ಚೆನ್ನೈ: ಪಶ್ಚಿಮ ಬಂಗಾಳ ಮೂಲದ ಪಿ.ಎಚ್.ಡಿ ವಿದ್ಯಾರ್ಥಿನಿಯೊಬ್ಬರಿಗೆ ಲೈಂಗಿಕ ಕಿರುಕುಳ ನೀಡಿದ ಆರೋಪ ಸಂಬಂಧ ಸಂಶೋಧಕ ವಿದ್ಯಾರ್ಥಿ ಕಿಂಗ್ಶುಕ್ ದೇವಶರ್ಮಾ ಎಂಬುವವರನ್ನು ಚೆನ್ನೈ ಪೊಲೀಸರು ಬಂಧಿಸಿದ್ದಾರೆ. ಸಂತ್ರಸ್ತ ಮಹಿಳೆ ಈ ಸಂಬಂಧ ದೂರು ಸಲ್ಲಿಸಿದ ಒಂದು ವರ್ಷದ ಬಳಿಕ ಆರೋಪಿ ವಿರುದ್ಧ ಕ್ರಮ ಕೈಗೊಳ್ಳಲಾಗಿದೆ.
ಈ ಬಗ್ಗೆ ಕಾರ್ಯಾಚರಣೆ ಕೈಗೊಂಡ ಚೆನ್ನೈ ಪೊಲೀಸರ ವಿಶೇಷ ತಂಡವು ದೇವಶರ್ಮಾ ಅವರನ್ನು ಕೋಲ್ಕತ್ತದಲ್ಲಿ ಬಂಧಿಸಿದ್ದು, ಸದ್ಯ ಡೈಮಂಡ್ ಹಾರ್ಬರ್ ಠಾಣೆಯಲ್ಲಿ ಇಡಲಾಗಿದೆ. ಮ್ಯಾಜಿಸ್ಟ್ರೇಟ್ ಅವರಿಂದ ಆರೋಪಿಯ ಪ್ರಯಾಣಕ್ಕೆ ವಾರಂಟ್ ಪಡೆದು, ಆತನನ್ನು ಚೆನ್ನೈಗೆ ಕರೆತರಲಾಗುತ್ತದೆ ಎಂದು ಪೊಲೀಸರು ತಿಳಿಸಿದ್ದಾರೆ.