‘ವಿ.ವಿ ಸ್ಥಾಪಕ ಜೈಲಲ್ಲಿ, ರೈತರ ಹಂತಕನಿಗೆ ಜಾಮೀನು’: ಅಖಿಲೇಶ್ ವಾಗ್ದಾಳಿ

ಚುನಾವಣೆಯನ್ನು ಗಮನದಲ್ಲಿ ಇರಿಸಿಕೊಂಡು ಆಶಿಶ್‌ಗೆ ಜಾಮೀನು ನೀಡಲಾಗಿದೆ ಎಂದು ವಿರೋಧ ಪಕ್ಷಗಳು ಆರೋಪಿಸಿವೆ.

ಉತ್ತರ ಪ್ರದೇಶ ಚುನಾವಣೆಯ ಮೊದಲ ಹಂತದ ಮತದಾನ ನಡೆ ಯುತ್ತಿದ್ದ ವೇಳೆ, ಗುರುವಾರವೇ ಆಶಿಶ್‌ಗೆ ಜಾಮೀನು ಮಂಜೂರು ಮಾಡಲಾಗಿತ್ತು. ಆನಂತರ, ಕೇಂದ್ರ ಸಚಿವ ಅಜಯ್ ಮಿಶ್ರಾ ಅವರು ಚುನಾವಣಾ ಪ್ರಚಾರ ನಡೆಸಿದ್ದರು. ಅಜಯ್ ಮಿಶ್ರಾ ಅವರು ಲೋಕಸಭೆಯಲ್ಲಿ ಪ್ರತಿನಿಧಿಸು ತ್ತಿರುವ ಲಖಿಂಪುರ ಖೇರಿ ಕ್ಷೇತ್ರ ವ್ಯಾಪ್ತಿಯಲ್ಲಿ ನಾಲ್ಕನೇ ಹಂತದಲ್ಲಿ ಮತ ದಾನ ನಡೆಯಲಿದೆ. ಆಶಿಶ್ ಮಿಶ್ರಾ ಬಿಡು ಗಡೆಯ ನಂತರ ಇಲ್ಲಿ ಪ್ರಚಾರಕ್ಕೆ ಬಿಜೆಪಿ ಭಾರಿ ಸಿದ್ಧತೆ ನಡೆಸಿದೆ.

ರಾಮಪುರದಲ್ಲಿ ಸಮಾಜವಾದಿ ಪಕ್ಷವು ಶುಕ್ರವಾರ ನಡೆಸಿದ ರ‍್ಯಾಲಿಯಲ್ಲಿ ಪಕ್ಷದ ಮುಖ್ಯಸ್ಥ ಅಖಿಲೇಶ್ ಯಾದವ್ ಈ ವಿಷಯವನ್ನು ಪ್ರಸ್ತಾಪಿಸಿದ್ದಾರೆ. ‘ವಿಶ್ವ ವಿದ್ಯಾಲಯವನ್ನು ಸ್ಥಾಪಿಸಿದ ಆಜಂ ಖಾನ್ ಅವರನ್ನು ಪುಸ್ತಕ ಮತ್ತು ಎಮ್ಮೆ ಕಳ್ಳತನದ ಆರೋಪದಲ್ಲಿ ಜೈಲಿನಲ್ಲಿ ಇರಿಸಲಾಗಿದೆ. ಆದರೆ ರೈತರ ಮೇಲೆ ಜೀಪು ಹರಿಸಿ ಕೊಂದ ಪ್ರಕರಣದ ಪ್ರಮುಖ ಆರೋಪಿ, ಕೇಂದ್ರ ಸಚಿವರ ಮಗ ಈಗ ಜಾಮೀನಿನ ಮೇಲೆ ಹೊರಗಿ ದ್ದಾನೆ. ಇದು ಬಿಜೆಪಿಯ ನವಭಾರತ’ ಎಂದು ಅಖಿಲೇಶ್ ಯಾದವ್ ಲೇವಡಿ ಮಾಡಿದ್ದಾರೆ.

ಮತದಾರರನ್ನು ಉದ್ದೇಶಿಸಿ ಮಾತ ನಾಡಿದ ಅಖಿಲೇಶ್, ‘ನಿಮಗಾಗಿ ವಿಶ್ವವಿದ್ಯಾಲಯ ನಿರ್ಮಿಸಿದ ವ್ಯಕ್ತಿ ಕೋಳಿ ಕಳ್ಳತನದ ಆರೋಪದಲ್ಲಿ ಜೈಲಿನಲ್ಲಿ ದ್ದಾರೆ. ಆದರೆ, ರೈತರನ್ನು ಅಪ್ಪಚ್ಚಿ ಮಾಡಿದ ವ್ಯಕ್ತಿ ಜೈಲಿನಿಂದ ಹೊರಗೆ ಇದ್ದಾನೆ. ಜಗತ್ತಿನಲ್ಲಿ ಎಲ್ಲಿಯೂ ರೈತರನ್ನು ಹೀಗೆ ಕೊಂದಿಲ್ಲ. ಆದರೆ ಈಗ ಉತ್ತರ ಪ್ರದೇಶದಲ್ಲಿ ಚುನಾವಣೆ ನಡೆ ಯುತ್ತಿದೆ. ಹೀಗಾಗಿಯೇ ಆರೋಪಿಗೆ ಜಾಮೀನು ದೊರೆತಿದೆ ಮತ್ತು ಆತ ಜೈಲಿನಿಂದ ಹೊರಗಿದ್ದಾನೆ’ ಎಂದು ಆರೋಪಿಸಿದ್ದಾರೆ. ‘ಈ ವಿಚಾರವನ್ನು ರೈತರು ಮರೆಯು ವುದಿಲ್ಲ. ಬಿಜೆಪಿಯು ರೈತರ ಎದುರು 700 ಬಸ್ಕಿ ಹೊಡೆದರೂ, ರೈತರು ಅವರನ್ನು ಕ್ಷಮಿಸುವುದಿಲ್ಲ. ಮೊದಲ ಹಂತದ ಮತದಾನದಲ್ಲೇ ರೈತರು ಮತ್ತು ಸಮಾಜದ ಎಲ್ಲಾ ವರ್ಗದ ಜನರು ಬಿಜೆಪಿಯನ್ನು ಅಳಿಸಿಹಾಕಿದ್ದಾರೆ. ಎರಡನೇ ಹಂತದ ಮತದಾನ ದಲ್ಲಿ ಬಿಜೆಪಿಯನ್ನು ಸಂಪೂರ್ಣವಾಗಿ ಅಳಿಸಿಹಾಕಲಿದ್ದಾರೆ’ ಎಂದು ಹೇಳಿದ್ದಾರೆ.