಕರಣವೊಂದರ ದಾಖಲೆಗಳನ್ನು ತಿರುಚಿರುವುದು ಮತ್ತು ಅವುಗಳನ್ನು ಕದಿಯಲು ಪ್ರಯತ್ನಿಸಿರುವುದು ಪತ್ತೆಯಾಗಿದೆ. ಅಪರಿಚಿತ ಆರೋಪಿ ಕೊಠಡಿಯ ಮೇಲ್ಛಾವಣಿಯ ತಗಡುಗಳನ್ನು ನಾಶಪಡಿಸಿದ್ದು, ಕೋಣೆ ಪ್ರವೇಶಿಸಲು ಬೀಗವನ್ನು ಒಡೆದಿದ್ದಾರೆ’ ಎಂದು ಅವರು ಹೇಳಿದರು.
